Catalonha s’engatja amb l’Euroregion e i demanda l’oficialitat de l’occitan

Lo Parlament catalan a manifestat son sosten a l’Euroregion Pirenèus-Mediterranèa, demanda per eles mai d’autonomia e de finançament e vòl que l’occitan ne siá lenga oficiala

Lo Parlament de Catalonha aprovèt divendres passat, amb los vòtes d’ICV, CIU, ÈRC, PSC e C’s, una resolucion prepausada per ICV per tal de donar mai d’autonomia e de finançament a l’Euroregion Pirenèus-Mediterranèa.

Aquestes darrièrs ans, las dificultats economicas provoquèron de retards dins los pagaments de la Generalitat de Catalonha, çò que provoquèt que las regions de Lengadòc-Rosselhon e de Miègjorn-Pirenèus menacèssen de quitar lo projècte.

Dins aquel sens, lo Parlament de Catalonha a volgut mostrar son engatjament amb l’Euroregion, demanda de la dotar de mai d’autonomia per la far mai independenta e operativa, mai que mai al nivèl financièr, e demanda al govèrn de Catalonha que faga totas las accions per reconéisser l’oficialitat de la lenga occitana, al costat del catalan e del francés.

Los deputats qu’an prepausat lo vòte an manifestat que “la projeccion europèa e internacionala de la rigor de Catalonha e de son govèrn seràn d’elements clau dins son procès de transicion nacionala”.

L’Euroregion Pirenèus-Mediterranèa es un projècte transfrontalièr de cooperacion politica entre las regions Miègjorn-Pirenèus, Lengadòc-Rosselhon e las comunautats autonòmas de Catalonha e las Illas Balearas. En 2014 se’n celebrarà lo desen anniversari. 

[Image: © CDC - poblejat dins www.jornalet.com]