sexta-feira, 9 de junho de 2017

L’IEA-AALO explica al Parlament de Catalonha la situacion de l’occitan dètz ans après son oficialitat

En Aran, a aumentat lo nombre de personas que legisson e escrivon en occitan, mas l’usatge abitual de la lenga a demesit del 20%

Lo president de l’Institut d’Estudis Araneses-Académia Aranesa de la Lenga Occitana (IEA-AALO), Jusèp Loís Sans, compareguèt dimècres passat al Parlament de Catalonha per expausar l’analisi dels dètz ans d’oficialitat de l’occitan en Catalonha e Aran e quinas son las perspectivas d’avenir de la nòstra lenga. Dins aquel sens, Sans soslinhèt qu’a aumentat lo nombre de personas que legisson e escrivon en occitan en Aran, mas que l’usatge abitual de la lenga a demesit del 20%. Aquela davalada es una donada negativa segon Sans. 
 
“Ua situacion unica en Mond”
 
De tot biais, Sans manifestèt que la lenga es viva gràcias a las politicas lingüisticas entamenadas dins los ans precedents e que la reconeissença de la nòstra lenga en Catalonha es “ua situacion unica en Mond”.
 
Per quant a l'avenir, insistiguèt per dire caliá recuperar la participacion de la societat. Per Sans, es una error de pensar qu’“era proteccion der aranés va contra era proteccion deth catalan”.
 
Per Sans, las menaças que patís l’occitan en Aran son lo naut movement demografic del país, la pauca preséncia de l’occitan dins las universitats e los rets socials, e la petitesa de l’occitan. Segon lo president de l’IEA-AALO, son vitalas las politicas lingüisticas per far créisser l’usatge abitual de l’occitan. L’oficialitat de la lenga en Catalonha tota “ei estat un punt d’inflexion important”, mas çò de mai important per Sans es estat era preséncia de la lenga a l’escòla, dins los mèdias e dins l’administracion.


[Imatge: Mireia Boya - poblejat dins www.jornalet.com]


Nenhum comentário:

Postar um comentário