quarta-feira, 7 de junho de 2017

Se multarà l’exibicion de simbòls franquistas a las Illas Balearas

Lo parlament regional a aprovat una lei de la Memòria Democratica que permetrà de reparar de damatges causats per la guèrra e la dictatura. PP e Ciutadans se i son opausats

Las Illas Balears vendràn lo primièr endrech de l’estat espanhòl ont d’exibir de simbòls franquistas serà punit amb de multas de fins a 150 000 èuros. Lo Parlament de las Illas Balearas aprovèt la mesa en marcha de la lei de la Memòria Democratica, que cèrca de reparar las victimas del franquisme e d’enebir l’enaurament de simbòls de la dictatura.
 
La lei s’aprovèt, malgrat l’oposicion del Partit Popular e de Ciutadans, que refusan lo tèxt aprovat car, segon eles, s’adreiça solament a las victimas d’un camp.
 
La lei compta sièis títols sul drech a la vertat, sul drech a la memòria, sul drech a la reparacion, sus las garentidas de non-repeticion, e de capítols sus l’accion e l’organizacion administrativa per l’establiment de politicas de la memòria democratica e de sancions.
 
La lei tanben prevei de sollicitar l’anullacion dels jutjaments e de las senténcias politicas restacats a la Guèrra d’Espanha (1936-1939), d’examinar de desaparicions e d’identificar de victimas, de protegir lo patrimòni documentari o de declarar d'espacis de memòria democratica.


[Poblejat dins www.jornalet.com]

Nenhum comentário:

Postar um comentário