Lo movement Unser Land denóncia la decision del rectorat d’Estrasborg de suprimir l’ensenhament de l’alsacian dins los licèus, apelant a la defensa d’aquel patrimòni cultural menaçat
Lo movement autonomista d’Alsàcia Unser Land (Nòstre País) s’es indignat de la decision del rectorat de la circonscripcion escolara (acadèmia) d’Estrasborg de suprimir, tre setembre, l’ensenhament de las lenga e cultura alsacianas dins los licèus, çò rapòrta Vilaweb. Aquela mesura, anonciada per corrièr lo 3 de julhet, sens consulta publica, arribèt après la barradura de las inscripcions escolaras.
Fins ara, l’opcion permetiá d’una a doas oras setmanièras d’ensenhament de la cultura alsaciana. Malgrat los obstacles administratius, demorava presenta dins catòrze establiments e comptava mai de sièis cents escolans. Dempuèi la reforma del bachelierat de 2021, qu’afectèt tanben l’occitan, aqueles corses èran ja marginalizats, perque figuravan pas pus dins los programas ni comptavan pas per l’examen final, entraïnant una casuda del nombre d’inscriches.
Per Unser Land, aquela supression s’inscriu dins una politica de París qu’a per mira d’escafar las lengas minorizadas autoctònas, dont de segur l’occitan, çò podèm precisar. Lo movement acusa los elegits alsacians de passivitat e crida a una reaccion fòrta. Ramenta que la cultura alsaciana es un patrimòni viu de 1500 ans e reclama que l’opcion siá mantenguda dins los licèus pertocats. «Nòstres mainatges an drech de conéisser l’istòria e la cultura de la tèrra ont son nascuts e ont vivon», çò afirman.
D’aicí a 2028, desira son integracion obligatòria dins los programas d’istòria-geografia. Una peticion lançada fa gaire a ja reculhidas mai de 6500 signaturas.
[Sorsa: www.jornalet.com]
Sem comentários:
Enviar um comentário