Lo mètro de Nàpols, un musèu sosterranh d’art contemporanèu

Las estacions contenon mai de dos cents òbras d’art

Una bilheta simpla de mètro a Nàpols còsta 1,30 èuro, mas lo prètz compren la vesita d’un musèu amb d’òbras d’arquitèctes, d’artistas e de dessenhaires coneguts de tot lo Mond. Lo fach mai estonant es que, per vesitar aquel musèu, cal pas sortir del ret metropolitan. Las “estacions de l’art”, amb mai de dos cents òbras, s’inscrivon dins un long plan de desvolopament del transpòrt public dins la vila, per ensajar d’evitar los abituals taps de transit.

A l’ora d’ara i a quinze “estacions de l’art” dins las linhas 1 e 6 del mètro de Nàpols. L’estacion de Toledo es estada seleccionada pel jornal anglés The Daily Telegraph coma una de las mai polidas d’Euròpa tota. Es venguda una extension de la Mar Mediterranèa, òbra de l’artista catalan Òscar Tusquets Blanca, e atanben del napolitan Achille Cevoli, del sud-african William Kentridge e del texan Robert Wilson.

L’iniciativa artistica del mètro napolitan comencèt en l’an 2000 e las estacions que mòstran d’art son de mai en mai nombrosas. Aquesta setmana dobriràn la setzena estacion de l’art, jos la Plaça Garibaldi. E d’aicí a 2015, se’n dobrirà doas de mai a las estacions de Duomo e Municipio.

[Image: Òscar Tusquets - poblejat dins www.jornalet.com]