Los deputats, especialament de las drechas, refusan lo debat sus la peticion, mentre que d’opausants denóncian un caval de Tròia contra las libertats
La proposicion de lei, depausada per la deputada Yadan del partit de drecha macronista Renaissença, alarga especialament l’infraccion de preconizacion del terrorisme e crèa una novèla infraccion d’incitacion a la destruccion d’un estat.
Escrich per Ferriòl MacipLa comission de las leis de l’Assemblada Nacionala francesa decidiguèt ièr dimècres, 15 d’abril, d'archivar la peticion «Non a la lei Yadan», qu’aviá recampat mai de 700 000 signaturas. Aquela peticion demandava lo retirament de la proposicion de lei portada per la deputada macronista Caroline Yadan, que vòl «luchar contra las formas renoveladas d’antisemitisme».
Malgrat l’enòrme sosten popular, los deputats an refusat d’organizar un debat especific sus la peticion. L'archivatge lo demandèt al començament de la sesilha lo deputat macronista Pierre Cazeneuve, raportaire de la comission de las leis, en afirmant que la lei seriá ja examinada dirèctament dins l’emicicle, jutjant inutil de «far un debat sus un debat». De fach, a partir de uèi la proposicions de lei es examinada.
Aquel refús foguèt validat per 30 vòtes contra 21. D’autres deputats insistiguèron sul fach que la Constitucion francesa reconeissiá pas cap de mecanisme de «vèto ciutadan» capable d’arrestar un procès legislatiu.
Pasmens, fòrça voses criticas s’exprimisson a l’entorn d’aquela proposicion de lei. D’associacions de defensa dels dreches umans, de sindicats e de collectius militants denóncian un tèxt que poiriá anar fòrça mai delà la lucha contra l’antisemitisme. Segon eles, la lei risca d’èsser utilizada coma un caval de Tròia de l’autoritarisme, permetent de reprimir de vejaires en favor de la patz, d’una alta al fuòc en Gaza o de la defensa dels dreches del pòble palestinian.
D’aquelas organizacions, qualques unas avertisson d'una possibla instrumentalizacion de la lucha contra l’antisemitisme per limitar la libertat d’expression e criminalizar de movements militants, en particular aqueles ligats al movement BDS o a la solidaritat internacionalista.
Per contra, d’autres denóncian una lectura «desformada» de la lei e defendon un tèxt necessari per luchar contra l’asirança antisemita.
La proposicion de lei, depausada per la deputada Yadan del partit de drecha macronista Renaissença, alarga especialament l’infraccion de preconizacion del terrorisme e crèa una novèla infraccion d’incitacion a la destruccion d’un estat. Sos critics lo veson coma un tèxt «destruseire de la libertat» que «confla» la critica d’Israèl amb lo delicte de glorificacion del terrorisme.
Sem comentários:
Enviar um comentário