Los djudyos de Fransya i la Revolusyon (1)

Keridos amigos,

En este kanton vo partajar mis eskritos ke ize por anyos para la emisión de radio Muestra Lingua ke ya no sale mas por la radio djudiya de Fransia.

Saludes a todos,
Edmond Cohen
Paris – Fransya

LOS DJUDYOS DE FRANSYA I LA REVOLUSYON (1)

Oy me pensi ke puediyash ser interesados por la istorya de los djudyos de Fransya durante la Revolusyon, afillu si en esta epoka muestros antepasados no biviyan en Fransya, ma en el Imperyo osmanli. Me demando en vezes kualo pensavan los djudyos de Turkiya oyendo los haberes ke veniyan de Fransya. A esta kuestyon no puedo dar repuesta. Ama sovre la situasyon de los djudyos de Fransya, ya tengo algunas luzes.

Kale akodrarvos, en primero, ke si se save ke los djudyos de Espanya fueron echados afuera por los reyes katolikos en 1492, los djudyos de Fransya ya aviyan sido eyos tambyen echados desnudos de Fransya unos dos siglos antes, por el rey Philippe le Bel en 1306, ovligados de deshar al rey ladron todas sus paras i byenes.

Malgrado esto, en 1789 biviyan unos 40.000 djudyos en Fransya, kale saver deke :

– Unos 10.000 djudyos biviyan en lo ke se yamava el Comtat Venaissin, ke eran los estados del papa alderedor de Avignon i Carpentras ; komo pertenesiyan al papa estos estados no aziyan parte del reyno de Fransya, i por esto no fueron tokados por la ekspulsyon.

– otrunos 10.000 djudyos biviyan alderedor de Bayonne i Bordeaux. Eyos aviyan vinido de Espanya i Portugal del tyempo de la Inkizisyon, sözde komo kristyanos, en vedra eran kripto-djudyos (en ebreo se dize anusim, forsados) fuyendo la Inkizisyon. Komo se diziyan kristyanos, no era posivle de echarlos afuera, afillu si ya se sospechava ke en vedra eran djudyos. A poko a poko estos krypto-djudyos se deklararon komo djudyos, ama komo ya estavan en Fransya desde muncho tyempo, fueron tolerados i no echados afuera. Mijor mismo, obtuvyeron de ser suditos del rey.

– Aviya unos kuantos djudyos, muy pokos, en Paris, no se save muy byen kuantos, puede ser kinyentos, ke aviyan obtenido (kon paras) otorizasyones de kedarse en la sivdad.

– I sovre todo aviya unos 20.000 djudyos en el este de Fransya, la mayoriya en Alsace, ke la Fransya topo kuando, en 1648, tomo la Alsace despues del tratado de Westfaliya, i unos 2.500 en Lorraine, Metz, Nancy, ande aviyan sido mas o menos tolerados en los siglos 17 i 18.

Los djudyos de Bordeaux, Bayonne i Avignon aviyan obtenido kon los anyos de ser suditos del rey, ama los djudyos del este no eran sivdadanos fransezes, eran solo tolerados sovre el territoryo franses.

Ama la emansipasyon de los djudyos era una kuestyon en el ayre, si se puede dizir ansina. El movimyento para la emansipasyon de los djudyos ya aviya empesado en Almanya kon Lessing i Moses Mendelssohn ke demandavan ke los djudyos tengan los mismos derechos ke los kristyanos.

En Fransya, el rey Louis XVI, en 1784, aze lo ke se yama en franses Lettres patentes, dando a los djudyos unos kuantos derechos, entre los kualos el de azer agrikultura.

Un anyo mas despues, en 1785, la Akademia de Metz avre un konkorso para 1787 sovre el sujeto sigyente : « Es ke ay medyos para render a los djudyos mas orozos i provechavles en Fransya ? » Diez repuestas, entre las kualas dos antisemitas, una de las dos propozyendo la deportasyon de los djudyos en Guyane. La otra, mas dulse, eskrita por un papas, dize ke a los djudyos les agrada el myel. Asigun este papas muy seryozo, ay unas 20.000 famiyas djudiyas en Fransya. Kale embiyar, ke lo kyeran o no, estas famiyas djudiyas en todo modo de lugar de Fransya, i darles a kada una 300 bezbares (ruches) lo ke mos da 6 milyones de bezbares. Ansina los djudyos van a ser provechozos para la Fransya komo produktores de myel.

Las ocho otras repuestas son favoravles a los djudyos, sovre todo, por siguro, la de Zalkind Hourvitz, djudyo polako bivyendo en Paris. Aki no tengo tyempo, ama este Hourvitz mereseriya a el solo una emisyon. Vinido de su Polonya sin saver el franses, se troka en poko tyempo en un intelektual ke no solo va konoser a la perfeksyon el franses, ama tambyen las literaturas ebrea, latina, grega. Tres repuestas van a obtener el premyo, la de Hourvitz, la de un syerto Thiery, avokato de Nancy, i la del abbé Grégoire. Las tres son imprimadas, ama la mas famoza keda la del abbé Grégoire, ke sera despues deputado en las asembleas de la Revolusyon. Su titudo : « Essai sur la régénération physique, morale et politique des Juifs » Lo ke es kuryozo, es ke Grégoire komo Hourvitz kyeren en vedra ke los djudyos dezapareskan a poko a poko en fundyendosen en la sosyeta franseza. Hourvitz el djudyo eskrive : « Seriya bueno ke sea proibido a los djudyos de tener hahamim, ke kostan demaziya karo, i ke no sirven de nada… » Al kontraryo Thiery el kristyano es el solo ke kyere, o si no kyere, digamos, ke acheta, ke los djudyos keden djudyos.

En este mismo anyo 1787 Mirabeau, aboltado de Almanya, eskrive « Sur Moïse Mendelsshon et sur la réforme politique des juifs ».

La idea jenerala de estos todos ombres de buena veluntad puede ser rezumada por una formula del donde de Clermont-Tonnerre un poko mas tadre, en 1789 : « Kale todo refusar a los djudyos komo nasyon i todo darles komo individuos ».

Luis XVI

Ama aboltaremos en 1788 : el rey Louis XVI el mismo, despues de aver dado derechos a los protestantes i, komo ya lo dishe, unos kuantos derechos a los djudyos por sus Lettres patentes de 1784, empesa de estudyar de manera mas jeneral el kavzo de los djudyos de su reyno, i demanda a su ministro Malesherbes de azerle un raporto sovre la kuestyon si se puede dar a los djudyos mas derechos i los kuales, dizyendole : « vos izites protestante (kale solo entender, lavorates para los protestantes), agora yo vos ago djudyo ». Malesherbes empesa su lavoro, kombidyendo djudyos de todas las vandas para estudyar una solusyon, lo ke se yamo la komisyon Malesherbes. : tres djudyos de Bordeaux : Abraham Furtado, Gradis i Lopez-Dubec ; un djudyo de Bayonne : Fonseque ; un djudyo de Strasbourg, Cerf-Berr reprezentando a el solo toda la Alsace ; un djudyo de Nancy : Berr Isaac Berr, reprezentando a el solo toda la Lorraine, dos djudyos de Paris : Lazard i Trenel.

No kale imajinarse ke estos todos djudyos eran aunidos frente al Estado franses reprezentado por Malesherbes. Al kontraryo, aviya opozisyon entre los ashkenazim del este i los sefaradim de Bordeaux i Bayonne. Los djudyos de Bordeaux i Bayonne eran muncho mas asimilados en la sosyeta franseza ke los djudyos de Alsace, i por egzemplo Furtado o Gradis, sefaradim de Bordeaux, no se entendiyan kon Cerf Berr, ashkenazi de Strasbourg. Eyos mismos diziyan ke pertenesiyan a dos vandas diferentes del djudaismo, i Malesherbes no saviya kualo azer.

Gradis era asimilado, Cerf Berr no, i primo de todo respektava el shabat i la kasherut. Malesherbes keriya saver si un djudyo pudiya komer kon un kristyano. Por siguro, respondyo Gradis. Por siguro ke no, respondyo Cerf Berr. I deke no ?, demando Malesherbes. Sovre kualo Cerf Berr le tomo la kavesa, dizyendole ke estos sefaradim se yerravan i ke no kaliya oirlos, ke el saviya lo ke era de azer. Povereto de Malesherbes, disho a un amigo : « El rey me disho ke me aga djudyo, i aki Cerf Berr me kyere azer jansenisto, no se mas a kyen oir ! ».

Guillaume-Chrétien de Lamoignon de Malesherbes

Esto dicho, Malesherbes tyene en idea de tratar la kuestyon de los derechos de los djudyos de manera unika i jenerala, i lavora muncho kon el ayudo de ombres de derecho. Ama mos estamos aserkando de la Revolusyon, Malesherbes komo el rey Louis XVI son muy okupados kon otros dertes i Malesherbes se va sin pueder terminar su lavoro.

I vyene en 1789 la konvokasyon de los Estados Jenerales kon la redaksyon de tefteres de doleansa. Los djudyos kyeren prezentarse a los Estados Jenerales, ama solo los de Bayonne i Bordeaux tyenen derecho de prezentarse, i se prezentan, ama no tyenen deputados, afillu si le faltaron solo 4 bozes a Gradis. Ama los djudyos de kada parte eskriven tefteres de doleansya en los kualos, sovre todo los djudyos del este de la Fransya, yevados por Cerf Berr, demandan los derechos enteros de sivdadanos fransezes. Kale dizir ke de otra parte los kazalinos de Alsace eskriven kontra los djudyos. Algunos demandan ke sean todos ekspulsados de Fransya.

Komo ya lo savesh, los Estados Jenerales se arrekojen el 5 de mayo 1789, i dos mezes despues, el 9 de julyo, se deklaran Asamblea Constituanta. Sin pedrer tyempo, pishin el 3 de agosto 1789, dunke un diya antes de la famoza noche del 4 de agosto, el abbé Grégoire, uno de los tres ke aviyan obtenido dos anyos antes un premyo de la Akademya de Metz sovre los djudyos, demanda ke los djudyos sean admitidos komo sivdadanos fransezes. Grégoire no es el solo en favor de los djudyos. Son munchos deputados ke van de su vanda sovre esta kuestyon : un mansevo de 31 anyos yamado Robespierre (ke se va azer famozo poko tyempo despues asta ke ser kaji el kapo de la Fransya) toma la palavra en favor de los djudyos ; tambyen Mirabeau, ke, komo ya lo dishe, eskrivyo dos anyos antes un livro sovre la reforma politika de los djudyos ; tambyen el konde de Clermont-Tonnerre, tambyen Barnave, i otros.

Ama aviya tambyen deputados muy en kontra de los djudyos ; el abbé Maury, el duke de Broglie, reprezentantes de la derecha, ama tambyen un jakobino de la syedra, Rewbell, deputado de Alsace, i kapo de los antisemits.

Todos los deputados de Alsace se metyeron de la vanda de Rewbell i se opozaron de todas sus fuersas a kualkyer derecho abandonado a los djudyos. De tal modo ke la kuestyon de los djudyos va ser la okazyon de una gerra permanente al seno de la Asamblea durante dos anyos entre los partizanes i los adversaryos de los djudyos. I van a ser a poko a poko, los partizanes de los djudyos ke van a obtener chikas viktoryas asta la viktorya final tres diyas antes ke se separe la Asamblea, el 27 de septyembre 1791.

No vos vo kontar por el detalyo toda esta gerra de dos anyos, solo darvos unas kuantas datas :

Berr Isaac Berr

– el 14 de oktovre 1789, la Asamblea oye a una delegasyon de djudyos del este yevados por Berr Isaac Berr, de Nancy, ke no kale konfundir kon Cerf Berr, de Strasbourg.

– el 21 de desyembre 1789, se da la sivdadaniya a los non-katolikos, ama en vedra son los protestantes. Clermont-Tonnerre demanda ke los djudyos obtengan la misma desizyon, syendo ke son non-katolikos. A su lado munchos deputados, i kon eyos Regnault de Saint Jean d’Angely, avokato liberal. Ama yene Rewbell, deputado de Alsace, toma la palavra para opozarse a toda medida en favor de los djudyos, i la ley no pasa. Si, pasa para los protestantes, ama no para los djudyos. Por lo ke es de los djudyos, la Asamblea dechida de ver mas despues…

– Vyendo esto, i ke la opozisyon vyene de los deputados de Alsace, los djudyos sefaradim de Bayonne, Bordeaux i Avignon, aprovan de obtener la sivdadaniya para eyos, syendo ke los djudyos de Bordeaux ya obtuvyeron Lettres patentes del rey Henry II, ke les da derechos de sivdadanos. Deke tendriyan menos derechos oy ? El 28 de janvier 1790, Talleyrand demanda ke sean a parte de los otros djudyos, porke eyos ya son en vedra sivdadanos, i no kale ke pedran sus derechos en asperando los otros djudyos.

I despues de un peleo furyozo, los djudyos de Bordeaux, Bayonne i Avignon se ven rekonoser la sivdadaniya. De este diya no se van mas okupar de los otros, kijo dizir de los del este.

-los 20 i 21 de djulyo 1790, los djudyos obtyenen la igualidad en materya de vergi.

– el 9 de mayo 1791, los djudyos demandan de tener los mismos derechos ke los ajenos bivyendo en Fransya desde mas de sinko anyos. Deke eyos son sivdadanos fransezes i no los djudyos ke biven en Fransya desde siglos ? Porke son djudyos ? Ama la Constitusyon dize – no paso kolay, ama paso – ke todas las relijyones son iguales en Fransya. El argumento era fuerte, ama yene la opozisyon de los deputados de Alsace aze ke la demanda de los djudyos es refuzada.

– el 30 de septyembre 1791, la Asamblea Constituanta, elijida asta esta data, se tyene de separarse. El 27, los deputados de Alsace no estan en la sala, salvo Rewbell. Es oy o nunka. El deputado Adrien Duport mete al voto la ley dando a los djudyos, todos los djudyos, la sivdadaniya. Rewbell se alevanta para opozarse, ama esta vez es solo i su boz es kuvyerta por la de Regnault de Saint-Jean d’Angely : « Kale votar sin oyir a los opozantes, porke kombatir esta propozisyon, es kombatir la Constitusyon mizma ! ».

I ansina es ke los djudyos, tres diyas antes ke la Asamblea se separe, obtuvyeron kon la sivdadaniya franseza los mismos derechos ke los kristyanos. Kaliya la firma del rey Louis XVI. La dyo el 13 de novyembre.

Agora ya vino el tyempo de kedarme, ama en vedra no kale pensar ke todo se izo kyeto para los djudyos de este diya. Los dertes vinyeron pishin, ama esto sera para la semanada proksima, si kyere el Dyo !

Edmond Cohen
Paris, Fransya

[Orijen: www.esefarad.com]

El arte djudyo

Keridos amigos

Para amanyana djueves me pensi de aparejar una emisyon sovre el arte djudyo, limitandome al arte grafiko: pintura, kalligrafiya, enluminura. Yamo arte djudyo una ovra artístika echa por un djudyo (en jeneral, ma no syempre), ke tyene un atadijo, de serka o de leshos, kon el djudaismo o la vida djudiya.

Saludes a todos

Edmond Cohen
Paris – Fransya

--------------------------------------------------------------------------------------------------------------------------

EL ARTE DJUDYO

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar,  vos akodro ke el proksimo atelye de konversasyon de Vidas Largas se tendra el martes 21 de mais, a las  dos i medya, en el Centre Communautaire. Estos atelyes son avyertos a todos, venid munchos.

Vos akodro tambyen ke las emisyones de Radio J se pueden oir por internet sovre el sityo de Radio J, sea en direkto, à las 4 h 06 ora de Paris, o kuando se kyere, en klikando sovre las emisyones del djueves despues de mediudiya. http://radioj.fr/node/55

Oy, me pensi de avlarvos del arte djudyo, limitandome a la kalligraphiya i a la pintura.

Vo eskapar por pensar ke so un ombre korajozo, porke despues de tener avlado de Kabala, lo ke, vo lo puedo asigurar, no fue una koza kolay, agora vo aprovar de avlarvos de arte grafiko, lo ke, a la radyo, sin pueder amostrar nada, no va ser koza kolay tampoko !

Komo lo dishe kuando avli de umor djudyo o de poeziya djudiya, kale en primero demandarse kuando se puede dizir ke un pintor aze pintura djudiya. I la repuesta va ser la misma: no abasta ke un pintor sea djudyo para ke su pintura lo sea. A la rigor puede no ser djudyo el mismo, i yene azer pintura djudiya, lo ke importa lo mas, a lo manko asigun mi,  es ke lo ke pinta tenga un atadijo, de serka o de leshos, kon el djudaismo o kon la vida djudiya.

Por egzemplo, una pintora komo Sonia Delaunay, nasida Sara Stern en Ukranya i haliz djudiya, un pintor komo el israelyano Yaakov Agam, nunka, por lo ke sé, izyeron pintura djudiya. Sus pintura, abstrakta, no me parese tener kualkyer atadijo kon el djudaismo. La abstraksyon a syempre sido un arte relijyozo para los muzulmanos, ke, komo los djudyos, no tyenen derecho a la pintura figurativa. Ma lo ke fue syempre vedra para los muzulmanos no me parese tan siguro para los djudyos, i la abstraksyon de Sonia Delaunay o de Agam no tyene, por lo ke me parese, nada de relijyozo.

Esto dicho, empesaremos por el empesijo, i avlando de djudaismo i de arte, lo mijor es de empesar por la Tora. El pasuk 4 del kapitulo 20 de Shemot, ke es una parte de la sigunda de las Diez Palavras, dize: « No hagas a ti doladizo (estatua) i toda semejança que en los cielos de arriba y que en la tyerra de abaxo, y que en las aguas de abaxo de la tierra ». Si oitesh byen, el pasuk dire « para ti » (leha en ebreo). I si es para el Dyo? La repuesta es no, i lo vemos sinko kapitulos mas despues, Shemot XXV, 18 i 20): « Y haras dos Cherubim de oro, batido haras a ellos de dos cabos del cobertero (…) Y seran los Cherubim espandientes alas para riba cubrientes con sus alas sobre el cobertero, y sus fazes uno a otro, al cobertero seran fazes de los Cherubim. » Una chika paranteza de traduksyon: el teksto ebreo no dize « uno a otro » komo lo traslada la Biblia de Ferrara, ke por tanto dize trasladar « palabra por palabra ». El teksto ebreo dize ish el ahav, lo ke deviya trasladarse varon a su hermano, i ansina es ke lo traslada Chouraqui: l’homme vers son frère. Deke los traduktores de Ferrara no eskrivyeron « varon a su hermano? No tengo la repuesta, ma, asigun mi, es para no dar a konfundir cherub i ombre…Syerro la paranteza ke mos alesha un pokitiko, ama no tanto, de la kuestyon de la interdiksyon de azerse « semejança que en la tyerra de abaxo ». Vemos kon los Cherubim ke ay kavzos en ke es permetido, i mismo ordenado, al djudyo de azer una estatua.

I de fakto, los djudyos no fueron syempre sin azer imajenes. Despues de las estruisyones por los Asiryanos, Babylonyanos, Gregos i Romanes, es vedra ke no tenemos tantas prevas arkolojikas de un arte djudyo, ama yene se pueden sitar las pinturas de las paredes del kal de Doura Europos, una sivdad en medyo de la Syria. Este kal, se save porke todo se topa eskrito sovre las paredes, fue fraguado verso 250, kijo dizir del tyempo del emperador romano Decius (ke va morir un anyo despues en kombatyendo los Godos). Si las pinturas ke kovran todas las paredes del kal sovrebivyeron asta oy, es porke kaji kuando fueron eskapadas, en 256, los Romanos (esta vez el emperador se yamava Valeriano) deven de defender la sivdad atakada por los Persos de Shapur Iero, i por esto destruyen maksus una parte del kal para fraguar una pared de defensa, sin tokar a las paredes pintadas ke se topan kuvyertas de tyerra i ansina salvadas. Las pinturas se pueden ver en bushkando el kal de Doura Europos sovre internet, i se podriya azer una emisyon entera sovre estas pinturas. https://fr.wikipedia.org/wiki/Synagogue_de_Doura_Europos

Une des fresques de la synagogue de Doura Europos : la fille d’un pharaon,
entourée de suivantes, recueille Moïse bébé d’un panier flottant sur un cours d’eau.

Lo ke kale empesar de dizir es ke los arkeologos ke toparon estas pinturas en 1932, freskas komo si veniyan de ser pintadas, no puediyan kreer a sus ojos: un kal antiguo yeno de pinturas ! Las pinturas de Doura Europos no son abstraktas. Son pinturas de djente, Avraham, Moshe, Yeshayau, bivyendo istoryas del Tanah.

Por dizir la vedra, ya se teniya topado, kuatro anyos antes (en 1928) en la sivdadika de Beth Alfa en el Galil, un kal de entre los siglos V i VI, kijo dizir verso los anyos 500, dunke unos dozyentos i sinkuenta anyos despues del kal de Doura Europos, en un tyempo ande la Judea era dainda okupada por los Romanos, ama agora kristyanos, los Romanos de oryente yamados byzantinos. I en este kal los arkeologos tuvyeron la sorpreza de topar mozaikas muy byen konservadas amostrando tambyen figuras umanas, animales, ets, komo en Doura Europos, kon la sola diferensya ke los pintores de Doura Europos eran halizes profesyonales, kuando los ke izyeron las mozaikas de Beth-Alfa, sea inventaron el arte naivo, sea eran halizes naivos lavorando komo kriaturas (i mismo kriaturikas). Aki puedresh meldar sovre synagogue Beth Alpha.

En un artikolo de 2012 en Israel Infos, la senyora Saskia Shoshana Cohen Tanugi mos dize ke « la ermoza simplisidad de estas mozaïkas amostra una obedesensya a las leyes divinas i una veluntad de no someterse a los kanones estetikos de sus tyempo ». Bueno…Yo me syento mas de la vanda del ke pensa, en Wikipedia, ke los djudyos de Beth Alfa no teniyan bastante paras para pagar buenos artistos…

Esto dicho, fue una grande sorpreza de deskuvrir ke, en los tyempos antiguos, los kales no eran komo oy sin imajenes, o kon solo imajenes abstraktas. I lo ke se deskuvriyo despues a poko a poko mo amostran ke estos dos kales de Doura Europos i de Beth Alfa no son una eksepsyon.

Kale avlar, por egzemplo, del kal topado en Hukok, en el Galil, en 2012, un kal del siglo V, dunke unos dozyentos anyos despues del kal de Doura Europos, i puede ser unos kuantos anyos antes del kal de Beth Alfa. Mirar tambien Découvrez un kaléidoscope de mosaïques juives et laïques inédites

Nada de ver, a lo ke me parese, kon el arte naivo de Beth Alfa. Aki tenemos mozaikas muy ermozas, i podresh ver ke aki tambyen, se pueden ver figuras umanas, pishkados, ets.

No vos vo dar aki la lista de todos los kales topados aki i aya de esta epoka. Una koza es sigura, es ke los hahamim de este tyempo no teniyan la misma meldadura del sigundo komandamyento ke los hahamim de oy.

Es kon el tyempo ke, a poko a poko, los hahamim, puede ser para trokar kon las imajenes de la relijyon katolika, kedaron de permeter de meter imajenes en mos kales.

No esto aki para azer un estudyo relijyozo de la kuestyon, ama ya savemos ke desde este tyempo, el arte de pintura djudiya se kedo, salvo en dos dominyos, las enluminuras i la kalligrafiya.

Syempre los djudyos se esforsaron, por egzemplo, de azer ermozas ketubot de kazamyento, kon una ermoza kalligrafiya. Esto es la diferensya kon un sefer Tora. El sefer Tora es tambyen eskrito por kalligrafos yamados soferim, no es koza kolay de eskrivir en el pergamino del Sefer, ma la kalligrafiya es kodifikada, algunas letras son mas chikas ke las otras, otras son mas grandes, ama el sofer no tyene dinguna libertad de djugar kon las letras. A la kontra, el kaligrafo de una Ketuba se permite de azer ermozo kon las letras, i tambyen, si no me yerro, el de una Hagada de Pesah.

Komo esto avlando de kalligrafiya, me vo permeter de kedarme sovre la koza, ama vo azer un salto en el tyempo para avlar de los kaligrafos djudyos de oy.

No konosko los kalligrafos afuera de Fransya, ma tengo kozas de dizir sovre dos kaligrafos de Fransya, los dos lavorando kon la mano syedra. El uno se yama Frank Lalou, me da la impresyon – puede ser me yerro – ke se ambezo la kalligrafiya a la vez de los kalligrafos muzulmanos i de los kalligrafos kinezos.

Kuando eskrive, kon una presizyon perfekta, el djesto es siguro i sin yerro, se andevina ke todo a sido pensado i meditado de antes, es una ermozura de ver su mano komo azyendo un bayle. El djesto es ermozo, ama kualo dizir de las letras ke salen de su mano komo una maraviya. Yo me tresalgo de verlo sovre internet youtube. Bushkad Frank Lalou i lo toparesh kolay.

El otro kalligrafo se yama Michel d’Anastasio. Vos dishe al empesijo de esta emisyon ke uno a la rigor puede no ser djudyo el mismo, i yene azer pintura djudiya. Es un poko el kavzo de Michel d’Anastasio, salvo ke el no aze pintura djudiya, aze kalligraphiya djudiya (mas djugadera, vamos a dizir, ke la de Frank Lalou). Su istorya merese de ser kontada: bivyendo en Fransya de orijen maltese, d’Anastasio se interesa a la kalligrafiya i se la ambeza kon grandes profesores. Despues de munchos anyos, en 2004, se va en Malta, i aya se ambeza ke una parte de su famiya es de orijen djudiya, lo ke el no saviya. Unos kuantos mezes despues, en un viyaje ke aze en Israel, se syente un amor de la kultura djudiya i sovre todo por el alfabeto ebreo. Kuando abolta en Paris, empesa a estudyar munchas oras al diya las letras ebraikas, i se tresale. Estudya la lingua ebraika i agora es kalligrafo ebraiko, kon una veluntad de modernismo. podesh mirar aki L’Alphabet Hébraïque ou l’Art de la calligraphie.

D’Anastasio, komo vos dishe, se apersivyo ke teniya orijenes djudiyas. Otrun kalligrafo ke, el, no tyene nada de djudyo, izo tambyen kalligrafiya ebraika. Se yama Henri Renoux. Izo kon letras ebraikas un arvole, asigun esta eskrito en Devarim (XX, 19) « El hombre, arbol del campo ».

Aki me vo kedar sovre la kalligrafiya, aboltandome a la Edad Medya, para avlarvos de las enluminuras djudiyas. La kalligrafiya, son las letras. Las enluminuras son lo ke ay en un manuskrito para embeleserlo.

Una vez ke vos avli de las enluminuras, keda la pintura djudiya. Komo lo dishe al empesijo, no abasta ke una pintura sea echa por un pintor djudyo para ke se pueda avlar de pintura djudiya. Munchos fueron los pintores djudyos en los siglos 19 i 20. Ma no vos avlaré de Pissaro, de Soutine, de Modigliani, de Kisling, de Sonia Delaunay, de Rothko, de Agam, estos todos pintores muy interesantes i de valor, ma sus pintura no se puede, a lo manko asigun mi, dizir pintura djudiya.

A la rovez, un Marc Chagall es por siguro un pintor djudyo ke izo arte djudyo, de una porke amostro la vida del shtetel en su Rusiya de nasimyento, i de dos porke lavoro sovre el Tanah para kales o, por egzemplo el oshpital Hadassah en Yerushalayim, sin, por lo tanto, olvidar ke lavoro tambyen para iglesyas katolikas, ma limitandose, por lo ke vide, al Tanah. Si es vedra ke izo, en 1938, una pintura intitolada « Krusifiksyon blanka » amostrando Jesus sovre la kruz, es yene una pintura muy djudiya sovre la sufriensa djudiya: Jesus yeva un taleth, i lo ke mira son las persekusyones de los djudyos a traves los siglos:

http://collegebarbot-arts.over-blog.com/article-hda-3eme-fiche-analyse-la-crucifixion-blanche-de-chagall-103754494.html

No me puedo mas apezgar sovre Chagall porke me keda poko tyempo, i no kyero eskapar esta emisyon sovre el arte djudyo sin avlar, sovre todo en estos diyas ande tuvimos a la vez el Yom ashoa i el Yom azikaron, de la pintura de la sufriensa djudiya, ma aki tambyen so ovligado de limitarme a un solo pintor, el pintor de los kampos de la muerte, David Olère (nasido en Varsovia en 1902, muerto en Fransya en 1987). No solo fue deportado de Fransya i se topo en Auschwitz de 1943 asta 1945, ma es uno (kon Shelomo Venezia) de los muy pokos sovrebivyentes de los sonderkomandos, kargado de kemar los puerpos de los gazados. Su pintura es un terrivle testimonyo ke mos apreta el korason, ama mas arte djudyo ke esta pintura no ay… Una de sus mas terribles pinturas se yama « gazage », i penso ke dingun pintor a parte de el tendriya el derecho de azerlo.

David Olère (1902-1985) – Gazage ( date imprécise)

Para no desharvos sovre esta tristeza, vos akodro ke despues del yom azikaron, es oy el yom aatsmaut, ke despues de la Shoa uvo el renasimyento del Estado de Israel, ke oy mismo en Israel se alevantan syenes i miles de pintores, i ke el arte djudyo tyene lo mijor delantre de el.

Al djueves ke vyene, si kyere el Dyo!

Edmond Cohen
Paris, Fransya


[Orijen: www.esefarad.com]

Israel a la punta de la teknolojiya

Keridos amigos

Me kedi tres semanas sin embiyarvos textos de emisyones miyas, porke el djueves 14 arresivi a Alain de Toledo para avlar del diksyonaryo franses-djudeo-espanyol ke esta aparejando travado del Nehama tomado a la rovez, i el 21 arresivi a Linda Sixou, profesora de espanyol en Nisa, ke vino para avlar de su lavoro en favor del djudeo-espanyol (afillu si eya mismo no es djudeo-espanyola, syendo ke vyene de una famiya de Tuniziya) i para kantar. Me tomi el plazer de kantar Adyo kerida kon eya…

Esto dicho, por el kavzo ke no puedia eya venir, yo teniya aparejado un teksto komo plano B sobre Israel a la punta de la teknolojiya. Esto era para jueves 21 despues de medyudiya. Komo vino, me guadri mi testo para el jueves 28. I, komo ya lo eskrivi aki, me ambezi vyernes ke Israel teniya en la noche embiyado una fuzea verso la luna…Tuve de trokar un polo mi teksto.

Saludes a todos,

Edmond Cohen
Paris – Fransya

——————————————————————————————

ISRAEL A LA PUNTA DE LA TEKNOLOJIYA

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar, vos akodro ke el proksimo atelye de konversasyon de Vidas Largas se tendra el martes 12 de marso, a las dos i medya, en el Centre Communautaire. Estos atelyes son avyertos a todos, venid munchos.

Vos akodro tambyen ke las emisyones de Radio J se pueden oir por internet sovre el sityo de Radio J, sea en direkto, à las 4 h 06 ora de Paris, o kuando se kyere, en klikando sovre las emisyones del djueves despues de mediudiya. http://radioj.fr/node/55

Aze dos djueves en sira ke no vine aki para meldar un teksto aparejado de antes, syendo ke, el djueves pasado, arresivi a la kantadera Linda Sixou ke vino avlar de su lavoro para el folklor djudeo-espanyol i para kantar varyas kantikas en muestra lingua.

I el djueves de antes, me oyitesh arresivir en direkto a mi amigo Alain de Toledo, ke ya konosesh por ser el prezidente de la asosyasyon Muestros Dezaparesidos, ke aune todas las asosyasyones djudeo-espanyolas de Fransya para un lavoro sovre los djudeoespanyoles deportados de Fransya, lavoro ke empeso aze unos diez anyos i ke, si kyere el Dyo, va salir este anyo i va pesgar unos dos kilos. No va solo dar la lista de los deportados, ma se va interesar tambyen a los fuziyados, a los veluntaryos en la armada franseza i a los rezistantes. Munchos istoryanos avlaran tambyen de la istorya de los djudeo-espanyoles, de las razones ke los izyeron venir en Fransya, de lo ke aziyan en Fransya antes de la Shoa, ets.

Ama esta vez no vino para esto. Vino para avlarmos de un otro lavoro suyo, muy adelantado ama yene no eskapado, sovre lo ke yamo kon razon el Nehama al reverso: tomo el diksyonaryo de Joseph Nehama ke mos da la traduksyon al franses de byervos djudeoespanyoles, i a la roves tomo kada byervo fransez de la traduksyon de Nehama, los metyo en orden alfabetiko, i metyo en frente el byervo djudeo-espanyol del diksyonaryo de Nehama, fraguando ansina un diksyonaryo fransez-djudeoespanyol.

Si vos avlo oy de estas dos emisyones pasadas, es porke estas emisyones no se pueden meldar, syendo ke eran entrevistas en direkto, se pueden solo oir sovre internet.

I agora de kualo avlarvos oy? Ay sej anyos de esto, el 7 de fevrero 2013, vos ize una emisyon sovre las reushitas de Israel. En esta emisyon vos avli de un artikolo de un syerto Bruno Rivière, paresido en 2008, aze dunke unos diez a onze anyos, en la revista Spectacle du Monde. En 2008, el gazetero se enkantava de sesh reushitas del Estado de Israel :

1°) Desvelopamyento del numero de povlasyon: 720.000 en 1948 (kon 600.000 djudyos). 7.300.000 en 2008 (kon 5.800.000 djudyos). I yo adjunto: 8.800.000 en 2017 (kon mas o menos 7.000.000 djudyos)

2°) Desvelopamyento del PNB ke paso de 1 a 2 milyardas de dolares en 1948 a 180 milyardas en 2008. I agora 320 milyardas.

3°) Mantenimyento de la demokrasiya malgrado tantas gerras i tanto terrorismo.

4°) Renasimyento de la lingua, koza unika en el mundo.

5°) Renasimyento del djudaismo. Los mansevos son mas numerozos a ser pratikantes ke los vyejos.

6°) Defensa del pais. La armada israelyana es mas i mas fuerte.

Esto es lo ke diziya Bruno Rivière en 2008.

El 31 de jenero de este anyo 2019, la gazeta L’Obs salyo un artikolo de la gazetera Dominique Nora, intitolado Israel, la tech promise. La tech promise (la teknolojiya prometida) es una shaka sovre la terre promise : la tyerra prometida.

Al empesijo me pensi de avlarvos de lo ke meldi en este artikolo sovre lo ke yaman agora la start up nation para dizir Israel. Ama vyernes pasado, kualo me ambezi? Ke Israel aviya metido sovre una fuzea amerikana ke fue echada en la noche de djueves a vyernes una sonda ke, despues de tornar tres vezes alderedor de la tyerra para tomar fuersa i de tornar tambyen dos vezes alderedor de la luna, esta vez para frenar, va alunir sovre la luna el 11 de avril (si todo se pasa byen, lo ke no es dainda koza sigura). Es klaro ke tendré en una otra emisyon de avlarvos mas muncho de esta koza ke, si reushe, va azer de Israel el kuatren pais en el mundo ke va azer alunir una makina sovre la luna. Para mi ke aviya de antes intitolado mi emisyon « Israel a la punta de la teknolojiya », ke magnifika konfirmasyon de mi titolo!

Sovre este haber maraviyozo ke no saviya me vo kedar agora, para aboltar al artikolo del Obs.

Aya la gazetera empesa por avlarmos de la Universidad Ben Gurion del Negev, fundada en Beer Sheva en 1969. Steve Rosen, vise-prezidente por los echos ajenos de la Universidad, konta a la gazetera ke kuando vino komo profesor de arkeolojiya en 1987, aviya 4.800 estudyantes i ocho hanes. Oy, son 20.000 estudyantes i 70 hanes. Ama asigun Rosen, van a fraguar un sigundo kampus i ansina dopyar su asyento. I la armada israelyana tyene sovre un han al lado lo mas de sus aktividades teknolojikas, inkluyendo su unita de syberseguridad.

Esta universidad, yamada la « Stanford del dezyerto » (en referensya a la Stanford University, en los Estados Unidos, en medyo de la Silicon Valley, en California), da a Israel un tyerso de sus injenyeros.

I la gazetera de adjuntar : « Kon mas de 8,5 milyones de moradores – manko de el « Grande Paris ! » – Israel tyene medya dozena de universidades de rango internasyonal: el Technion, la Universidad Ebraika de Yerushalayim, el Instituto Weizmann, la Universidad Bar Ilan, la Universidad de Tel Aviv, i la Universidad Ben Gurion del Negev. Las tres primeras fueron kriadas antes mismo el nasimyento del Estado en 1948, i en todos lugares, asta la lisensya, el ambezamyento se aze en ebreo ».

Jack Ma, el fundador de Ali Baba, el gigante kinezo del komersyo elektroniko, disho : « Lo mas de los paizes enventan para reushir, Israel enventa para sovrebivir ».

Ansina se izo Israel el kampeon mundyal por la parte de su produkto interyor bruto konsagrado a la bushkida i al desvelopamyento (serka de 5%). Por egzemplo, Israel esta en los tres mas grandes del mundo por la intelijensya artifisyala (despues los Estados Unidos i la Kina, paizes de 328 milyones o 1,4 milyarda de moradores, kuando Israel tyene 8,8 milyones). I Israel se topa brilyante en dominyos a la punta komo medikeriya de presizyon, bio-informatika, jenomika, nanoteknolojiya.

I la gazetera adjunta: « Esta ekselensya akademika es antes de todo el fruto de una veluntad politika: los fundos publikos reprezentan 70% del budjeto del ambezamyento superyor, 20% vinyendo de los derechos de inskripsyon, i el kusur de fuentes privadas. Partikolarmente, el poderozo ayudo filantropiko de la diaspora, ke embiya unos 2 milyardas de euros por anyo, sovre todo konsagrados al ambezamyento i a la buskida ».

En la pajina de despues, kon el titolo « Azen el mundo de amanyana », la gazetera mos konta los lavoros de 10 syentifikos israelyanos lavorando en sinko de las sesh universidades ke dishe antes:

En la Universidad de Tel Aviv, fundada en 1956, ay 30.000 estudyantes, 9 fakultades i 130 institutos de bushkida.

Iris Gat Viks estudya aya los mekanismos molekularyos ke pueden dar a entender syertas hazinuras, grasyas a teknikas de jenomika. No kale muncho demandarme kualo esto kyere dizir, povereto de mi. Eya invento un lojisyal para estudyar la fizyolojiya de varyas selulas immunitaryas. En kurto, esto servira puede ser a luchar kontra hazinuras ke oy no savemos kombatir.

Noam Shomron estudya aya tambyen komo andevinar de antes una hazinura i de venserla antes ke se deklare…

En el Instituto syentifiko Weizmann de Rehovot, fundado en 1934, ay 1.500 bushkadores ke obtuvyeron 3 premyos Nobel.

Yardena Samuels estudya aya el ADN de hazinos de kanser, i esto la ayuda a mijor entender kualo azer kontra estos kanseres. Dainda no topo la kura, ma se esta aserkando de topar una kura kontra el kanser de la pyel.

Michal Schwartz, 69 anyos, estudya aya tambyen komo luchar kontra la hazinura de Alzheimer, i ya topo komo kurar ratones de esta hazinura. Devriyan empesar de tratar los umanos fin 2019.

Jonathan Bohbot lavora aya tambyen sovre la nariz de los moshkitos, kapache de goler pudridura en la komida guadrada. De aya se inventan narizes atifisyales ke pueden uzar para munchas kozas.

En el Technion de Haifa, fundado en 1924, ay 14.000 estudyantes, 18 fakultades i departamentos, 60 sentros de bushkida, i obtuvyeron 3 premyos Nobel.

Shie Mannor lavora aya a la intelijensya artifisyala, i komo dize : « La industriya tyene los problemas. Tenemos en vezes las solusyones ».

Mark Silberstein lavora aya tambyen a la sigurita de los ordinadores, i ya topo sistemas para ayudar los fabrikantes kontra las siberatakas.

En la Universidad Ebraika de Yerushalayim, fundada en 1925, ay 23.500 estudyantes, 973 bushkadores, 9.826 patentas, 8 premyos Nobel.

Kobi Nahmias (este es de los muestros) lavora aya a produsir proteinas animalas baratas por kultura selularya.

En la Universidad Ben Gurion del Negev, fundada en 1969, ya savemos ke ay 20.000 estudyantes i 60 sentros de bushkida intyerdisiplinarya.

Yael Edan lavora aya komo direktrisa del departamento de injenyeriya industriala. Inventaron un robot kapache de kojer las pipirushkas, o una makina para espandir los pestisidos ekonomizandolos a 60% sin ke el ombre tenga de tokar el produkto.

Bracha Shapira lavora aya tambyen a la sibersigurita, lo ke puede servir de protejar pacemakers, arabas otonomas o imprimaderas 3D.

Ya entenditesh ke la gazetera no puediya peshkuzar a kada uno de los miles de bushkadores del pais. Tomo estos diez para amostrar komo lavora en dominyos diferentes kada uno, i todos aunidos azen la fuersa de Israel.

Despues muestra gazetera Dominique Nora eskapa su artikolo kon una entrevista kon Daniel Zajfman, prezidente del Instituto syentifiko Weizmann de Rehovot .

Kuestyon: Kualo es el instituto Weizmann?

Repuesta: No egziste una manera universala de azer bushkida, i esto es muy byen. Weizmann aze bushkida fundamentala en byokimiya, byolojiya, kimika, fizika, matematika i informatika…sin preokuparse de tener pishin un uzo praktiko. Muestro motor, es antes de todo la kuryozidad! Aprovamos de entender lo ke se topa delantre de mozotros, de rezolver kuestyones syentifikas importantes. I es este lavoro de fundo ke permite despues de topar solusyones a syertos grandes problemas de la umanidad. Ansina izyeron los Amerikanos, i salyeron despues los ornos a micro-ondas o el transistor.

Kuestyon: Asigun kuales kriteryos eskojesh vuestros bushkadores?

Repuesta: La unika regla es de topar djente de muy alto nivel, ke izyeron sus prevas afuera del pais. Deven antes de todo ser kuryozos, apasyonados, inventores, multidisiplinaryos. Lo ke me interesa no es lo ke bushkan, ma kualos son. Kyero ver luz en sus ojos! Una vez engajados, les damos los medyos de desvelopar sus suenyo. Muestros bushkadores tyenen una kompleta libertad akademika: Weizmann fragua un laboratoryo i instrumentos alrededor de eyos. Ama obtendran un lavoro permanente solo si alkansan la ekselensya.

Kuestyon: No vos preokupash de las posibilidades komersyales de sus lavoros?

No, no azemos bushkida aplikada. Portanto tenemos uno de los mas ermozos portofolyos de patentas del mundo. Porke kuando se arrepushan las fronteras de la konosensya syentifika, se avre el kamino verso deskuvyertas teknolojikas ke revolusyonan la medikeriya, la farmasiya, la ekolojiya, la agrikultura, la industriya. No fundamos direktamente dinguna enterpriza, no metemos paras en las ke aprovechan muestras deskuvyertas. Ama komersyalizamos muestras patentas: 40% de las royalties van a los bushkadores, i 60% al Instituto.

Kuestyon: Esto vos enrikese bastante?

Repuesta: A lo largo, si; la vendita kumulada de todos los produktos i servisyos venidos de los lavores del Instituto alkansa 35 milyardas de dolares en 2017, inkluyendo un milyarda de dolares kon syete medikamentos. El egzemplo lo mas famozo es el Copaxone kontra la skleroza de Teva, inventado aki por el ekipo de Michael Sela, Ruth Arnon i Dvora Teitelbaum. El mas resyente es el Tookad de Steba Biotech kontra el kanser de la prostata, fruto del mesklamyento de muestros estudyos sovre la fotosinteza de las plantas i las terapiyas por laser.

Kuestyon: De kuanto sosh ayudados por el Estado de Israel?

Repuesta: Muestro budjeto de funksyonamyento – 480 milyones de euros por anyo – es kovyerto solo a 25% por el governo, kontra 70 a 80% para las grandes universidades del pais. 35% de muestras entradas vyenen de muestro propyo fundo de investimyento (4 milyares de dolares, alimentado por las royalties i la filantropiya) 25% vyenen de kontratos publikos internasyonales, obtenidos por muestros ekipos sovre kompetisyon. I los 15% del kusur vyenen de donasyones privadas o de kontratos de bushkida direktos kon la industria.

Kuestyon: Los finansyamyentos industriales no tyenen influensa sovre vuestros lavoros?

Repuesta: No mos deshamos nunka diktar lo ke tenemos de azer. Aze poko refuzimos 100 milyones de dolares del governo de Singapour, ke keriya impozarmos un programa de bushkida. Weizmann kyere guadrar su manera de lavorar, sin por lo tanto kedarmos en una torre. Mustro Instituto Davidson para la Edukasyon syentifika desvelopo 70 programas, ke resiven kada anyo 350.000 mansevos. Muestros bushkadores van tambyen de manera abitual dar konferensyas de vulgarizasyon en los bares de Tel aviv.

Ansina se eskapa el bastante largo artikolo de Dominique Nora en el Obs.

Por dizir la vedra, no es tanto el uzo de esta gazeta de syedra de avlar en byen de Israel. En jeneral, kuando se avla de Israel en el Obs (komo en la gazeta Le Monde), es para kritikar el governo de Netanyahu i la armada de Israel. Un poko komo la Unesco, ke se okupa de kultura i save solo kondenar a Israel, un pais ke aze mas por la kultura ke todos en djuntos los paizes ke lo kondenan (inkluyendo la Fransya).

Ama, komo diziya Lenin, « los faktos son inachis ». A poko a poko, el Estado de Israel, un graniko de polvo sovre la karta del mundo, manko de 0,1% de la povlasyon mundyala, se esta azyendo un pais ke djuga un rolo mas i mas importante en los dominyos de la syensya i de la kultura, afillu si esto no plaze a la Unesco, i veremos en avril si reushe de ser el kuatren en el mundo para meter una makina sovre la luna.

Agora tengo de desharvos sovre esta aftaha, dizyendovos: al djueves ke vyene, si kyere el Dyo !

Edmond Cohen
Paris, Fransya

[Orijen: www.esefarad.com]