Georg Kremnitz es lo laureat del 5n prèmi Robèrt Lafont

Instituit per la Generalitat de Catalonha, lo guierdon a per tòca de reconéisser de personas o d’entitats que se sián distinguidas per la defensa, la projeccion e la promocion de la lenga occitana

Lo lingüista alemand, Georg Kremnitz, es guierdonat del 5n prèmi Robèrt Lafont que l’autreja la Generalitat de Catalonha. Lo prèmi reconeis de personas que se son distinguidas per la defensa, la projeccion e la promocion de la lenga occitana.
 
Kremnitz es professor retirat de filologia romanica a l’Universitat de Viena e a consagrat sa vida a l’estudi e la promocion de la lenga occitana. La jurada del prèmi a soslinhat “son especiala devocion a la recèrca istorica e sociolingüistica de la lenga occitana, que compren tot son airal lingüistic, e tanben sa participacion a d’iniciativas d’encoratjament e projeccion de l’occitan, mai que mai dins l’encastre academic e universitari, mas tanben dins los encastres associatiu e de dinamizacion lingüistica”. Foguèt president de l’Associacion Internacionala d’Estudis Occitans (AIEO) entre 1993 e 2005, fa partida de l’Associacion dels Romanistas Alemands, es membre correspondent de l’Institut d’Estudis Catalans dempuèi 2014 e es tanben sòci del Felibritge.
 
Demest sas òbras podèm soslinhar Versuche zur Kodifierung des Okzitanischen (Ensag de codificacion de l’occitan) en 1974, Das Okzitanische (L’occitan) en 1981, Histoire sociale des langues de France (Istòria sociala de las lengas de França) en 2013, Frankreichs Sprachen (Lengas de França) en 2015, e Katalanische und okzitanische Renaissance. Ein Vergleich von 1800 bis heute (Renaissença catalana e occitana. Una comparason de 1800 fins a uèi) en 2016.
 
Lo prèmi Robèrt Lafont, instituit per la Generalitat de Catalonha en 2010, a per tòca de reconéisser de personas o d’entitats que se sián distinguidas per la defensa, la projeccion e la promocion de la lenga occitana. Ongan es la cinquena edicion del prèmi. Los laureats de las autras annadas son estats Pèire Bèc, Felip Gardy, Jacme Taupiac e la Fondacion Musèu Etnologic de la Val d’Aran.
 
La jurada de l’edicion 2018 compren la directritz generala de la Politica Lingüistica, Ester Franquesa; lo director dels Servicis Territorials de la Cultura a Lhèida, Josep Borrell; lo Sindic d’Aran, Carlos Barrera, e lo president de l’Institut d’Estudis Araneses-Acadèmia Aranesa de la Lenga occitana, Jusèp Loís Sans, e lo responsable de l’encorajment de l’occitan a la Direccion Generala de la Politica Lingüistica, Xavier Moral.
 
La remesa del guierdon se farà dimars que ven dins lo Teatre Nacional de Catalonha, dins una ceremònia conjoncha amb los prèmis Pompeu Fabra.

 

 

[Poblejat dins www.jornalet.com]