Lo maltés se ten fòrt dins l'encastre de la familha
e dels amics del temps que l'anglés es preferit per legir de libres o
publicar suls rets socials
Lo maltés es la lenga parlada a l’ostal de manièra
mai frequenta pel 79% dels malteses, mentre que l’anglés es en segonda
posicion amb lo 18,6%. Son de donadas d’un sondatge del jornal Malta Today,
que revèla tanben que, al trabalh, lo maltés es parlat mai sovent pel
50,6%, del temps que l’anglés arriba al 38,4%. Gaireben lo 10% afirma
que parla sovent las doas lengas al trabalh. Per edats, se percep una
tendéncia descreissenta del maltés demest los qu’an mens de 50 ans, e
mai s’entre los 18 e los 35 ans se detècta una leugièra recuperacion.
La lenga pròpia del país es fòrça prevalenta coma lenga mai emplegada
amb los amics a totas las edats, mas per contra l’anglés a un nivèl
d’acceptacion naut per de foncions coma la lectura de libres e jornals o
l’escritura de nòtas suls rets socials.
Lo maltés a gaireben 483 000 parlants dins lo Mond, segon Ethnologue,
dont 403 000 son a Malta. Es lenga cooficiala dins aquela pichona
republica mediterranèa, amb l’anglés, e es tanben una de las lengas
oficialas de l’Union Europèa.
Aquesta nòva es adaptada de Nationalia, amb qui Jornalet ten un acòrdi de cooperacion.
[Imatge: Frank Vincentz - poblejat dins www.jornalet.com]
Sem comentários:
Enviar um comentário