Euròpa fàcia a son dever
Un grop d’expèrts internacionals en drech, dont lo jurista francés Jean-Paul Costa —ex-president de la Cort Europèa dels Dreches Umans— e lo bèlga François Tulkens, èx-jutge d’aquela meteissa cort, an escrich un rapòrt qu’avalora las accions del govèrn espanhòl contra lo movement independentista catalan tocant la proporcionalitat de las mesuras e lor compatibilitat amb lo drech internacional. Wolfgang Kaleck, un nomenat avocat penal e fondador del Centre Europèu pels Dreches Constitucionals e Umans (ECCHR) a Berlin, e membre d’aquel grop d’expèrts, explica al Junge Welt perqué aquelas questions son importantas: "Dins lo cas catalan lo debat vira totjorn a l'entorn de la legalitat o non-legalitat d’una secession, mas una granda part de las mesuras de l’estat espanhòl qu’avèm analisadas s’apliquèron fòrça abans la declaracion d’independéncia. Caldriá que i aguèsse mai de diferenciacion juridica".
A la demanda d’Esquèrra Republicana de Catalonha (ÈRC), los expèrts an estudiat d'un ponch de vista purament juridic las mesuras del Tribunal Constitucional espanhòl contra lo trabalh dels deputats del Parlament de Catalonha e lor persecucion penala, que l'an patida entre 2013 e 2017. An trobat de violacions grèvas de la legalitat e de la separacion dels poders. Lo fach que lo Tribunal Constitucional pòsca determinar çò que se pòt debatre e votar al Parlament de Catalonha e lo fach que se perseguisca juridicament e penalament los deputats catalans per "desobesissença" son "una ataca frontala contra de dreches fondamentals coma la libertat d’opinion e de reünion", segon los juristas. "Se ieu preni la paraula coma politician, jornalista o militant per l'independéncia de Catalonha, e dins d'articles de premsa, de manifestacions, de reünions o quitament una resolucion politica, aquò pòt pas èsser punible", çò a declarat Kaleck.
Los expèrts an tanben estimat desproporcionat que se detenga de membres del govèrn e l'imposicion de multas de fins a 12 000 èuros per jorn per aver preparat lo referendum del 1r d'octòbre, o que se perseguisca judiciàriament qualques politicians catalans per aver organizat la consulta populara non constrenhenta del 9 de novembre de 2014. Es justament per aquela darrièra rason que se declarèt inelegible pendent dos ans l’ancian president de la Generalitat, Artur Mas, e que foguèt condemnat a pagar una multa milionària. Segon los juristas, aquelas mesuras son illegalas, perque d’organizar un referendum o una consulta populara es pas una infraccion penala en drech espanhòl. Ansin, creson qu'es particularament preocupant que lo Tribunal Constitucional se base sus sas resolucions pròprias coma fondament legal per la persecucion juridica dels elegits, mai que mai s'aqueles delictes existisson pas dins lo còde penal espanhòl. Per tant, concluson que lo Tribunal Constitucional "pren un ròtle politic e legislatiu qu’a per tòca de manténer Espanha unida", çò indica lo rapòrt. "Es una violacion manifèsta de la separacion de poders".
Fins a 900 ciutadans e politicians catalans son actualament perseguits per Espanha per lor sosten non violent a l'independéncia de lor país. Anna Gabriel, anciana deputada d’esquèrra (CUP), a fugit en Soïssa perque espèra pas un procès equitable en Espanha. L'avocat britanic Ben Emmerson a portat a l'ÒNU l'encarceracion de plusors meses d'elegits e d'activistas.
Ça que la, Kaleck considèra que las corts internacionalas son tròp fastigosas. Estant donada la necessitat de parlar de centenats de violacions comesas per l'estat espanhòl, los estats e las institucions de l'UE devon agir: "Lo govèrn espanhòl pòt pas pretendre d'agir en nom de l'Union Europèa del temps qu'ignòra sas nòrmas juricas minimalas. Considèri qu'es lo dever de las institucions europèas de defendre lo respècte dels dreches fondamentals europèus".
Krystyna Schreiber
[Article original publicat en alemand sus Junge Welt - Vilaweb ne publica una adaptacion catalana de Laura Noguera. L'adaptacion occitana l'a facha Jornalet a partir de l'original alemand en consultant tanben la version catalana - imatge: Reuters / Albert Gea - poblejat dins www.jornalet.com]
Sem comentários:
Enviar um comentário