De
milièrs d’ensenhaires se mobilizan en Catalonha, al País Valencian e dins las
Balearas contra la degradacion de l’escòla publica, la precarizacion de las
condicions de trabalh e las tensions creissentas a l’entorn de la question
lingüistica
Escrich per Jòrdi Ràfols
Los sistèmas educatius
dels Païses Catalans travèrsan actualament un periòde de fòrta conflictualitat.
En Catalonha, al País Valencian e dins las illas Balearas, de milièrs d’ensenhaires
se mobilizan per denonciar la degradacion de l’escòla publica, la precarizacion
de las condicions de trabalh e la manca de mejans dins los establiments
escolars.
Los ensenhaires
insistisson sul fach que las protèstas respondon pas unicament a de revendicacions
salarialas, mas tanben a la volontat de defendre un modèl educatiu public,
accessible e enrasigat dins la lenga del país.
Catalonha: colèra sociala e regèt de las reformas educativas
En Catalonha, los
sindicats USTEC, CGT, Intersindical e Professors de Segondària an convocat
mantuna jornada de cauma e de mobilizacion contra las politicas del departament
de l’educacion del govèrn catalan (Partit dels Socialistas de Catalonha). Los
ensenhaires denóncian de classas subrecargadas, un excès de burocracia, la
manca de personal e de condicions salarialas insufisentas. Critican tanben los
acòrdis concluses entre lo govèrn e los sindicats majoritaris CCOO e UGT (mas
fòrça minoritaris dins lo sector educatiu catalan), qu’una partida importanta
del còrs ensenhaire considèra alonhats de las revendicacions realas de las
escòlas primàrias e segondàrias.
Las mobilizacions en
Catalonha son tanben estadas marcadas per una polemica plan comentada après la
revelacion de l’infiltracion de doas agents dels Mòssis d’Esquadra (la polícia
regionala catalana) dins una amassada de trabalhadors del Consòrci de
l’Educacion e de Barcelonés organizada al licèu Pau Claris de Barcelona. Segon
los sindicats USTEC, CGT e Intersindical, las doas policièras participavan a
las reünions jos una falsa identitat e foguèron reconegudas per d’ensenhaires
que las avián ja vistas pendent de manifestacions. Après èsser estadas
interpeladas per mantun participant, fin finala quitèron l’amassada. L’afar
suscitèt una viva indignacion dins lo sector educatiu, ont se denoncièt coma un
atac a la libertat sindicala e al drech de cauma.
País Valencian: defensa de l’escòla publica e del valencian
Al País Valencian, lo
conflicte ten tanben una dimension politica e lingüistica plan marcada. Las
organizacions a l’origina de la mobilizacion denóncian las politicas educativas
menadas pel govèrn valencian entre las mans de PP e de Vox, sustot
l’organizacion novèla del modèl lingüistic escolar qu’introdutz un mai grand
pes de la «liura causida» de la lenga veïculara per las familhas, çò que poiriá
reduire la preséncia efectiva del valencian dins cèrts centres. Critican tanben
la diminucion del ròtle estructurant d’ensenhament en valencian dins mantun
nivèl e la flexibilitat acrescuda daissada a las escòlas dins l’aplicacion dels
programas lingüistics. En mai de reclamar de melhoraments salarials e mai
d’investiments publics, de nombroses ensenhaires afirman qu’aquela mobilizacion
constituís tanben una defensa de l’ensenhament en catalan e del modèl d’escòla
publica valenciana.
La manifestacion
massissa organizada pels ensenhaires a Valéncia lo 15 de mai passat foguèt
presentada per fòrça observaires coma un avertiment seriós adreiçat al govèrn
de Juanfran Pérez Llorca. Dins un contèxt ja marcat per una
societat fòrça tocada e tibada pels aigats catastrofics de 2024, los sindicats insistisson sul fach
que lo conflicte despassa d’ara enlà las solas revendicacions salarialas e
miralha un malaise mai prigond dins l’escòla publica valenciana. L’amplor de la
mobilizacion, qualificada d’istorica amb 35 000 manifestants, metèt en
evidéncia la capacitat del sector educatiu a s’organizar contra las politicas
del govèrn valencian, dins un contèxt de tensions creissentas a l’entorn de la
question lingüistica, de las condicions de trabalh e del finançament dels
establiments publics.
Illas Balearas: crisi del lotjament e penúria d’ensenhaires
Dins las Illas Balearas,
lo malaise del sector s’explica sustot per la manca d’ensenhaires e per las
dificultats creissentas per provesir los pòstes, sustot en causa del còst del
lotjament. Los sindicats alèrtan sul fach que de nombroses professors pòdon pas
pus assumir lo còst de la vida dins las illas, una situacion qu’accentua la
precaritat del sistèma educatiu.
D’autre caire, las
politicas lingüisticas del govèrn balear de drecha espanholista (PP amb lo
sosten de Vox) e la situacion del catalan dins las escòlas e los licèus balears
suscitan tanben de prigondas inquietuds, mai que mai la remesa en question del
modèl d’immersion en catalan dins l’ensenhament e l’alargament de la causida de
la lenga veïculara dins cèrts establiments, çò que poiriá entraïnar una
reduccion de la preséncia efectiva del catalan dins las classas. Aquelas
mesuras, aital coma los debats sus las exigéncias lingüisticas dins lo sistèma
educatiu e dins la foncion publica, alimentan las tensions a l’entorn de la
plaça de la lenga dins l’escòla publica a las illas Balearas.
[Sorsa: www.jornalet.com]
Sem comentários:
Enviar um comentário