La familha Le Pen vendèt de disques prònazis e antisemitas

Una societat familhala dirigida per Marie-Caroline Le Pen, amb Marine Le Pen coma accionària, reeditèt de discorses antisemitas e de cants nazis  

Escrich per Jòrdi Ràfols 

Dins los ans 1990, Marie-Caroline Le Pen dirigissiá la Sèrp —non pas lo reptil mas l’acronim de “Societat d’Estudis e de Relacions Publicas”—, un ostal d’edicion musicala que reeditava de discorses collaboracionistas e de cants nazis. Sa sòrre Marine figurava tanben demest los accionaris.

La Sèrp, fondada en 1963 per Jean-Marie Le Pen, comercializèt pendent mantun decenni d’enregistraments ligats a l’extrèma drecha radicala. Segon una enquista publicada dins Libération, sa filha màger, Marie-Caroline Le Pen, perseguiguèt aquela activitat après aver pres la direccion de l’entrepresa en 1992.

Lo catalòg èra long. Compreniá de discorses antisemitas de Philippe Henriot, ministre de l’informacion e de la propaganda del regim de Pétain, de cants de la Wehrmacht (las fòrças armadas de l’Alemanha nazi) e de la Waffen-SS (la branca militara de l’SS), aital coma d’entretens amb Léon Degrelle, ancian collaborador bèlga del regim nazi e amic personal de Jean-Marie Le Pen. Demest sas publicacions tanben figuravan de tèxtes del poèta antijosieu e collaboracionista Robert Brasillach, qu’escriguèt dins lo jornal d’extrèma drecha Je suis partout.

L’istorian Jonathan Thomas, dins son libre sus la Sèrp publicada en l’an 2000 (La propagande par le disque), disiá: «Es pas solament de nazisme, es tanben lo faissisme, lo reialisme o de tèxtes negacionistas». Las pochetas presentavan sovent aqueles documents coma de testimoniatges istorics, sens vertadièra mesa a distància de lor contengut ideologic.

Los documents consultats per Libération mòstran d’autre caire que Marie-Caroline Le Pen possedissiá gaireben un tèrç del cabal de la societat, mentre que los sòrres Marine e Yann Le Pen ne detenián caduna un 8%. La Sèrp assegurèt la comunicacion audiovisuala del Front Nacional, amb un contracte d’exclusivitat.

La societat cessèt sas activitats lo 30 de març de 2000, mentre que Marie-Caroline Le Pen n’èra encara la gerenta. La liquidacion judiciària foguèt prononciada en octòbre de 2008.

La remembrança d’aqueles faches es importanta del temps que Mediapart a revelat los devises antisemitas de Jordan Bardella, ça que la trionfalament reelegit a la presidéncia del Recampament Nacional. 

[Sorsa: www.jornalet.com]