Alemanha vèrs una societat de guèrra

De copaduras dins las pensions e allocacions e la santat per aumentar lo rearmament

Escrich per Ferriòl Macip

En Alemanha, lo govèrn de coalicion de conservators e socialdemocratas dirigit per Friedrich Merz a anonciat un important plan de reduccion de la despesa sociala, estimat segon qualques mèdias a mai de 38 miliards d’euros d’aicí a 2030. La tòca es de far d’estalvis dins los servicis socials per aumentar lo budget militar dins un contèxt de tensions geopoliticas en Euròpa.

Las mesuras pertòcan particularament lo sistèma de pensions e d’allocacions e la santat. Segon lo cancelièr federal, la pension publica a de venir una «cobertura basica», sens garentir lo nivèl de vida. Una virada que fòrça observaires considèran coma lo desmantelament mai important de l’estat-providéncia dempuèi las reformas de Gerhard Schröder dins los ans 2000.

Aquesta evolucion es simbolicament tras que significativa: foguèt justament un autre dirigent alemand, Otto von Bismarck, que pausèt las basas dels sistèmas modèrnes de proteccion sociala al sègle XIX.

Segon qualques analistas, la causida d’Alemanha —un país amb un deute public a l’entorn del 60% del PIB— manda un messatge clar a la rèsta d’Euròpa: lo finançament simultanèu de l’estat social e del rearmament ven cada còp mai malaisit. Lo debat sus la sostenibilitat del deute public e las prioritats budgetàrias es ara al còr de las politicas europèas.

Parallèlament, lo país accelèra son esfòrç militar. Alemanha prevei de fòrça augmentar los efectius de la Bundeswehr e d’investir de centenas de miliards d’èuros dins la defensa.

Una lei recenta, adoptada dins lo contèxt de la guèrra en Ucraïna, prevei tanben de mesuras administrativas pertocant los òmes entre 17 e 45 ans, qu’auràn de besonh d’un permés per abandonar lo país mai de tres meses, çò qu’a suscitat d’inquietuds dins una societat marcada per una tradicion pacifista dempoèi la desfacha del nazisme.

S’Euròpa se prepara a una guèrra?

E mai lo servici militar demòre oficialament volontari, aquela tièra de decisions nos obliga de nos pausar una question mai larga: s’Euròpa se prepara a un conflicte mai vast? Demest las copaduras socialas e lo rearmament, lo modèl europèu es a l’ora d’una mudacion prigonda. E fòrça ciutadans començan de se demandar s’aquel cambiament se farà al prètz de la seguretat sociala conquistada dempuèi mai d’un sègle.

[Sorsa: www.jornalet.com]