quarta-feira, 14 de junho de 2017

Se parla en catalan al Parlament Europèu a causa de la desobesissença de qualques deputats

E mai s’al començament se volguèt enebir l’emplec de la sòrre de nòstra lenga, los deputats se quilhèron davant aquela decision e contunhèron, en tot revendicar lo 25n anniversari de la Carta Europèa de Lengas Regionalas e Minoritàrias
Qualques eurodeputats catalans e valencians s’exprimiguèron diluns passat en catalan  al Parlament Europèu, e mai se o lor permetèron pas. Lor desobesissença lingüistica revendicava lo 25n anniversari de la Carta Europèa de las Lengas Regionalas o Minorizadas (CELROM).
 
Comencèt lo deputat independent Francesc Gambús. Lo vicepresident de l’èurocambra remarquèt que la traduccion simultanèa foncionava pas e li demandèt se parlava catalan. Puèi l’avertiguèt qu’aviá pas drech d’utilizar aquela lenga car lo reglament de la cambra permet solament de far servir una de las 24 lengas oficialas. Totun, Gambús contunhèt en catalan. En seguida de son intervencion o faguèron tanben qualques deputats catalans e valencians. Puèi un elegit basco e una elegida galèga parlèron tanben en lors lengas. Totes defendèron lo drech d’emplegar lor lenga mairala e revendiquèron la CELROM, que diluns complissiá 25 ans.
 
L’iniciativa foguèt promoguda per l’eurodeputat catalana Josep Maria Terricabras, que l’aviá prepausada prèviament a Antonio Tajani, president de la cambra, e que foguèt aprovada per Markus Warasin, lo conselhièr de Tajani per quant a las lengas e als ciutadans. Ça que la, l’espanhòl Diego Canga, qu’es lo cap del gabinet de Tajani, refusèt aquela iniciativa.
 
Confondut per l’insisténcia dels eurodeputats per parlar en catalan, lo vicepresident de l’èurocambra lor permetèt d’emplegar lors lengas, e mai se los avertiguèt que serián pas interpretadas ni traduchas.
 
De fach, segon lo reglament del Parlament Europèu, en cas qu’un eurodeputat se vòlga exprimir en una lenga non oficiala, la poirà parlar mas sens èsser traduch. E atal se passèt diluns.
 
 

 


 
 
 

[Poblejat dins www.jornalet.com]

Nenhum comentário:

Postar um comentário