Mai de 180 intellectuals sostenon Catalonha e demandan de defendre l’estat de drech dins l’UE

De politics, intellectuals e elegits d’Euròpa e dels Estats Units an mandat una letra al president del Conselh Europèu, Donald Tusk, e al de la Comission Europèa, Jean-Claude Juncker, en s’inquietant de la situacion politica en Catalonha e del daissar-far europèu. Per eles s’agís d’una “violacion de l’estat de drech”. 

Mai de 180 universitaris politics, intellectuals e elegits d’Euròpa e dels Estats Units an mandat una letra al president del Conselh Europèu, Donald Tusk, e al de la Comission Europèa, Jean-Claude Juncker, en s’inquietant de la situacion politica en Catalonha e del daissar-far europèu, fàcia a “la faiçon dont las autoritats espanhòlas an respondut a las demandas d’independéncia exprimidas per una partida significativa de la populacion de Catalonha”. Per eles se tracta d’una “violacion de l’estat de drech”.

 

Los signataris de la letra especifican que lo Tribunal Constitucional espanhòl a mancat als principis constitucionals de la libertat de reünion e d’expression, e remembran que “dins los jorns que precedissián lo referendum, las autoritats espanhòlas prenguèron una sèria de mesuras repressivas contra de foncionaris, de deputats, de cònsols màgers, de mèdias, d’entrepresas e de ciutadans.”

 

A prepaus de la jornada del referendum, dison que “la polícia espanhòla empleguèt una fòrça excessiva e la violéncia contra de votaires e de manifestants pacifics, segon Human Richts Watch”. En mai d’aquò, mençonan las encarceracions dels presidents de las associacions independentistas, Jordi Cuixart e de Jordi Sànchez, e ne soslinhan qu’es un abús judiciari de los acusar de “sedicion” car exerciguèron “lo libre drech de manifestar publicament e pacificament segon l’article 21 de la constitucion espanhòla”. Lo govèrn legitim de Catalonha èra pas encara en preson lo jorn qu’escriguèron la letra.

 

Enfin, concluson que “lo govèrn espanhòl, dins son esfòrç de salvagardar la sobeiranetat de l’estat e l’indivisibilitat de la nacion, a violat los dreches e las libertats fondamentalas garentidas per la Convencion Europèa dels Dreches de l’Òme, per la Declaracion Universala dels Dreches Umans, ansin coma pels articles 2 e 6 de la lei fondamentala de l’UE”, çò es lo Tractat de Lisbona. Dins aquel sens afirman que “lo silenci de l’UE e son refús d’imaginar una mediacion son injustificables”.

 

En consequéncia, apèlan lo Conselh d’Euròpa e la Comission “a far tot çò necessari per restablir lo principi de l’estat de drech dins son estatut fondador d’una democracia europèa en s’opausant a tota forma d’abús de poder comesa per los estats membres. Sens aquò, e sens un seriós esfòrç de mediacion politica, l’UE risca de pèrdre la confiança e l’obesissença de sos ciutadans a sas leis”.

[Poblejat dins www.jornalet.com]