Los djudyos de Polonya (2)

Keridos amigos:

Mi emisyon de djueves va ser la kontinuasyon i no el kavo de la trajika istorya de los djudyos de Polonya, ama vo kontar tambyen en esta emisyon un dert ke mos vino a mozotros administradores de la asosyasyon Muestros Dezaparesidos, a propozito de una laja ke keremos meter, arriva de la puerta de lo ke fue el kal de los djudyos osmanlis de Paris en la primera parte del siglo 20, una laja ke konte lo ke afito a los poveretos djudyos gregos i otros durante la gerra. Los moradores del han ande esta este kal no kyeren de esta laja porke topan su teksto “demaziya inkriminante” verso la polisiya…Es vedra ke la laja es “inkriminante”. Ama no es muestra kulpa si la polisiya aferro a tantos djudyos kon sus kriaturas. Akodro ke el 4 de novyembre 1942, ay de esto 76 anyos, en medyo de la noche, los djudyos gregos (lo mas selaniklis) de Paris fueron aferrados en kondisyones terrivles, no por los almanes, ma por la polisiya franseza.

Saludes a todos,

Edmond Cohen
Paris – Fransya

——————————————————————————————

LOS DJUDYOS DE POLONYA (2)

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet sea en direkto, el djueves a las 4h06 despues de mediudiya, ora de Fransya, sea kuando se kyere, kale klikar en el sityo de Radio J, i irse sovre las emisyones de despues de medyudiya.

http://www.radioj.fr/node/55

De otra parte, vos akodro ke el proksimo atelye de konversasyon de Vidas Largas se va tener el martes ke vyene 6 de novyembre 2018, en el Centre Communautaire, a las dos i medya (asta las kuatro i medya – sinko).

Oy tengo de kontinuar de avlarvos de la trajika istorya de los djudyos de Polonya, ke empesi el otro djueves. I lo vo azer. Ama komo de toda manera no vo pueder eskapar oy, tengo gana de avlarvos de una difikultad ke tenemos en la asosyasyon Muestros Dezaparesidos, dirijida por Alain de Toledo, i ke tyene por primer eskopo de mantener la memorya de los djudeo-espanyoles de Fransya deportados por los Almanes. La asosyasyon lavora desde unos dyez anyos a un livro memoryal ke, si kyere el Dyo, salira el anyo ke vyene. Es una ovra muy importante, ke va dar la lista de los mas de 5.300 deportados, ama tambyen va dar a konoser los lavoros de munchos istoryanos i istoryanas, los testimonyos de los ke bivyeron esta desgrasya, ke avlara tambyen de los ke muryeron en los kampos fransezes, de los rezistantes, de los fuziyados, de los veluntaryos ajenos, ets.

Ama no es de esto ke vos kyero avlar oy. La asosyasyon kyere tambyen meter muy ofisyalmente una laja sovre la pared del 7 rue Popincourt, en sima de la puerta de lo ke fue tantos anyos el kal, i al empesijo el solo kal de los djudyos osmanlis. Los administradores de la asosyasyon Muestros Dezaparesidos, ke akoje todas las asosyasyones djudeo-espanyolas de Paris, mos metimos de akodro para el teksto de esta laja. Demandimos la otorizasyon de la Mayoriya tan sovre la laja ke sovre su teksto, i la obtuvimos.

Vos kyero dar a konoser kual es este teksto ke va ser en franses, yo vos do su traduksyon en muestra lingua :

« Aki estava el primer kal sefaradi de los djudeo-espanyoles orijinaryos del pasado Imperyo Osmanli. De 1941 a 1944, porke djudyos, mas de 5.300 fueron aferrados, la mayor parte por la polisiya franseza, kompliche del okupante nazi, deportados i despues eksterminados en los kampos de la muerte. Mas de 1.100 moravan en el onzen arrondissement inkluyendo 168 en esta kaye. No los olvidemos nunka ».

Pensavamos ke solo mos mankava de azer la seremoniya kuando la Mayoriya mos ambezo ke el konsilyo sindikal de la kopropriedad del han ande se topa el kal (el kal pertenese al Consistoire, ma solo el kal, no el han entero) no es de akodro para esta laja, syendo ke asigun los myembros del konsilio, su teksto es « demaziya inkriminante » verso la polisiya franseza…

Vos dishe ke teniyamos una difikultad. Esta es. Kualo azer ? Los administradores de Muestros Dezaparesidos vamos a vermos un diya de novyembre para bushkar, i Ishalla topar, una solusyon.

Mozotros, todos los muestros, tenemos el dever de azer konoser a toda la djente ke kaminara por la kaye lo ke pasaron estos poveretos.

Es vedra ke el teksto de la laja es « inkriminante » verso la polisiya. Ama es vedra tambyen ke es la polisiya franseza ke aferrava a los djudyos.

Komo aziya la polisiya?

En 4 diyas estaremos el 4 de novyembre 1942, aniversaryo del aferramyento de los djudyos gregos. Bueno seriya ke los del konsilyo sindikal melden lo ke dishe en mi emisyon del 22 de novyembre 2012. (Lo ke konto es fundado sovre lo ke meldi, yo teniya 5 anyos i no estava aya):

« Esta noche fue una de las mas trajikas ke tuvyeron los djudyos de Paris. Mas de 5.000 pulizes fransezes se echaron komo salvajes en las moradas de los djudyos gregos sorprendidos en medyo del suenyo. Los aferramyentos turan toda la noche, kon gritos, yorros, yamadas por ayudo…ama kyen puediya ayudar ? Unos djudyos kayen lokos. Mujeres paryendo, vyejos hazinos, syegos, son yevados, syertos kon sedyas, al karakol i de aya, poko tyempo despues, al kampo de Drancy.

Golpes, gritos, kavesas rompidas, kon una negrigura salvaje. Djente kaiya para no alevantarse mas. Los goim, espertados por los gritos, miravan  por las ventanas i yoravan de ver en ke hal estavan sus vizinos, las kriaturas aharvadas i yevadas komo behemot, travadas en pijama de la kama, piezes desnudos en la entezador de novyembre.

David Sauleman, ke teniya diez anyos en 1942, eskrivyo kon su mujer Fanny sus rekodros en un livro ke tyene por titolo Deux mètres carrés (dos metros kuadrados, la superfisiya de la tomba ke no tuvyeron sus paryentes). En este livro mos konta lo ke fue para el esta noche de terror, ande fue espertado en supito por la boz de la kapidjiya anunsyando la vijita de la polisiya en su kaza, dos polizes orguyozos i abistrus, ke dyeron solo a su madre i a el unos pokos minutos para vestirse i emburujar unas kuantas kozas. No deshan a su madre ni de tomar de komer, ni mismo de aparejar un biberon para su ermaniko bebiko. Kon la entezador de la noche, estava titireando, sin saver asta oy si era mas del frio o del espanto.

Todos, por la mayoriya mujeres i kriaturas, son yevados al karakol ke se topava muy serka. I David Sauleman mos konta : «  El dezorden provokado por los gritos de los pulizes, las keshas de los viejos ke no yegavan de suvir en los otobuses, los gritos de las madres i los yorros de las kriaturas muertas de sar, por las validjas ke kada djudyo teniya de yevarse, aziyan una meskla de tou vavou i de lokura. »

Mos konta los pulizes « borrachos de krueldad », gritando i aharvando kon punyos i bastones a vyejos i mujeres para azerlos korrer mas presto, las validjas mal serradas avriendosen en medyo de la kaye, la djente en kamiza de noche o en pijamas. Komo dize David Sauleman, estos fransezes no teniyan nada mas de ambezar de los nazis por lo ke es de la krueldad.

Si David mos puede kontar esto oy, es porke su madre, en el momento de suvir en el otobus, metyo su bebiko en los brasos de David ke teniya diez anyos, i los arrepusho en supito verso una puerta de han, salvandoles la vida a los dos ».

Es vedra ke la laja es « inkriminante ». Ama komo no serlo ?

Me kedo aki, vos kontaré komo esto todo va tornar.

I agora abolto a mi istorya de los djudyos polonezes, i komo la semana pasada lavori sovre Wikipedia.

Kuando vos deshi la semana pasada, vos avli de la primera partisyon de la Polonya, ke se tuvo en 1772.

Unos vente anyos mas despues, en 1793, sigunda partisyon de la Polonya, ande la Prusa i la Rusiya toman una parte importante de lo ke kedava de la Unyon Lituaniya-Polonya.

Las kozas no se van a kedar ansina : los Polonezes, yevados por un ombre yamado Kosciuszko, azen una rebuelta kontra los Rusos en 1794, a la kuala partisipa un batayon djudyo yevado por Berel Joselewicz, kon la entisyon de obtener una independensya kontra los Rusos. Ama no reushen, i la tresera i ultima partisyon de la Polonya, en 1795, aze dezapareser lo ke fue la Unyon Polonya-Lituaniya. Estonses, sin moverse, kaji todos los djudyos de lo ke fue la Polonya-Lituaniya katolika se topan estar ande los Rusos ortodoksos.

Kale yene dizir ke del tyempo de Napoleon, uvo entre 1806 i 1815 un Dukado de Varsovia, ama dezaparesyo kon Napoleon.

Esto todo fue la istorya politika de la Republika de la dos Nasyones. Ama Wikipedia nos avla tambyen de la istorya sprirituala de sus djudyos.

I por empesar kale akodrar la importansya de la yeshivot, por egzemplo, las de Cracovia, Poznan i tantas otras en kada komunidad de importansya.

Las primeras basmaanes djudiyas aparesen en el primer kuarto del siglo 16. En 1530 una Tora en ebreo es imprimada en Cracovia i al kavo del siglo las basmaanes djudiyas de Lublin editavan munchos livros, en mayoriya relijyozos.

La edukasyon de los djudyos era la koza de los hahamim, i fundada sovre el estudyo del Talmud, ke rejiya la vida entera del djudyo.

En la primera mitad del siglo 16, el estudyo del Talmud veniya de Bohemia, en partikolar desde la eskola de Jacob Pollak, kriador del pilpul. Despues de el vino en Lublin Shalom Shachna, elevo de Pollak, i fundo una famoza yeshiva. Su ijo se izo tambyen haham en Lublin, i el elevo de Schachna, Moshe Isserles, se izo famozo kuando eskrivyo el komplemento ashkenazi al Shulhan Aruh de Yosef Karo, ke era sefaradi. En Lublin tambyen uvo otro elevo de Shachna, Salomon Luria (ke no ay de konfundir kon el kabalisto Isaac Luria, mas mansevo, ma ke muryo en mismo tyempo ke Salomon).

A propozito de kabalisto, uvo tambyen en estos tyempos kabalistos en Polonya, komo Mordehay Jaffe i Yoel Sirkis.

Toda esta vida relijyoza i intellektuala se derrityo kon las matansinas terrivles de Bogdan Chmielnitsky en 1648, segidas por  el « deluvyo » despues.

Estas matansinas fueron tan terrivles ke los djudyos de Polonya pensaron ke deviyan anunsyar la venida del Mashiah, i munchos fueron los ke pensaron ser eyos mismos este Mashiah. El mas famozo fue Shabetay Tsevi, ke syerto era sefardi, ma kazado kon una lehliya sovrebivyente de estas matansinas. Otro famozo fue Jacob Frank, nasido Leibovicz, ke bivyo en el siglo 18 i se prezento komo syendo el eredero de Shabetaï Tsevi. Tuvo varyos disiplos ; puede ser un diya azeré una émisyon sovre este ombre, afillu si a mi no es tan simpatiko. Se konvirtyo al katolisismo, i sus disiplos tambyen. La sekta frankista finalmente dezaparesyo, sea ke los disiplos aboltaron al djudaismo, sea ke, a la rovez, se dirityeron en el kristyanismo.

De otra parte, en estos tyempos, aparesyo, nasido en 1698, el fundador del movimyento hasidiko, Israel Ben Eliezer yamado el Baal Shem Tov o el Besht. Ya avli de el i del hasidismo en una emisyon ke ize ay unos sesh anyos, el 13 de septyembre 2012, i vos diziya ke ay mas leyendas ke haliz provas istorikas sovre este ombre ke, komo Socrates o Jesus,  no eskrivyo dingun livro – todo lo ke esta eskrito de lo ke ensenyo a sido eskrito por elevos – i por tanto tuvo una influensa muy grande sovre el djudaismo, influensa ke sureo asta oy.

Komo ya lo savesh, los hasidim tyenen una forma partikolara de judaismo, ke todo en syendo ortodokso, kamina mas sovre la Kabala, la devosyon mistika i la alegriya en la orasyon. Oy los erederos de este movimyento son los lubavitch, disiplos de Shneur Zalman de Ladi, o los breslever, disiplos de Rav Nahman de Bratslav.

I komo ya lo savesh tambyen, estos hasidim tuvyeron enemigos ande los hahamim, enemigos yamados mitnagedim, los ke son kontra, el kapo de estos mitnagedim syendo, en el siglo 18, el muy famozo Gaon de Vilna.

Agora aboltaremos a la istorya politika de los djudyos en una Polonya, ke desde 1795, no egziste mas.

Despues de la tresera partisyon no ay mas Polonya, los djudyos de Polonya se topan estar en Rusiya, i esto no es un buen haber. Aki tambyen ya avli de los djudyos de Rusiya en tres emisyones ke ize en marso i avril de este anyo. En la primera de mis emisyones, vos dishe ke los tsares, en el siglo 18, aviya proibido la prezensya de djudyos en Rusiya. Ama kuando, kon las tres espartisyones, tomaron la mas grande parte de la Polonya, la parte este, toparon a 900.000 djudyos ke no aviyan demandado de entrar en Rusiya. Son los Rusos ke entraron en Polonya. Kualo azer ?

(Kuando konti esto, azyendo mi emisyon sovre los djudyos de Rusiya, avri una paranteza dizyendo ke aviya sido la mizma koza en Fransya un siglo antes. En el siglo XVII, no aviya kaji mas djudyos en Fransya, syendo ke la Fransya los aviya todos echados afuera, salvo los de Bayonne i Bordeaux, porke aviyan entrado komo kristyanos, o los de Avignon o Carpentras, porke estas sivdades, pertenesiyendo al papa, no aziyan parte de la Fransya. Ama kuando, en 1648, la Fransya tomo la Alsacia, topo aya unos 20.000 djudyos ke, a mal de su pezar, tuvo de guadrar. Syerro la paranteza).

La tsarina Katerina II dechido de deshar los djudyos ande se topavan, en las tyerras tomadas a la Polonya i yamadas « Tyerras de kolonizasyon » i para los djudyos « zona de rezidensya ». Ama kedo proibido a los djudyos de entrar mas profundo en la Rusiya.

Despues los tsares no saven byen kualo azer : en 1802, el tsar fundo un Komité para el progreso de los djudyos. Ama nunka el tsar acheto las rekomandasyones de este komité kuando estavan favoravles a los djudyos, lo ke de toda manera no era el kavzo de munchas de entre eyas.

La kondisyon de los djudyos se izo mas i mas dura. En los anyos 1820, las leyes kantonalas del tsar Nicolas Iero konservaron la dovle taksasyon de los djudyos, sozde porke no teniyan de azer askerlik, ama en vedra todas las komunidades djudiyas fueron ovligadas de dar a la armada mansevikos ke despues eran konvertidos de fuersa.

En mi emisyon sovre los djudyos de Rusiya, vos konti lo ke sige :

«  Alexandro Iero, en 1803,  permite a syertos djudyos de salir de la zona de rezidensya durante un tyempo limitado. Esto no impide ke, kaji en mizmo tyempo, 200.000 a 300.000 djudyos son echados afuera de sus kazales. Va ser la mizma koza en 1821.

En 1825, el tsar Nicolaï Iero ovliga los djudyos de eskojer entre eyos un numero de ombres ke tendran de azer un askerlik de 25 anyos. Es una koza terrivle de tener de eskojer entre padre i ijo, savyendo ensima ke si se eskoje el ijo, al kavo va ser konvertido al kristyanismo. Los kapos de la komunidad, ke son kargados de este eskojimyento, biven oras pretas, akuzados por la djente djudiya de eskojer para no azer el askerlik a los de la famiya del eskojidor, los rikos o importantes, i para el askerlik van los proves desmazalados ».

Sovre esto vos vo deshar porke ya vino la ora, i el kusur va kedar por el djueves ke vyene si kyere el Dyo !

Edmond Cohen
Paris, Fransya 

[Orijen: www.esefarad.com]