An presentat per lo primièr còp un trabalh de fin de gra en occitan a l’Universitat de Lhèida

Tant la presentacion coma l’avaloracion de la jurada se faguèron exclusivament en lenga nòstra

Lo 21 de junh passat se presentèt per lo primièr còp a l’Universitat de Lhèida un trabalh de fin de gra (TFG) en lenga occitana. E mai se l’occitan es ja estat present qualques còps a la presentacion de tèsis o de memòrias, es lo primièr còp qu’un trabalh de fin de gra es redigit, presentat, legit e avalorat integralament en lenga occitana.

Entitolat Umor contra lo sabotatge, aquel trabalh es òbra de Manèl Zabala, membre de la còla de Jornalet e estudiant en darrièra annada per lo gra d’estudis catalans e occitans. Se tracta d’una analisi de las reaccions umoristicas de defensa de la lenga occitana davant la pression de la lenga francesa, del sègle XIII fins a uèi.

La jurada que s’encarguèt d’avalorar lo trabalh de Zabala se formava dels professors occitanofòns Jordi Suïls, Ramon Sistac e Aitor Carrera. La presentacion del trabalh coma las intervencions de la jurada se faguèron integralament en occitan. la jurada autregèt a Zabala la qualificacion maximala per aquel trabalh.

[Poblejat dins www.jornalet.com]