Tolosa: an retirat los drapèls occitan e catalan d’un pupitre ont deviá parlar la ministra de l’Educacion Nacionala

Los drapèls poirián “excitar las tensions regionalistas” e “irritar los montpelhierencs”, çò dison

Darrièr lo pupitre ont se faguèt lo
discors i aviá los drapèls francés e
europèu, mas los drapèls occitan e
catalan, qu’èran previstes, foguèron retirats
© L. Dubois / France 3

Dimars passat, la ministra de l’Educacion Nacionala (vòl dire estatala) vesitèt los locals del licèu Pèire de Fermat de Tolosa. Darrièr lo pupitre d’ont faguèt son discors i aviá los drapèls francés e europèu. Los drapèls occitan e catalan, qu’èran previstes, foguèron retirats pel servici del protocòl del Conselh Regional, segon çò que rapòrta Le blog politique de France 3.

Abans d'escondre las bandièras dins una veitura administrativa de la region pargada davant l’establiment, l’agent del protocòl auriá dich: “Amagatz aqueles drapèls occitans e catalans que pòdon excitar las tensions regionalistas”, en tot nuançar que “cal pas irritar los montpelhierencs”. Una rason que comprenèm pas mas, segon nòstres confraires de France 3, cercava d’“irritar pas los montpelhierencs de la còla de la presidenta de la region”.

Los drapèls occitan e catalan
foguèron amagats dins una veitura
administrativa de la region pargada
davant l’establiment
© L. Dubois / France 3

France 3 de Miègjorn-Pirenèus ne parlèt amb Laurent Blondiau, ancian pròche de Georges Frêche, qu’ara es lo director del gabinet de Carole Delga a la region. “Es lo protocòl republican, quand l’estat parla, es lo drapèl francés e lo drapèl europèu. En revenge, suls nòstres sits e suls nòstres bastiments, i a los quatre drapèls. Comprés lo drapèl catalan”, çò diguèt Blondiau.

De son costat, un naut foncionari nuancèt quicòm mai: “Existís pas d’elements juridics que sus l’abandieratge dels bastiments. Res suls discorses. Es un afar de practica. Cal pr’aquò que la bandièra francesa siá al centre e la bandièra europèa a sa drecha”.

[Poblejat dins www.jornalet.com]