domingo, 11 de dezembro de 2016

Se publica uèi Resisténcia, lo darrièr album de Goulamas’K

Lo combat antijacobin, antifaissista e antiracista de la còla de Puègserguièr se manifèsta mai que mai dins aqueste nòu disc

Se publica uèi lo darrièr album de Goulamas’K, la banda de musica ska e ròck de Puègserguièr (Besierés). Entitolat Resisténcia, lo nòu disc es ara disponible sus totas las plataformas numericas (spotify, deezer, iTunes, etc...) e tanben dins la botiga en linha del grop.


Esperit de fèsta e de revendicacions

Coneguts per la qualitat de lor musica e mai que mai de lors espectacles en dirècte, Goulamas’k ofrís totjorn dins Resisténcia una tièra de tèmas engatjats al servici d’Occitània e de l’umanitat dins lor “ròck acolorit e bolegant” fruch de la mescla de totas las musicas (ròck, ska, farandòla, punk, flamenco, hard-ròck...) amb l’influéncia, mai que mai, del solelh del país. Lo resultat es aquel esperit de fèsta e de revendicacions amb lo que Goulamas’k desliura una musica a l’energia devastatritz e contagiosa.


Lo drama dels refugiats

Lo combat antijacobin, antifaissista e antiracista de la còla de Puègserguièr se manifèsta mai que mai dins aqueste nòu album, notadament dins lo videoclip Las larmas [lagremas] dels mòrts, una cançon en anglés e francés sul drama dels refugiats, e de tota la sofrença a l’entorn del conflicte de l’Orient Mejan. “Los descendents dels refugiats que sèm, podiam pas que reagir fàcia a aquelas orrors”, çò dison a la fin del vidèo.

18n anniversari

Goulamas’K festejarà en 2017 son 18n anniversari, amb mai de 600 concèrts e 6 albums autoproduches.



[Poblejat dins www.jornalet.com] 

 

Nenhum comentário:

Postar um comentário