O reintegrado é galego: un xulgado de Pontevedra recoñece os mesmos dereitos lingüísticos á norma reintegracionista

O Centro Social A Pedreira recorrera a súa exclusión dun programa de subvencións da Deputación de Pontevedra. 

Xulgados de Pontevedra

O Xulgado do Contencioso-Administrativo nº 3 de Pontevedra vén de ditar unha sentenza oral firme a favor do Centro Social A Pedreira de Pontevedra, nun litixio contra a Deputación Provincial pola denegación dunha axuda do programa 'Culturea'. A resolución, que non admite recurso nin apelación, dá a razón á entidade demandante e obriga a institución provincial a conceder a subvención que lle fora retirada, así como a facerse cargo dos custos do proceso.

A Deputación de Pontevedra excluíra o centro social das axudas do programa 'Culturea' por "usar e defender sistematicamente a norma reintegracionista da lingua galega", destacaron desde o colectivo. A Pedreira denunciou desde o principio que a decisión non tiña carácter "técnico nin administrativo", senón que se trataba dunha cuestión "política" excluír esta normativa do galego.

Durante o procedemento xudicial interviu como especialista Elias Torres, catedrático da área de filoloxía galega e portuguesa da Universidade de Santiago de Compostela (USC), quen defendeu a "plena lexitimidade académica e social" da norma reintegracionista, que agora a Xustiza recoñece en igualdade coa norma do ILG-RAG para concorrer a este tipo de subvencións.

O Centro Social A Pedreira celebra esta sentenza como "unha vitoria para a lingua galega e para a cultura de base" e reivindica a denuncia pública como a "ferramenta central para non nos condenaren a ser estranxeiros na propia Terra, e para abrir espazos ao galego e á súa visión internacional".

[Foto: Wikimedia Commons - fonte: www.nosdiario.gal]