Los djudyos de Polonya (1)

Keridos amigos

La semana pasada, me topi aogado por varyos dertes i belas ke vinyeron todos en djuntos i no me permetyeron de aparejar kualkyera emisyon, i estonses pasaron una redifuzyon. Esta vez pude lavorar (en vedra me ayudi muncho de wikipedia) i apareji una emisyon sovre los djudyos de Polonya (primera parte). Dainda no avli de los pogromes del siglo 19 ni de la shoa. Kon los kozakos de Chmielnitsky en 1648, ya abasta ansina.

Saludes a todos,

Edmond Cohen

Paris – Fransya

—————————————————————————————--------------------------------------------------—

LOS DJUDYOS DE POLONYA (1)

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet sea en direkto, sea kuando se kyere, kale klikar en el sityo de Radio J, i irse sovre las emisyones de despues de medyudiya.

http://www.radioj.fr/node/55

De otra parte, vos akodro ke el proksimo atelye de konversasyon de Vidas Largas se va tener el 6 de novyembre 2018, en el Centre Communautaire, a las dos i medya (asta las kuatro i medya – sinko).

Esto dicho, fui un poko enkantado de aperseverme ke si ize aki unas trenta emisyones sovre la istorya de los djudyos de todas partes del mundo, nunka tuve la idea de azer una emisyon sovre los djudyos de Polonya, ke fueron un tyempo la mitad de los djudyos del mundo entero, asta ser mas de tres milyones de djente, i ke dezaparesyeron en djuntos en los umos de la Shoah. Ni tampoko ize una emisyon sovre los djudyos de los Estados Unidos.

Estos olvidos deven tener razones ke solo el Doktor Freud uvyera topado. Ansina es.

Desharemos oy para otro tyempo los Estados Unidos, ama komo no avlar de los djuyos de Polonya, yo ke me kazi kon la ija de djudyos venidos en Fransya de Polonya i ke avlavan entre eyos solo en yiddish ?

Komo no tengo livros sovre la istorya de los djudyos de Polonya (a parte del tyempo de la Shoah) lo ke vos vo kontar agora, lo travi de Wikipedia (ke no mos manke).

Parese ke los primeros djudyos ayegando en el territoryo de la Polonya de oy vinyeron en el siglo 10. De ande veniyan ? Asigun Wikipedia, « sigyendo los kaminos komersyales verso Kiev i Boukhara, pasaron por la Silesia ». Esto da a pensar ke veniyan del oeste. Indimas ke el primer djudyo ke avle del estado polones i del prinsipe Mieszko Iero es un merkader i diplomato venido de Tortosa en Cartalunya konosido por su nombre arabo de Ibrahim ibn Yakub.

Esto dicho, afillu si no lo dizen en este estudyo de Wikipedia, vos akodro ke al bodre nordoeste de la mar Kaspyana, yamada tambyen mar de los Khazares, kijo dizir entre Kiev i Bukhara, se topava el Estado khazar, estado djudyo destruido por los rus kon la kaida de Sarkel en 965. Se puede pensar estonses ke unos djudyos del imperyo khazar se fuyeron verso el oeste i ayegaron en Polonya. No esto pretendyendo, en dinguna manera, ke los djudyos de Polonya son de orijen khazar, no lo penso del todo, digo solo ke, en los ke vinyeron en el siglo 10, uvo puede ser djudyos khazares.

Asigun lo ke meldi en Wikipedia, la primera vez ke se topa avlado de los djudyos en dokumentos polakos es el siglo 11, ande se avla de la prezensya de djudyos en la sivdad de Gniezno, ke en este tyempo era la kapitala de la Polonya. Por su parte, el savyo djudyo Jehuda haCohen eskrive en 1085 ke ay una komunidad djudiya en la sivdad de Przemysl.

Poko tyempo despues, en 1098 empesa en Evropa oksidentala la primera Kruzada, kon las matansinas de djudyos en todos lugares, ama mas de todos en en teritoryo de la Almanya de oy.

Los djudyos persegidos fuyen i ayegan en Polonya ande los akoje kon amistad el rey Boleslas III. El pais es partajado en dukados ande los djudyos kedan kyetos, azyendo parte de la klasa medyana, entre los aristokrates i los kazalinos. En 1264, Boleslas V, duke de Grande Polonya, firma la Karta dicha de Kalisz ke da a los djudyos el derecho de lavorar, de ir i venir, de azer komersyo, todas kozas proibidas a los kazalinos.

Estos derechos i privilejyos van a ser amejorados por el rey Kazimir el Grande en 1334, kon lo ke fue yamado el Estatuto de Wislica. Estos tyempos van a ser los mijores para los djudyos de Polonya, manera de avlar, porke, komo diziya Einstein, todo es relativo… En los kavos del reyno de este Kazimir el Grande ke se muryo en 1370, los djudyos, kon la pesta negra, fueron komo syempre akuzados, i uvo matansinas de djudyos en Kalisz, Cracovia, Glogow, i otras sivdades serka de la frontera kon los kontados jermanikos. Algunos avlan de 10.000 muertos. Yene, dize Wikipedia, en komparazon kon lo lo ke se pasava en la Evropa oksidentala, la Polonya kedava un « havre de paix » (refujyo de paz) para los djudyos, la preva es ke los djudyos de los paizes almanes veniyan en masa.

Refujyo de paz… El 13 de novyembre 2015, la Fransya konosyo los atentados de Paris ke izyeron 130 muertos. Un « akto de gerra », disho François Hollande, Prezidente de la Republika. « Estamos en gerra », disho Nicolas Sarkozy, el prezidente de antes. Aki avlamos de unos 10.000 muertos, i afillu si el numero no es koza sigura, Wikipedia avla de « refujyo de paz »… El 11 de septyembre 2001, uvo, kon los kuatro avyones i los hanes destruidos, manko de 4.000 muertos. Aki avlamos de unos 10.000 muertos…

Mismo esta paz muy relativa no va turar. Hedwige, ija del rey de Ungariya i elijida por los aristokrates polonezes para reynar sovre la Polonya en tanto ke rex, rey, i no regina (reyna), se kaza en 1386 kon Ladislas II Jagellon, Gran duke de Lituaniya, lo ke va aunir Polonya i Lituaniya, i muere en 1399, lo ke aze de Jagellon el solo rey de Polonya i Lituaniya. I van a empesar persekusyones kontra los djudyos. (Vos akodro ke ocho anyos antes de la muerte de Hedwige, en 1391, se pasaron en Espanya terrivles matansinas de djudyos, i ke en Fransya, los pokos djudyos ke, despues de la ekspulsyon de Philippe le Bel en 1306, aviyan sido permetidos de aboltar en 1360 por Charles V el Savyo, fueron de muevo echados a fuera en 1395 por Charles VI el Loko. Negra epoka para los djudyos de Evropa).

Wikipedia no mos dize kualo fueron estas persekusyones en Polonya, sino ke, a poko a poko, los derechos de los djudyos se aflochan i les son travados, i esto va surear asta la yegada al poder, en 1506, del rey Zygmunt Iero el Vyejo, ke va akojer los desmazalados djudyos echados de Espanya 14 anyos antes, en 1492, ama tambyen de Austria, de Bohema, de Almanya, ets. La Polonya se aze el refujyo de estos todos desmazalados djudyos. La politika tolerante del rey se va kontinuar kon su suksesor Zygmunt II el Augusto, rey de 1548 asta 1572.

A la muerte de este rey, sin desendensya, los aristokrates (szlachta en polones) de Polonya i Lituaniya se arrekojen en Varsovya en 1573 i establesen lo ke se va yamar « la Republika de las dos Nasyones », ke en vedra no tyene muncho de ver kon lo ke entendemos por republika, syendo ke el kapo de esta republika es un rey. Ma es un rey elijido, no por el puevlo, kale dizir, ma por los solos aristokrates. Es una republika aristokratika.

El primer rey elijido de la dicha Republika de las Dos Nasyones va ser, ansina fue, el rey de Fransya Henri III, ke va kedar rey solo de 1573 a 1575. Poka djente se akodra ke la Polonya tuvo una vez un rey de Fransya ….

Si el rey ke vino despues, Etienne Bathory, se amostro amigo de los djudyos, la povlasyon, eya, se izo mas i mas antisemit.

Ama yene, asigun Wikipedia, los djudyos ke eran 18.000 en Polonya verso la fin de la Edad Medya (0,6% de la povlasyon) pasaron a 150.000 a la mitad del siglo 16 (2% de la povlasyon) i a 300.000 al empesijo del siglo 17 (3% de la povlasyon).

Esto dicho, el antisemitismo del kual vos avli no fue nada en komparazon kon lo ke afito en 1648, kon la rebuelta kontra el estado polones de los kozakos del este de la Polonya, agora la Ukranya, yevados por Bogdan Chmielnitsky. Los Polonezes fueron akuzados por Chmielnitsky de tener « vendido la Ukranya a los djudyos ». Los istoryanos se pelean para saver kuantos fueron los djudyos matados. Yo no so istoryano, ama una koza es sigura: los djudyos matados fueron munchas dezenas de miles, puede ser 100.000. I no es solo ke fueron matados, lo fueron en kondisyones terrivles: un djudyo de Zaslav, en Volhynia, ke se yamava Nata Hanover, se fuyo a la yegada de los kozakos i se fue en Italya. Aya, en Venezia, eskrivyo en 1653 el livro de lo ke se pasava en Polonya i ke aviya visto, intitolado Yevan Metsula (Lodo de undinas). Lo ke konta aze pensar, en peor, a los einzazgrupen : manos i pyez kortados, djente eskorchada biva, ets aki me kedo sin meldarvos mas de lo ke eskrivyo, porke despues no podrash mas durmir. I no estamos avlando solo de ombres, ama tambyen de mujeres, de vyejos, de kriaturas. En la sola sivdad de Nemirov, el 16 de junyo 1648, 6.000 djudyos fueron matados por los kozakes de Chmielnitsky. Komo no pensar a los rumanos de Antonescu, ke reusheron de matar a 40.000 djudyos de Odessa en el solo diya del 24 de oktobre 1941.

La diferensya entre Odessa i Nemirov es ke Antonescu, el kapo de los rumanos, fue kondenado i matado en 1946, ama este chiko Hitler de Bogdan Chmielnitsky kedo asta oy en diya konsiderado komo gibor nasyonal en Ukranya. Los ukranyanos metyeron en medyo de la mas grande plasa de Kiev, kapitala de la Ukranya, un monumento a la glorya de este matador, kon ensima su estatua sovre un kavayo.

En 1954, solo mueve anyos despues de la Shoah, la sivdad ukranyana de Proskurov, ande uvo un famozo pogrom en 1919, troko su nombre en Chmielnitsky, i este nombre kedo asta oy. En 1989, a los kavos de la URSS, la posta salyo un pul kon la imajen del monumento a Chmielnitsky.

Afillu si agora la Ukranya tyene un primo ministro djudyo, Volodimir Hroïsman, el kulto a Chmielnitsky no troko i su monumento es dainda en su lugar. Por esto me teniya enkantado, kuando apareji mi emisyon del 6 marso 2014 sovre los djudyos de Ukranya, de meldar ke la sivdad israelyana de Karmiel, en el Galil, se « buchuko » (jumeler en fransez, twin town en ingles) kon la sivdad ukranyana de…Chmielnistsky. Yo, personalmente, uvyera eskojido otra sivdad, ama no moro en Karmiel de modo ke dinguno me demando mi avizo. Agora me fui de muevo a ver, i no topi mas este « buchukajo ». Kyen save ? Puede ser el meoyo les vino a los de Karmiel ?

No kale malorozamente pensar ke las matansinas se eskaparon al kavo de 1648. Kontinuaron kuando Carlos X, rey de Sueda, atako la Polonya en 1655, i fue la invazyon ke los polakos yamaron el « Deluvyo ». Los desmazalados djudyos de Polonya se toparon entre dos fuegos : los ke no eran tokados por los suedanos eran atakados por los polakos komo amigos de los enemigos. En mas de las orrores de la gerra, uvo epidemiyas ke mataron, esta vez, no solo a los djudyos, ama a los djudyos tambyen.

Esto dicho, asta 1698, asigun Wikipedia, los reyes de Polonya kedan byen dispozados verso los djudyos, a la kontra de los aristokrates i de la Iglesya. Esto va trokar kon la yegada al poder de la dynastiya de Saxe. En 1697 es el Elektor de Saxe, Frederico Augusto ke renyega el protestantismo i ke es elijido rey de Polonya. Lo va kedar asta 1733 kon una interrupsyon de sinko anyos, entre 1704 i 1709, ande el rey va ser Stalislas Leszczynski, muy konosido de los fransezes porke va dar su ija Marie Leszczynska komo mujer para el rey de Fransya Louis XV, i kuando va pedrer su trono, el rey de Fransya, su yerno, lo va azer duke de Lorraine, por esto es ke la mas ermoza plasa de Nancy asta oy se yama Plasa Stanislas. Es vedra ke esto todo no tyene muncho de ver kon los djudyos, ama tyene de ver kon la Fransya, i por esto me deviya de dizirlo.

Esto dicho, por varyas razones ke no tyenen (por lo ke se) nada de ver kon los djudyos, la Polonya se aflako muncho, i del tyempo del ultimo rey de Polonya Stanislas Poniatowski, en 1772, Russiya, Austria i Prusa, vyendo la rebuelta de los aristokrates polonezes kontra Stanislas el rey, i sozde « para salvar la Polonya de la anarkiya », se esparten varyas provinsyas de Polonya. La Prusa de Frederico II toma el norte de la Polonya ke se va yamar Prusa oryentala, i la Polonya se ve kortada de la mar. Austria resive par parte sur oeste de la Polonya (inkluyendo Auschwitz) sin Cracovia ke keda a la Polonya. Los rusos toman la parte este de la Polonya. Lo todo reprezenta unos 30% del territoryo i 33% de la povlasyon pedridos por la Republika de las dos nasyones Polonya i Lituaniya. Esto se yama la primera partisyon de la Polonya. Munchos djudyos no azen mas parte de la Polonya porke se topan sovre todo en la parte tomada por los rusos.

En la parte ke keda a la Polonya, los polonezes aprovan de reorganizar el pais, i syertos aristokrates i intellektuales propozan un sistema de governo ke de a los djudyos la igualidad sivika i politika. Asigun Wikipedia, « es el solo egzemplo de una tala toleransya i de una tala avyertura de meoyo sovre la kuestyon djudiya en Evropa asta la Revolusyon franseza ».

En vedra estas ideas eran en el ayre en mismo tyempo en Fransya komo en Polonya.

Afillu si no so istoryano, me puedo fundar sovre la misma Wikipedia para akodrar ke en 1778, onze anyos antes de la Revolusyon franseza, i en un tyempo serka de lo ke vos meldi en Polonya, la « Sosyeta de los filantropos de Strasbourg » avre un konkurso sovre la amelyorasyon de la kondisyon de los djudyos, al kual va partisipar el famozo Abbé Grégoire, ke mas tadre, en 1788, va partisipar tambyen a un otro konkurso sovre la misma kuestyon, organizado, el, por la Academia de Metz, i lo va ganar (ex æquo a la vez kon un avokato protestante, Thiery, i kon un djudyo polones, Zalkind Hourwitz.)

Aki me tengo de kedar porke ya vino el tyempo, la kontinuasyon al otro djjueves si kyere el Dyo !

Edmond Cohen
Paris, Fransya

[Orijen: www.esefarad.com]