El kayentamiento global

Por Yehuda Hatsvi

En el jurnal de oy meldi un reporatje bien triste i preokupante sovre el kayentamiento global.

Los sientifikos pronostikan ke ay un grande miedo ke este trokamiento severo en la klima va kavzar muchos anyos de sekera/sikia.

Entre los desastres ekolojikos predikables en las proksimas dekadas, podemas kontar (segun una investigasion en la Universidad de California, Irvine) los danyos en la rekolta de la sevada.

Estos danyos pueden duplikar los presios de la bira/serveza, siendo ke la sevada es un ingrediente importante en la produksion de este beveraje popular.

(Bueno. de mi para mi kije riyirme en meldando un paragrafo largo i detalyado yeno de miedo i preokupasion sovre los presios de la bira. Ma, me deteni: esta no es la situasion apropiada para shakas).

Por enmientres, el presio de la sevada, (o arpa, un biervo ke entro a muestra lingua del turko), es bien barato en komparizon a los presios del presijiozo trigo.

Esto me aze akodrar del refran sefaradi:

“Kien se aze de si sevada¹, se lo komen los patos”.

Yehuda Hatsvi
Israel

————————————————

¹ “Ke kijo dizir “azerse sevada”?

– En el Midrash Raba Bamidbar topamos eskrito: “Tres regalos konsedio el Santo-Bendicho-El a Yisrael: piadozos, averguensozos/timidos, i bienfezentes”.

Me parese ke en muchas kazas de sefaradim, esta deklarasion fue una baza del dotrino ke aviamos resivido en muesta chikez.

Ma, en la vida praktika, este komportamiento sensible i bueno, mos impide a vezes reushir i lograr de muchas maneras. La djente no siempre apresian a los timidos i umildes.

Aki viene el refran sefaradi para giarmos a kompotarmos de manera proporsional. Atansion:
Ken se aze en si SEVADA, se lo komen los patos.

(La sevada/arpa es un tipo de severa muy simple, “umilde”, no tan apresiado. La arina de la sevada tiene un sovrenombre de “pan de povreza”. I ansi, en konsekuensia, su presio es barato, i se merka en pokas paras).

[Orijen: www.esefarad.com ]