An fach lo Ir Congrès Internacional sul Reviscolament de las Lengas Indigènas e Minorizadas

D’especialistas de tot lo Mond se son rassemblats per escambiar de coneissenças e d’experiéncias a prepaus de la revitalizacion de las lengas menaçadas en risc de desaparicion

Del 18 al 20 d’abril passats se debanèt a Barcelona e a Vic (Catalonha) lo Ir Congrès Internacional sul Reviscolament de las Lengas Indigènas e Minorizadas. Organizat per las Universitats de Barcelona, de Vic e Indiana Bloomington, lo congrès amassèt tres centenats d’especialistas que provenián de mai d’un centenat d’universitats de tot lo Mond.

 

An parlat dels aspèctes restacats a las lengas menaçadas de tot lo Mond, amb tres grandas sesilhas sul catalan en Catalonha Nòrd, sus la revitalizacion e cossí convéncer los parlants de las lengas minorizadas de priorizar l’emplec de la lenga eiretada e sul profièch que compòrta lo reviscolament de las lengas indigènas. Lo programa entièr lo podètz veire sus aqueste ligam.

 

 

Mai del 90% de las lengas del Mond menaçadas

 

Segon los organizaires del congrès, mai del 90% de las lengas del Mond son menaçadas, e se prevei long del sègle XXI que ne desapareisseràn mai de la mitat. Las consequéncias d’aquela pèrda per las comunautats concernidas e per l'umanitat en general es çò qu’engatgèt qualques especialistas a entamenar de programas de reviscolament de divèrsas lengas. Aquel congrès a rassemblat los especialistas mai reconeguts internacionalament.

 

Las experiéncias, las conclusions e tot çò que se’n parlèt en aquel congrès o deurián conéisser los responsables politics e culturals d’Occitània tota, car de politicas de reviscolament de la lenga nòstra son d’a fons urgentas.

[Imatge: Universitat de Vic - poblejat dins www.jornalet.com]