La Generalitat de Catalonha declararà l’an 2019 coma “An Robèrt Lafont”

La ministra catalana de la cultura lo definiguèt coma “er activista qu’avie clar que lengua e construccion sociala e politica e democratica anàven dera man”

La Generalitat de Catalonha declararà l’an 2019
coma “An Robèrt Lafont” a l’ocasion del desen
anniversari de sa mòrt. O anoncièt dimars passat
la ministra de la cultura de Catalonha, Laura Borràs,
dins l’encastre de la remesa del prèmi Robèrt Lafont

La Generalitat de Catalonha declararà l’an 2019 coma “An Robèrt Lafont” a l’ocasion del desen anniversari de sa mòrt. O anoncièt dimars passat la ministra de la cultura de Catalonha, Laura Borràs, dins l’encastre de la remesa dels prèmis Pompeu Fabra e Robèrt Lafont.

 

Dins son parladís, Borràs empleguèt la lenga occitana per anonciar l’eveniment: “Er an que ven, donc, harà dètz ans que l’avèm pas damb nosati, e ei per aquerò qu’è er onor e eth plaser de vos anonciar qu’eth govèrn catalan dedicarà er an 2019 tanben a Robèrt Lafont”. Un òme que, segon la ministra catalana, foguèt “er activista qu’avie clar que lengua e construccion sociala e politica e democratica anàven dera man”.

 

A respècte de l’occitan, Borràs ramentèt qu’es lenga oficiala dins tot lo Principat dempuèi 2006, qu’es “l’autra lenga pròpria de Catalonha” e qu’”es amb aquel esperit de libertat e, a l’encòp, de defensa arcarnassida de [lors] doas lengas pròprias que fa ara dètz ans lo govèrn catalan [aviá creat] lo prèmi Robèrt Lafont”.

 

Per saber amb quins eveniments e accions se concretizarà aquela annada consagrada a Lafont, esperam de contactar lèu l’administracion catalana per assabentar los legeires.

 

Robèrt Lafont es considerat coma una de las pus grandas figuras istoricas de l’occitanisme.  Foguèt un intellectual occitan e pus particularament un lingüista, un escrivan, un istorian, un especialista de la literatura e un teorician politic.

 

Èra maridat amb l’escrivana, traductritz e ensenhaira italiana Fausta Garavini.

 

Per ne saber mai recomandam de legir:

 

— Lenga e nacion: la pensada dinamica de Robèrt Lafont (I) e (II) de Domergue Sumien

— “Non coneissi degun qu’aja pres la relèva de Robèrt”, entrevista de Fausta Garavini facha per Marçal Girbau.

  

[Poblejat dins www.jornalet.com]