La fin de l’autonomia de Rojava

Jos la pression de l’armada siriana e de la mediacion internacionala, los curds accèptan de cedir lo contraròtle de lors institucions e territòris, mentre que Damasc lor reconeis enfin lenga, cultura e ciutadanatge

Dempuèi la casuda de Bashshar Al Assad a la fin de 2024, Siria travèrsa una fasa novèla de recomposicion politica e territoriala. Un dels dorsièrs mai sensibles concernís los curds del nòrd e del nòrd-èst del país, qu’avián profechat de la guèrra civila per instaurar una administracion autonòma de fach, apiejada sus las Fòrças Democraticas Sirianas (FDS), una aliança de milícias curdas.

Après de meses de negociacions infruchosas, aquestas darrièras setmanas èra montada la tension. L’armada siriana aviá lançat una ofensiva contra las posicions curdas, sustot a l’entorn d’Alèp e dins las regions orientalas, provocant de combats e lo desplaçament de milièrs de civils. Jos la pression militara e amb la mediacion de la coalicion internacionala dirigida pels Estats Units, las FDS  avián fin finala anonciat lor retirament a l’èst d’Eufrates.

Es dins aquel contèxt de confrontacion que lo president sirian Abu Muhammad Al Julani a signat un decret istoric, çò rapòrta Le Monde. Pel primièr còp dempuèi l’independéncia del país en 1946, l’estat sirian reconeisserà los dreches nacionals dels curds. La lenga curda vendrà «lenga nacionala» e poirà èsser ensenhada dins las escòlas, lo Newroz (lo cap d’an curd) serà proclamat jorn de fèsta oficial, e la nacionalitat siriana poirà èstre restituida a de desenas de milièrs de curds que ne foguèron privats dempuèi un recensament controversiat en 1962.

Pauc apuèi, Damasc e las FDS an conclús un acòrdi global que met fin als afrontaments. Segon Reuters, aqueste prevei l’integracion de las institucions civilas e militaras curdas dins l’estat sirian. Los combatents de las FDS seràn incorporats individualament dins las fòrças de seguretat, mentre que los camps petrolièrs, los barratges, las pòstas-frontièras e las presons passaràn jos contraròtle governamental.

Se lo poder sirian presenta aquel acòrdi coma un pas cap a l’unitat nacionala, los responsables curds soslinhan que marca tanben la fin d’una autonomia carament aquerida. La question centrala demòra d’ara enlà la de l’aplicacion reala dels dreches promeses e de la plaça que los curds ocuparàn dins la Siria de l’aprèp-guèrra.

[Imatge: Delil Souleiman - sorsa: www.jornalet.com]