Bardella dins l’uèlh del ciclòn

De messatges atribuits al president de l’RN revèlan de prepauses antisemitas e complotistas tenguts quand èra encara un jove militant del Front Nacional 

Escrich per Jòrdi Ràfols 

De conversacions privadas datant de 2013, publicadas diluns pel jornal en linha Mediapart e atribuidas a Jordan Bardella, an revelat de prepauses antisemitas e complotistas que lo president del Recampament Nacional (RN) nèga aver tenguts. Pasmens, Mediapart afirma aver autentificat de faiçon independenta aquelas discussions, ara destapadas.

Demest los prepauses atribuits a Bardella figuran d’afirmacions segon las qualas «las bancas son totas detengudas per de josieus» o qu’un «Novèl Òrdre Mondial dominat per Israèl» seriá a s’impausar. Mediapart a mostrat tanben de referéncias elogiosas a de personalitats antisemitas controversiadas: l’assagista Alain Soral e l’actor Dieudonné.

Lo president de l’RN a desmentit èsser l’autor d’aqueles messatges, que qualifica de «falses grossièrs». Son avocat a anonciat lo depaus d’una denóncia en justícia per difamacion contra lo jornal.

La polemica es especialament interessanta se pensam qu’esposca lo president d’un partit qu’ensaja de menar dempuèi mantuna annada una estrategia de «desdiabolizacion», destinada a rompre amb qualques posicions e declaracions associadas a l’istòria de l’ancian Front Nacional, e la figura de Jean-Marie Le Pen. Bardella el meteis s’es dempuèi afirmat coma un adversari de l’antisemitisme e participèt, en març de 2025 a Jerusalèm, a una conferéncia internacionala consagrada a la lucha contra l’antisemitisme.

Per Yonathan Arfi, president del Conselh Representatiu de las Institucions Josievas de França (CRIF), aquelas revelacions constituisson, se son averadas, «una illustracion dels limits de la desdiabolizacion del RN». Estima que la violéncia dels prepauses atribuits a Bardella poiriá pas èsser explicada per son edat jove. Lo president de l’RN, nascut en setembre de 1995, èra encara menor al moment dels faches.

 

[Imatge: Adrien Pittore/Sipa Press - sorsa: www.jornalet.com]