Bretanha: una campanha per encoratjar los adultes a aprene lo breton

Mai de 20 000 personas aprenon ja la lenga e un milion e mièg ne voldrián far aitant, segon l’Ofici Public de la Lenga Bretona

Lo director de l’ofici, Fulup Jakez, e son president, lo deputat Paul Molac, ne presentèron lo visual lo 15 de setembre.

Escrich per  Ferriòl Macip 

L’Ofici Public de la Lenga Bretona (OPLB) a aviada una campanha novèla de promocion per encoratjar los adultes a aprene lo breton. Ongan, l’organisme presenta l’aprendissatge de la lenga coma un biais de crear de ligams. Lo director de l’ofici, Fulup Jakez, e son president, lo deputat Paul Molac, ne presentèron lo visual lo 15 de setembre al Club de la Premsa de Roazhon pendent una conferéncia de premsa que tanben raportèt las darrièras chifras de l’aprendissatge del breton a l’edat adulta. 

La demanda es fòrta: segon l’enquista sociolingüistica realizada en 2024, un milion e mièg de personas voldrián aprene lo breton. Uèi, mai de 20 000 personas l’aprenon ja, gràcias a las formacions longas, als corses setmanièrs e a la plataforma en linha Desketa. 

La campanha foguèt concebuda en collaboracion amb l’escòla MJM Graphic Design e es portada per mai de 200 collectivitats. Pendent uèch setmanas, espandiguèron un milièr d’afichas dins los abrics de bus de tota Bretanha, e 4000 de mai jos d’autres formats. Tanben i a 10 000 fulhetons als ponches d’aculhença dels luòcs publics e associatius, e 5000 papieròts dins los comèrcis. Totes indican ont e cossí aprene lo breton. 

L’ofèrta es variada. De formacions longas de sièis o nòu meses se fan dins quinze vilas bretonas. A la fin del percors, los aprenents pòdon passar lo diplòma de competéncia en lenga (DCL). Los corses setmanièrs, eles, se fan dins gaireben 150 luòcs e forman en mejana 3200 personas per an. Ongan, i a nòu ofèrtas d’aprendissatge novèlas. 

En mai d’aquò, la plataforma gratuita en linha Desketa, aviadada per l’OPLB fa dos ans, ten ara unes 26 000 comptes actius. Pel 75% d’aqueles utilizaires, es lor primièr contacte amb l’aprendissatge del breton. 

Quant a l’occitan, i a una demanda importanta

Per çò qu’es de l’occitan, l’Ofici Public de la Lenga Occitana (OPLO) publica pas de chifras globala equivalenta suls adultes qu’aprenon la lenga. Pasmens, si que publica una analisi de l’enquista sociolingüistica qu’aquel organisme menèt en 2020 dins las doas regions occidentalas del país e Val d’Aran, e que mòstra una demanda importanta. Lo percentatge d’abitants que vòlon aprene o perfeccionar l’occitan oscilla del 8% en Bordalés al 17% dins las Lanas e en Roergue, e de las 8679 personas en Losera fins a 79 941 en Erau. Las donadas suls aprendisses reals son espargidas entre los organismes que fan de corses, coma l’Institut d’Estudis Occitans (IEO) o los Centres de Formacion Professionala Occitans (CFPO). 

De soslinhar qu’aquela enquista mostrava que mai del 90% d’abitants de l’oèst d’Occitània volián de politicas lingüisticas per l’occitan e l’81% dels sondats volián l’ensenhament e la lenga a l’escòla, de la mairala al licèu. L’enquista pertocava pas las regions de Provença e d’Auvèrnhe-Ròse-Alps ni las Valadas. 

 

[Sorsa: www.jornalet.com]