Lo tèma de la novèla edicion de l’Universitat de la Vinha al Vin d’aqueste divendres 9 de novembre, a l’Airòl Cultural de Ferrals de las Corbièras, serà: “Del local a l’internacional, cossí identificar los vins de Lengadòc?”
Lo Lengadòc viticòla en introspeccion
La cavilha obrièra de la manifestacion, Nadina
Franjus-Adenós, pausa las questions seguentas: “Entre la pèça e la region,
quina es la bona escala per identificar un vin? Quins son los denominators
comuns e cossí los transformar en comunicacion? Per prene còrs, lo collectiu deu aver la volontat
d’existir e de trabalhar amassa, amb una origina e de tòcas comunas. Las
individualitats devon èsser reconegudas e constituir un motiu permanent
d’evolucion. L’identitat d’un collectiu se bastís mai que mai sus son istòria
dins l’Istòria, la consciéncia que n’a e sa capacitat de transmission.
L’identitat de Lengadòc pòrta encara de valors contradictòrias entre qualitat e
quantitat, mas dispausa d’una poténcia gaire comuna. Cossí se fa la reputacion
d’una region viticòla? Se pòt cambiar? Quinas particularitats per Lengadòc? A
quina escala (territoriala) identificar un vin? Un tuc? Una AOC? La region? Que
serà lo Lengadòc de deman? L’Universitat pausarà totas aquelas questions en s’apiejant
a l’encòp sus las experiéncias positivas d’autras encontradas viticòlas e sus
una introspeccion de Lengadòc.”
Al programa de la jornada
La jornada se dobrirà sus un agach istoric amb los
exemples de Borgonha e de Champanha, puèi del rosat
dels Ricey (que se tastarà) e una presentacion dels libres en
relacion amb lo tèma de la jornada.
En fin de matinada, serà question del jòc entre local e
internacional: “Cossí se singularizar dins lo grand concèrt (la granda
cacofonia?) de la mondializacion?”
Se passarà a taula (20 èuros sus reservacion: www.universitevignevin.fr) aprèp
lo tradicional moment de la cronica occitana e aperitiva.
De ser, a la represa, se parlarà de marqueting abans una
granda taula redonda: “Que fa la singularitat de Lengadòc?”.
Una
discussion “AOC/IGP, meteissa identitat” clavarà la jornada ritmada per la
difusion de cinc vidèos Volèm dire al país d’entrevistas de
vinhairons que balhan lor vejaire sul tèma de la jornada.
Los
actes de la jornada se trapan puèi sul sit de l’Universitat. De notar que los
actes de 2014 a 2016 son tanben estat editats sus papièr en collaboracion amb
las edicions L’Harmattan: L’origine
fait-elle vendre le vin ? (2014); Communiquer autrement,
le vin dans l’imaginaire (2015); Soif de nature (2016).
L’Universitat
de la Vinha al Vin es totjorn una brava jornada d’escambis e de rescontres per
tota persona que, per una rason o una autra, s’interèssa al vin e a son ròtle
dins la societat occitana.
Alan Roch
Ne saber mai: www.universitevignevin.fr
[Poblejat dins www.jornalet.com]
Sem comentários:
Enviar um comentário