Es previst que l’òbra comprenga dètz volums; serà completament acabada dins dètz o dotze ans
Es paregut lo primièr volum d’una Istòria de la cosina catalana e occitana consagrat a las salsas, als aperitius, a las ensaladas e a las sopas. Es previst que l’òbra comprenga dètz volums, que siá completament acabada dins dètz o dotze ans. “Costarà una vida entièra, mas soi una persona fòrça pacienta”, çò a dich l’autor, Vicent Marqués, a Jornalet.
Marqués es cosinièr e escrivan, e nasquèt a Valéncia en 1950. A publicat de romans e de libres de cosina tradicionala. Fa aperaquí quaranta ans que comencèt la recèrca de donadas per escriure aquesta istòria de la cosina catalana e occitana que son primièr volum ven de sortir.
Aqueste primièr libre ten 200 monografias e mai de 300 recèptas qu'explican, d'un latz, cossí podèm aprestar los plats, e de l'autre ne fornís un percors istoric, filologic, literari e cultural.
L’òbra cèrca de sarrar del legeire çò de melhor de la cosina populara d’Occitània e dels Païses Catalans. Malgrat que siá publicada en catalan, Jornalet publica cada doas setmanas en occitan qualques unas de las melhoras recèptas de la cosina occitana, en ne fasent un pauc l’istòria.
Bon apetís!
MARQUÉS, Vicent. Història de la cuina catalana i occitana. Edicions Sidillà, 2018. 918 paginas. 39 èuros.
[Poblejat dins www.jornalet.com]
Sem comentários:
Enviar um comentário