quarta-feira, 12 de abril de 2017

Maria Pilar Busquet guierdonada damb era Crotz de Sant Jòrdi a títol postum

An autrejat eth naut guierdon catalan ara escrivana e èx-sindica d’Aran pera sua defensa des institucions araneses e des ligams istorics damb Catalonha


Era Generalitat de Catalonha qu’a autrejat era Crotz de Sant Jòrdi a títol postum a Maria Pilar Busquet Medan, peth “sòn ròtle ena arrecuperacion des institucions araneses e des simbòls d’identitat dera Val e pera sua defensa des ligams istorics e culturaus damb Catalonha”. 
 
Deputada en Parlament de Catalonha entre 1984 e 1992, Pilar Busquet siguec membre fondadora dera associacion vesiau Es Terçons, qu’ena fin des ans 1970 lutèc entà arrecuperar es institucions d’autogovèrn istoriques d’Aran. Ua revendicacion que s’artenhec damb era arrecuperacion deth Conselh Generau d’Aran, e enes sues prumères eleccions siguec elegida sindica d’Aran entre 1991 e 1993. 
  
Siguec membre dera Comission Oficiau entara Normalizacion Lingüistica der Aranés e responsabla de cultura d’Aran entre 1977 e 1980. 
  
Coma escrivana de soslinhar era Flor d’aur enes Jòcs Floraus dera Escolo deras Pireneos e deth concors de poesia e de pròsa deth Musèu Etnologic dera Val d’Aran. 
 
Maria Pilar Busquet, que moric eth passat 13 de noveme de 2016, auie participat quauqui mesi abans, damb eth sindic d’Aran, Carlos Barrera, enes actes de commemoracion deth 25u anniversari dera reïnstauracion deth Conselh Generau d’Aran en un acte institucionau en Parlament de Catalonha. 
 
 
Un guierdon màger 
 
Era Crotz de Sant Jordi qu’ei ua des arreconeishences mès granes qu’autrege era Generalitat de Catalonha. Eth guierdon se creèc en 1981 entà distinguir es persones e es associacions que, pes sòns merits, agen prestat servicis destacadi a Catalonha. Tot ciutadan, o grop de ciutadans de Catalonha, que pòt demanar que s’autrege agueth guierdon a bèra persona o a bèra entitat. 
 
 
 
 
FM


 


[Poblejat dins www.jornalet.com]

Nenhum comentário:

Postar um comentário