Catalonha: un sindicat de policièrs denóncia de mesprètz per l’occitan

Lo sindicat USPAC dels Mòssos d’Esquadra critica que la Generalitat recompense per lors coneissenças de l’occitan solament los agents que trabalhan en Aran, e que d’autras lengas non oficialas ajan mai de privilègis

Un sindicat del còrs dels Mòssos d’Esquadra, la polícia de la Generalitat de Catalonha, denóncia lo “mesprètz” devèrs la lenga occitana. Lo sindicat USPAC publiquèt a la fin de la setmana passada un comunicat que critica lo govèrn de la Generalitat per “mespresar la lenga occitana”. Concretament, critican que i aja pas pus de recompensas salarialas pels policièrs que certifican de coneissenças de nòstra lenga, fòra d’Aran, mentre n’i a per d’autras lengas non oficialas coma “lo rus, lo turc o lo chinés”. Lo comunicat ataca amb duretat la CUP, que qualifica de “sòci politic” del govèrn, pr’amor que fa pas res per arrestar aquel mesprètz.

 

A l’ora d’ara, solament los policièrs afectats en Aran son recompensats se certifican de coneissenças en lenga occitana. Mas los policièrs revendican de tornar a la situacion anteriora, ont totes los policièrs de tot lo país èran recompensats se certificavan de coneissenças d’occitan aranés. Dins aquel sens, recòrdan que, segon la lei catalana, l’occitan es lenga oficiala dins tot lo territòri e pas solament en Aran.

[Imatge: elyob - poblejat dins www.jornalet.com]