Los arqueològs chilens denóncian lo Rali Dakar per damatges grèus

La nacion kolla planh que la corsa escarnisca sos dreches collectius

Lo Collègi dels Arqueològs de Chile a denonciat de grèus damatges sul patrimòni arqueologic a causa del Rali Dakar. Segon la vicepresidenta de l’organisme, Paola González, l’espròva esportiva a destruch qualques geoglifes e una part del Camin de l’Inca. “Lo Rali Dakar es una ondada de destruccion segon lo ponch de vista patrimonial e arqueologic, calculam qu’aperaquí 250 sits documentats son estats destruches, es coma se nos destruguèsson de milièrs e milièrs de libres d’istòria preïspanica”, çò diguèt González.

Ja dempuèi 2012 lo Collègi dels Arqueològs demanda qu’aquel eveniment siá somés a un estudi d’avaloracion d’impacte environamental e que s’analise lo trajècte de la corsa, en considerant que los luòcs per ont passa son de monuments nacionals. Mas los arqueològs comprenon pas la posicion de l’estat, qu’en mai de protegir pas lo patrimòni arqueologic, fornís de ressorsas per l’organizacion de l’eveniment dins lo país.

Per contra, l’Eqüator refusèt categoricament la sollicitud de l’entrepresa organizaira de la corsa, Amaury Sport Organisation (ASO), de far passar la corsa per lo país, après analisar los damatges que los veïculs concurrents an provocat en Chile, Bolívia e Peró.

De grops socials antiDakar son de mai en mai nombroses, e denóncian de damatges als animals, a l’environament e quitament als pòbles originaris. 

Protèsta de la nacion kolla

De personas de la nacion kolla, un pòble originari d’America que viu entre los estats argentin, bolivian e chilen, an enviat una letra dobèrta ont denóncian la manca de respècte e de violacions dels dreches collectius de part de l’organizacion del Rali Dakar e dels govèrns. Los kollas denóncian que s’es pas consultat las comunautats, e mai se o exigís la constitucion de Chile. Al delà, reclaman en aquela letra que las autoridats, institucions e entrepresas responsablas fagan un rapòrt en detalh sus l’impacte environamental, l’investiment, lo circuit oficial e los objectius de l’eveniment.

  

[Poblejat dins www.jornalet.com]