Assange denóncia lo Nobel de la patz atribuit a Maria Corina Machado

Lo fondador de WikiLeaks acusa la fondacion Nobel d’aver transformat un prèmi de la patz en instrument politic e demanda la suspension de la dotacion acordada a Maria Corina Machado

Julian Assange, lo fondador de WikiLeaks, a facha sa denóncia contra la fondacion Nobel après l'atribucion del prèmi Nobel de la patz 2025 a l'opausanta veneçolana Maria Corina Machado, çò rapòrta Radio France Internationale. Aquela decision, segon Assange, traís l'esperit meteis del prèmi tal coma es definit dins lo testament d'Alfred Nobel, que privilègia la fraternitat entre las nacions, la reduccion de las armadas e la promocion de la patz.

Assange repròcha a la laureata son sosten politic al president Donald Trump, sustot dins lo contèxt de las accions menadas pels Estats Units contra Veneçuèla. Fa referéncia al desplegament, dempuèi agost, d'una importanta flotilha estatsunidenca en mar Cariba, oficialament destinada a luchar contra lo narcotrafec, mas qu'auriá ja causadas de nombrosas victimas. A sos uèlhs, d‘onorar una personalitat associada a aquelas accions torna legitimar una politica de confrontacion militara.

Afirma aital cossí la dotacion financièra del guierdon (11 milions de coronas suedesas, mai o mens 1 milion d'èuros) poiriá èsser utilizada de faiçon indirècta per facultar de crimes de guèrra, çò que constituiriá, segon el, un desvirament de fonzes a l’esgard del drech suedés. La polícia suedesa a mentretant rebutada la denóncia, estimant que cap d'element justificava pas la dobertura d'una enquista.

María Corina Machado es una figura istorica de l'oposicion mai dura al chavisme. Fondadora del movement Súmate, apara dempuèi d'annadas una linha dobèrtament anticomunista e ostila a tota negociacion amb lo govèrn chavista. Sul plan internacional, entreten de ligams assumits amb de figuras e de movements d'extrèma drecha, sustot Donald Trump e lo partit espanhòl Vox, qu'an publicament saludada son accion. Aquelas alianças ideologicas e politicas alimentan las criticas pertocant la compatibilitat de son trajècte amb las valors de patz e de dialòg associadas al prèmi Nobel.

JULIAN ASSANGE FILES CRIMINAL COMPLAINT AGAINST NOBEL FOUNDATION OVER “INSTRUMENT OF WAR” PEACE PRIZE

WikiLeaks Founder Alleges 2025 Award to María Corina Machado Constitutes Misappropriation, Facilitation of War Crimes Under Swedish Law, Seeks Freeze of 11 million SEK ($1.18… pic.twitter.com/OAH4mmvsph

— WikiLeaks (@wikileaks) December 17, 2025

 

[Imatge: WikiLeaks - sorsa: www.jornalet.com]