Kaminando i avlando

 

Prezentado por Süzet FRANSEZ

Kaminando i avlando, es muestra istoria ke rezulta de munchos siglos de katastrofas: la ekspulsion de Espanya, los pogromes, las gerras, el nazismo, el rasizmo, las imigrasiones i otros temas semejantes. Los judios, kon sus istorias se ambezaron a konstruir sus vidas komo la situasion se prezenta. Ganaron una filozofia en pensando lentamente i de una manera pozitiva sin perder el guste de bivir. Puede ser ke esta filozofia les ayudo a rebivir de sus sinizas i a no dezapareser del mundo.

Kaminar, es salir de kaza, de liberarse de sus penserios de kada dia, estar kon si mizmo. Andar tiene un paralelizmo kon la spiritualidad. Se deskuvrio ke los grandes filozofes i pensadores se metian a kaminar para pensar i krear en libertad. Se analizo ke, desde Aristoteles i Platon asta Steve Jobs, hay una relasion entre el kaminar i el pensar.

Aristo, en su guerta, azia filozofia kon sus disiplos kaminando i avlando.

Nietzche afirmo ke “todos los pensamientos grandes se konsiven paseando”. El se alevantava a las sinko de la manyana i lavorava fista midi i despues se iva a azer paseos largos en las montanyas, los Alpes, para pensar i renovar sus ideas.

Kant, el filozofo aleman, salia kada dia a las sinko de la tadre i asta la sesh azia el mizmo kamino i a su retorno a kaza se metia a meldar, a eskrivir i a pensar.

Filozofes i pensadores komo J. J. Rousseau, Montaigne, Thoreau, Gandi salian para kaminar, pensar, konsentrar i tomar desiziones kon kavesa repozada.

Manuel M. Loeches, profesor de norosiensia, eksplika ke “kuando kaminamos, el organizmo entiende ke estamos realizando un egzersizio, i viene mas sangre, oksijen i glukoza al serebro. Esta situasion ayuda a entender i a rezolvar los problemes de manera mas klara i simple.

Se puede dezir ke la istoria del mundo rendio el puevlo judio filozofo i el arte de kerer bivir komo umano respektuozo, se eskrivio en su  jenetika. En kaminando tomas tu oksijen, despues avlas i kontas tus ideas renovadas i en mizmo tiempo, konsantradas oyes kon tus orejas tus palavras.

Oguro ke no perderemos muestra antigua filozofia sefaradi del siglo XVI, ke mos trusho al siglo XXI, i ke oy internasionalmente se dize “STEP by STEP”.

 

[Orijin: www.salom.com.tr]