Los djudyos de Rusiya

Por EDMOND COHEN

Keridos amigos

Muy okupado esta semana, es solo esta demanyana ke pude eskapar de aparejar mi emisyon de radyo de oy, ke va ser sovre los djudyos de Rusiya. Es un poko komplikado, porke las fronteras del imperyo ruso se menearon muncho, i tal pais yeno de djudyos, ke no era ruso syerto tyempo, lo fue otro tyempo. De toda manera, por manko de tyempo, me tuve de kedar en 1903, tyempo de pogromes. El kusur sera para una otra vez, ama no se kuando, syendo ke el djueves proksimo, 29 de marso, tendre mis inyetizikos en kaza i no podre ni aparejar ni azer kualkyer emisyon; el djueves de despues 5 de avril ya me disheron en la radyo ke no avra emisyon por modo de Pesah. I el djueves de despues, 12 de avril, va kaer en Yom aShoa. Sea la radyo me va tomar mi tyempo de emisyon komo ya afito, sea, si tengo mi emisyon, vo azer una emisyon espesyala. Esto dicho, la istorya de los djudyos de Rusiya entre 1903 i oy tyene malorozamente munchos atadijos kon la Shoa, de tal manera ke dainda no se lo ke vo azer.

Saludos a todos
Edmond Cohen
Paris – Fransya

——————————————————————————————

LOS DJUDYOS DE RUSIYA

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar, vos akodro ke el proksimo atelye de konversasyon de Vidas Largas se tendra el martes 10 de avril, a las dos i medya, en el Centre Communautaire. Yo mismo, por una vez, no podré estar kon vozotros, ama djustamente podresh aprovechar ke no estaré para avlar kuanto keresh en muestra ermoza lingua, o si no vos sentesh dainda kapaches de avlar, kayarvos i solo eskuchar a los otros! A esto sirven estos atelyes ke son avyertos a todos, venid munchos.

Vos akodro tambyen ke las emisyones de Radio J se pueden oir por internet sovre el sityo de Radio J, de toda manera en direkto, i tambyen despues en la redifuzyon de la mediudiya entera.

http://www.radioj.fr/node/55

Demandandome de kualo avlarvos oy, me apersivi ke si vos konti sovre djudyos del mundo entero, nunka vos avli de los djudyos de Rusiya, ke portanto eran antes de la gerra, kon los de Polonya, de los kuales me apersivi ke no vos avli tampoko, los mas numerozos del mundo. Agora las kozas trokaron, i son los djudyos de Israel i de los Estados Unidos ke son los mas numerozos del mundo. En Polonya, entre la shoah i Gomulka despues, se puede dizir ke djudyos no ay kaji mas. De unos 3.300.000 en 1939, kayeron a un poko mas de 3.000 oy, mil vezes menos. En Rusiya, malgrado una aliya de masa, kedan oy unos 180.000 djudyos; eran unos un milyon en 1939 (esto avlando de la Rusiya sola. Si avlamos de la Unyon sovyetika, suvimos a mas de 3 milyones inkluyendo 2.700.000 en la sola Ukranya.

Vos diré ke lavori sovre todo sovre Wikipedia, ke sea en franses o en ingles.

Los djudyos fueron en los primeros moradores de las tyerras ke van a ser despues la Rusiya. Ay tradisyones ermeniyas i gurdjiyas asigun las kualas vinyeron djudyos deportados del tyempo de Nebuhadnetsar (587 antes de la era kristyana). Despues vinyeron djudyos de Mediya o de Djudea mismo. Asigun Moïse de Khorene (Movses Korenatsi), istoryano ermeni del siglo V, las dinastiyas ermeniyas de los Bagratides i de los Amatides vendriyan de estos djudyos.

Asigun este istoryano, los Bagratides, ke reynaron sovre la Armeniya i la Georgiya en el siglo IV, vendriyan de la famiya Bagratuni, ke seriya famiya djudiya. Los Anatides tanbyen fueron kapos ermenis, ke eyos tambyen, asigun Moïse de Khorene, seriyan de famiya djudiya.

Otros istoryanos ven solo la venida de los djudyos en Rusiya al empesijo del primer siglo antes del Kristo, lo ke mos metriya del tyempo ande los Hashmonaim reynavan sovre la Djudea.

Los djudyos ayegando en Crimea i en sur de Rusiya veniyan de komunidades gregas. Se topan en estas rejyones lajas djudiyas eskritas en grego. Despues, en la mitad del siglo II despues del Kristo, lo ke mos yeva en la epoka de Bar Kohba en Judea, las lajas topadas en estas mismas rejyones de Crimea o del sur de Rusiya son eskritas en ebreo, son djudyos venidos de Asia, puede ser de Djudea misma.

A poko a poko los djudyos de Crimea se adelantan verso el este i el norte. Ayegan ansina en el pais de los Khazares, ke se topa entre la Mar Preta i la Mar Kaspyana. Aya se topa oy la Tchetcheniya, ama tambyen, mas al norte, la sivdad de Volgograd, ke se yamo un tyempo Stalingrad. Komo ya lo savesh, el kagan, kijo dizir el rey, de los Khazares se aze djudyo verso 740, i los ke vinyeron despues de el se kedaron djudyos tambyen, asta la kaida del imperyo khazar verso 965 (pokos anyos despues de la korespondensya entre Hasday ibn Shaprut, mediko i vizir del Khalif de Cordoba Abder Rahman III, i Joseph, rey de los Khazares). Afillu si los Khazares no fueron djudyos independyentes mas de dos siglos, yene a mi me plaze la idea ke Hitler tuvo una de sus primeras i mas grandes desfechas en Stalingrad, kijo dizir en el pais ande uvo un tyempo djudyos khazares…

Esto dicho, kuando el Imperyo Khazar se dezaze, los djudyos se van verso la Crimea i la Ukranya, i se mesklan kon las komunidades djudiyas ya establesidas aya desde muncho tyempo. Ay kyen dize ke la sivdad de Kiev, en Ukranya, fue fundada por djudyos. Esto en vedra no se save, ama lo ke se save es ke la male djudiya en los siglos XI i XII era tan grande ke se yamo la sivdad djudiya.

Verso el siglo X, ay tambyen los Karaim ke vyenen en Crimea. Son separados de los djudyos por los rabanim eyos mismos, de tal manera ke el governo russe no los ve komo djudyos.

De otra parte, los djudyos fuyendo las persekusyones almanas ayegan en Polonya, ama tambyen en Lituaniya. En 1321, Kiev, i tambyen la Poldolia son konkistadas por Gediminas, gran duke de Lituaniya. En 1388, los djudyos obtyenen de ser sivdadanos komo los otros.

En 1471, nase en Novgorod una sekta dirijida por un papaz yamado Dionis, el kual se izo djudyo. Su sekta es yamada la ereziya de los judaïzantes. I por espanto de esta sekta, el poder ruso se alesha de los djudyos ke no tyenen mas derecho de entrar en Rusiya.

En en siglo XVI, myentres munchos djudyos venidos de Polonya vyenen en Ukranya, Byelorusiya i Lituaniya, Ivan el Terrivle proibe ke kualkyer djudyo se tope en Moskva.

Afillu si no se pasa en el territoryo ruso, ama en Ukranya, no puedo kedarme sovre el siglo XVII sin avlar de los kozakes de Bogdan Chmelniski, ke entre 1648 i 1658, izyeron en Ukranya una terrivle matansina de unos 100.000 djudyos, kortados en pedasos kon una krueldad inkreivle. Agora ay en Ukranya una sivdad ke se yamava Proskurov (ande uvo un famozo pogrom en 1919) i ke, en 1954, a sido yamada Chmielniski en onor de este gibor. Kuando seriya solo por esto, no me syento una grande simpatiya verso la Ukranya. Ama esto mos alesha de la Rusiya.

En Rusiya, los tsares venidos despues de Ivan el Terrivle van a segir la misma interdiksyon de toparse en Moskva, asta ke la reyna Katarina Iera en 1727, i despues de eya Elisabeth Iera, dechiden de echar a los djudyos afuera de la Rusiya entera. En 1749, kuando Elisabeth se ambeza ke Sanchez, su mediko desde 18 anyos, es djudyo, lo echa afuera komo los otros.

Ama despues, en 1772, al espartimyento de la Polonya entre Prusa, Austria i Rusiya, unos 900.000 djudyos vyenen a toparse en el imperyo ruso, ke no se pueden mas echar afuera.

(Aki avro una chika paranteza para akodrarvos ke aviya sido la mizma koza en Fransya un siglo antes. En el siglo XVII, no aviya kaji mas djudyos en Fransya, syendo ke la Fransya los aviya todos echados afuera, salvo los de Bayonne i Bordeaux, porke aviyan entrado komo kristyanos, o los de Avignon o Carpentras, porke estas sivdades pertenesiyan al papa, i estonses no aziyan parte de la Fransya. Ama kuando, en 1648, la Fransya tomo la Alsacia, topo aya unos 20.000 djudyos ke, a mal de su pezar, tuvo de guadrar. Syerro la paranteza).

Esto dicho, la tsarina Katarina II dechida en 1790 ke los djudyos van a pueder kedarse solo en la parte oeste del imperyo, kijo dizir las partes tomadas a la Polonya i a la Lituaniya. Es lo ke se yama la “”zona de rezidensya”.

Esto va surear kon los tsares Pierre III i Paul Iero, asta Alexandro Iero, ke en 1803 permite a syertos djudyos de salir de la zona de rezidensya durante un tyempo limitado. Asto no impide ke, kaji en mizmo tyempo, 200.000 a 300.000 djudyos son echados afuera de sus kazales, Va ser la mizma koza en 1821.

En 1825, el tsar Nicolaï Iero ovliga los djudyos de eskojer entre eyos un numero de ombres ke tendran de azer un askerlik de 25 anyos. Es una koza terrivle de tener de eskojer entre padre i ijo, savyendo ensima ke si se eskoje el ijo, al kavo va ser konvertido al kristyanismo. Los kapos de la komunidad, ke son kargados de este eskojimyento, biven oras pretas, akuzados por la djente djudiya de eskojer para no azer el askerlik a los de la famiya del eskojidor, los rikos o importantes, i para el askerlik van los proves desmazalados.

Esto dicho, todo no es negro en las desizyones del tsar Nicolaï Iero. En 1844, el estado ruso fragua eskolas djudiyas profanas, ke plazen a los maskilim, kijo dizir los djudyos de la haskala, de las luzes. A la kontra, los djudyos relijyozos se espantan de talas eskolas. De otra vanda, mantyene la zona de rezidensya, ama permite de salir de esta zona si es para ir a las grandes feryas de komersyo, o para estudyar en la universidad. A la kontra, si un djudyo se va del pais sin permeso, pyedre su nasyonalidad. Kon esto todo, se puede yene dizir ke los djudyos son mas o menos bastante kyetos.

El tsar Alexandro II vyene al poder en 1855. Es un tsar liberal, ke proibe de tomar kriaturas para el askerlik. Es mas kolay de salir de la zona de rezidensya, ama las reformas asperadas por los djudyos no vyenen, asta ke el tsar sea asasinado en 1881, i es su ijo Alexandro III ke vyene detras de el, i su yegada va muncho trokar, i en mal, la vida de los djudyos.

Los pogromes, ke son matansinas en toda la Rusiya, empesan, i van surear asta 1884, sin ke el poder aga muncho para impedirlos, si no es ke los ayuda. En mais 1882, el governo aze leyes sovre los djudyos, inspiradas por un antisemit famozo, el jeneral Ignatiev. En estas leyes, dichas leyes de mais, ay un alay de interdiksyones para los djudyos, inkluyendo la de azer komersyo los dias de fyestas kristyanas, ama tambyen de fraguar kazas o kultivar tyerras afuera de las sivdades o de los kazales de la zona de rezidensya.

En novyembre 1894, Nikolaï II vyene detras de su padre, i las kozas no se enderechan para los djudyos. Quotas vyenen limitar el numero de djudyos admetidos en las eskolas, i de muevo los djudyos son echados afuera de las grandes sivdades komo Moskva, San Petersburg o Kharkov.

Los djudyos, sintyendo ke no pueden kedarse sin azer kualkyer koza para trokar la situasyon, bushkan kualo azer.

Syertos van de la vanda de los ke pensan ke el saludo de los djudyos pasa por la fundasyon de un estado djudyo en Erets Israel, la tyerra de la antigua Djudea.

En 2009, ize una emisyon sovre el nasimyento del syonismo, i amostri komo el primer syonisto moderno, syonisto antes del byervo, fue un haham sefardi de Serajevo, i despues en 2011 ize una emisyon solo sovre el, dizyendo ke desde 1834, en su livro Shema Israel, eskrivyo ke los djudyos deven estableserse en la tyerra de Israel. I los rusos? Los rusos vinyeron poko despues, ama nunka tenemos de olvidarmos ke el primer syonisto fue un sefardi eskrivyendo, a lo manko al empesijo, en djudeo-espanyol (afillu si despues va eskrivir en ebreo).

En kuanto a los rusos, kale avlar de Eliezer Ben Yehuda, de su haliz alkunya Perelman, nasido serka de Vilno, en Lituaniya, ke eskrive en lashon, en 1879, en la gazeta hashahar, un artikolo, Sheela lohata (una kuestyon kemando) ande dize ke el ebreo va kon una nasyon ke bive en su pais, Erets Israel. I se va en Erets Israel, en esta epoka provinsya osmanliya, en 1881, a la edad de 23 anyos.

En 1882 sale en Berlin un livro famozo, eskrito por un djudyo ruso ke aviya kreido a la haskala, Leon Yehuda Pinsker. Este livro se yama La autoemansipasyon : son los djudyos ke deven eyos mismos salvarse en indo fraguar un estado (sin dainda dizir ande).

Este livro va interesar a un otro djudyo ke esta en las mismas ideas en el mismo tyempo, se yama Moshe Leib Lilienblum, se va azer amigo kon Pinsker i estos dos kon un chiko grupo de partizanes fundan un movimyento para fraguar un estado en Erets Israel, ke yaman en primero Zihron Moshe, en rekodro de Sir Moses Montefiore, ama poko despues se va yamar los Hoveve Tsion, los amantes de Tsion.

Sin pedrer tyempo, este grupo va fundar en 1882 Rishon le Tsion.

Un poko mas despues, en 1905, otro ruso, nasido en Ukranya, kapo de los Poalei Tsion (ovreros de Sion), yamado Ber Borochov, eskrive un livro a la vez marxisto i syonisto, intitolado “La kuestyon nasyonala i la lucha de klasa”.

Komo vesh, afillu si uvo munchos otros syonistos ke no eran rusos, komo un syerto Theodor Herzl, keda ke los djudyos de Rusiya, por modo de sus sufriensas, djugaron un rolo muy importante en el nasimyento del syonismo, no solo sovre el papel, sino tambyen de manera fizika, porke la mayoriya de los ke se fueron en Palestina para fraguar un estado fueron rusos.

Por lo tanto, no kale pensar ke todos los djudyos de Rusiya fueron syonistos. Es en Rusiya tambyen ke nasyo el movimyento konosido komo el Bund, un movimyento de sosyalistos djudyos avlando yidisch, i ke pensavan, i dainda pensan, ke el sosyalismo se deve de kreser i azer en el pais mismo ande se topa el djudyo.

Entremyentres, el antisemitismo en Rusiya krese i enflorese. En 1903, ay un terrivle pogrom en Kichenev, oy en Moldaviya, ke aze 40 muertos a lo manko. Los pogromes se tyenen tambyen en otras sivdades, inkluyendo Odessa, komo ya lo konti en mi emisyon de 2011 sovre los djudyos de Crimea.

Los djudyos se organizan en grupos de defensa, i esto va permeter ke por la primera vez ayga tambyen muertos i feridos de la vanda de los matadores.

El governo echa azete sovre el fuego: son los servisyos sekretos rusos ke publikan en este mismo anyo 1903 los famozos “protokolos de los savidos de Sion”, sôzde eskritos por los kapos del puevlo djudyo ke kyeren konkistar el mundo entero. Komo ya lo savesh, estos protokolos se venden dainda oy en los paizes arabos i en Turkiya.

Me vo kedar aki sovre los djudyos de Rusiya, savyendo ke tendré de azer a lo manko una otra emisyon para los tyempos entre 1903 i agora. Kuando sera? En vedra no sé, porke no podré azer emisyon el djueves proksimo por modo de mis inyetizikos. El djueves de despues, no avra tampoko emisyon por modo de Pesah. I el djueves despues kae en yom ashoa. Veré de kualo avlarvos este diya…si kyere el Dyo!

Edmond Cohen
Paris, Fransya

[Orijen: www.esefarad.com]