Escrich per Christian Andreu
Aquò es çò qu’an volgut soslinhar los cercaires d’una còla e an fach per
ansin un nòu estudi sus fins quora aprenèm una segonda lenga. La
conclusion es pas negativa. Las personas qu’aprenon una segonda lenga
contunhan d’èsser competentas fins a 30 annadas après lo començament de
l’estudi d’aquela lenga: d’aprene una lenga non mairala es pas pus
reservat als enfants.
 |
Segon aqueste estudi, lo periòde clau
per aprene las estructuras e règlas
d’una lenga començariá a 17 o 18 ans
e pas abans.
|
Aital, segon lo nòu e discutit estudi, publicat dins la revista numerica Cognition,
la fenèstra per aprene una lenga seriá fòrça mai longa que se pensava.
L’estudi confirmariá que las personas començan d’aver de possibilitats
realas de parlar plan una lenga a partir de 17 o 18 ans e pas a 7, coma
disián d’estudis anteriors.
L’estudi es estat fach sus la coneissença de personas que parlavan pas l’anglés
coma lenga mairala e qu’avián començat de l’aprene a 10 o 12 ans o
après. Aquò seriá l’edat ont començarián d’aver de nauts nivèls
gramaticals dins aquela lenga, pas abans. Aquò confirmariá que d’encapar
lo mestritge de doas lengas se poiriá solament far a travèrs d’un
periòde de temps fòrça long.
D’aprene una lenga es pas reservat als enfants
L’estudi es estat fòrça discutit dins la
comunautat lingüistica mondiala pr’amor qu’afirma qu’aprene una segonda
lenga es pas pus un afar reservat als enfants. Segon aqueste, lo
periòde clau per aprene las estructuras e règlas d’una lenga començariá a
17 o 18 ans e pas abans, çò confirmèt lo psicològ Joshua Hartshorne,
del MIT.
D’estudis realizats abans suggerissián
que las competéncias per aprene plan una segonda lenga devián èsser
situadas entre los 5 e 7 ans d’edat d’una persona. Mas alara, las
personas mai annadas que començan d’aprene una segonda lenga finirián
que la parlarián pas jamai plan. L’estudi fach ara confirma que las
personas que començan d’aprene l’anglés a 10 o 12 ans finisson que la
parlan parièr coma los nadius anglofòns.
Fins a 17 ans, lo nivèl de fluiditat èra
bas. Puèi montava. E una autra resulta estonabla: lo melhor mestritge
de l’anglés arribava passats los 30 ans malgrat qu’aguèsson estudiat la
lenga pendent 10 o 20 annadas.
 |
|
Aital, segon lo
nòu estudi, la fenèstra per aprene
una lenga seriá fòrça mai longa que se
pensava.
|
L’estudi, fach per mejande questionaris que mai de 669 498 personas i an respondut a travèrs de Facebook,
es estat considerat, pasmens, coma pauc clar e determinant. Es çò qu’an
declarat maites scientifics de l’estudi de l’aprendissatge de las
lengas.
Atal, plusors cercaires se son mostrats
inquiets de las resultas. Segon David Barner, de l’Universitat de
Califòrnia, l’estudi precisa pas qualas competéncias se son desvolopadas
a cada edat. Es çò que diguèt la psicolingüista Elissa Newport de l’Universitat de Georgetown, a Washington DC.
Segon aquesta scientifica, mai d’un
estudi confirman qu’una segonda lenga deu èsser apresa entre los 5 e 7
ans d’edat. Puèi ja es malaisit de l’estudiar. Nosautres volèm,
umilament, tanben donar nòstre vejaire. Avèm aprés la lenga d’òc après
40 ans e encara cal aprene pendent fòrça ans aquesta subrebèla lenga
fins a poder dire que la parlam plan. E aquò seriá una conclusion
encoratjanta. Totes o pòdon doncas far.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
[Poblejat dins www.sapiencia.eu]
Sem comentários:
Enviar um comentário