Catalonha: espelís amb un succès enòrme una campanha per aculhir de migrants e refugiats

Fruch d’un grop de volontaris que se coneguèron dins los camps de refugiats, la campanha ten mai de 15 000 sostens e cèrca de mobilizar la societat e d’interpelar l’administracion

An lançat en Catalonha una campanha per l’aculhença dels migrants e dels refugiats apelada “Casa nostra, casa vòstra” (cò nòstre, çò vòstre). Fruch d’un grop de volontaris que se coneguèron dins los camps de refugiats: “Pauc a cha pauc jonguèrem de complicitats de fòrça personas que volián donar una responsa a la nomenada «crisi migratòria» que viu la Mediterranèa”, çò dison. La campanha espeliguèt amb lo sosten de tres cents ciutadans, associacions e societats e ara ja ten lo sosten de mai de 15 000 personas.

La tòca es de sensibilizar los ciutadans, de los mobilizar e de far una crida a las institucions catalanas per que donen una responsa mai neta e clara al problèma dels refugiats. An previst una tièra d’iniciativas, dont un concèrt multitudinari a Barcelona l’11 de febrièr e una manifestacion lo 18 de febrièr.

Al vidèo promocional participan d’actors, de cantors, d’escrivans e de jornalistas fòrça coneguts, e tanben qualques refugiats, e delà los rets socials, lo sostenon qualques mèdias.

[Poblejat dins www.jornalet.com]