terça-feira, 14 de fevereiro de 2017

Lo festenal de cinèma LGBT de Tolosa a celebrat sos 10 ans

L’edicion 2017 metiá en competicion 18 longmetratges e 8 cortmetratges centrats suls tèmas del genre e de l’orientacion sexuala

La sesilha d’inauguracion se passèt dins la prestigiosa Sala dels Illustres del Capitòli, un dels sits mai emblematics d’Occitània

Ongan lo festenal LGBT de Tolosa, nomenat “
Des Images aux mots“, a festejat sa 10a edicion del 6 a 12 de febrièr. Es un eveniment cinematografic considerable per la capitala regionala. Sa tòca es de porgir una ofèrta larga de filmes centrats suls tèmas del genre e de l’orientacion sexuala.
 
Començat mai o mens confidencialament en 2008, aqueste festenal al long dels ans s’es impausat coma un moment clau tant dins la vida culturala LGBT de Tolosa coma dins lo mitan cinefil. Los nombroses sostens tant publics coma privats son los testimònis de sa reconeissença.
 
L’edicion 2017 metiá en competicion 18 longmetratges e 8 cortmetratges en provenença de l’estat francés, dels Estats Units, del Reialme Unit, d’Espanha, de Catalonha, de Chili, d’Israèl, de Turquia, d’Alemanha, de Canadà, d’Itàlia. La jurada, compausada de 4 personalitats del mond professional del cinèma, a decidit de guierdonar al títol de Prèmi de la Jurada lo filme Nunca vas a estar solo, film chilen d’Alex Anwander. Lo Prèmi Especial va a Köpek, un filme turcosoïs d’Esen Isik. Lo Prèmi del Public es estat donat al filme Un bacio d’Ivan Cotroneo.
 
La partida off del festenal donèt la paraula per divèrsas conferéncias a de professionals del cinèma, un sociològ, un antropològ e un jornalista especialista de las questions LGBT. De moments de convivéncia e institucionals mirgalhèron lo festenal. Especialament se pòt destacar la sesilha d’inauguracion que se passèt dins la prestigiosa Sala dels Illustres del Capitòli, un dels sits mai emblematics d’Occitània.
 
La partida Tolosana acabada, comença ara la partida regionala amb de projeccions dels filmes del festenal dins plusors vilas de la region, çò que durarà fins al 25 de febrièr.
 
 
 
 
TL


[Poblejat dins www.jornalet.com]

Nenhum comentário:

Postar um comentário