Feixoo promete pór fin á inmersión lingüística e desencadea unha chuvia de críticas

O PSC, Junts, ERC e a Intersindical cargan contra a proposta electoral do PP cara ás eleccións do 29 de novembro. 

Alberto Núñez Feixoo esta segunda feira co seu 'contrato por España'.  

Escrito por Alexandre Solano / Vilaweb - A.L.

O líder do PP no Estado, Alberto Núñez Feixoo, prometeu erradicar calquera tipo de “adoutrinamento” nas aulas e garantir o ensino do castelán en todo o Estado español se chega á Moncloa. Anunciouno durante a presentación do Contrato con España, un documento cos compromisos que quere asumir se gaña as eleccións estatais do 29 de novembro. A proposta desencadeou unha chuvia de críticas en Catalunya polo posíbel impacto sobre o modelo de inmersión lingüística.

O presidente da Generalitat, Salvador Illa, foi un dos primeiros en reaccionar. “A lingua catalá non se toca”, advertiu durante unha reunión coas delegadas e os delegados do Goberno no exterior. Illa reprochoulle ao PP que considere as linguas “armas de división e confrontación”, en lugar de pontes de entendemento e elementos de riqueza.

A portavoz de Junts no Congreso español, Míriam Nogueras, acusou Feixoo e o dirixente de Vox, Santiago Abascal, de usaren a inmersión lingüística como “moeda de cambio” en plena precampaña electoral. Nogueras reivindicou que Junts utilizara a súa forza en Madrid para frear imposicións contra Catalunya e criticou que os 19 deputados do PSC no Congreso non actuasen da mesma maneira: “Agora cómpre exixirlles isto mesmo: feitos e non propaganda”. 

Pola súa parte, a secretaria xeral de ERC, Elisenda Alamany, aproveitou a polémica para acusar Junts de manter unha actitude “equidistante” diante dos ataques do PP ao catalán. “Fronte aos reaccionarios que ameazan a lingua, non podes ser o do medio”, dixo nunha conferencia de prensa. Alamany fixo referencia á reivindicación de Junts de seren “os do medio” e alertou de que non se podía manter unha posición ambigua diante destas ameazas. A respecto diso, defendeu que ERC debía encabezar a defensa da lingua catalá no Congreso español.

A Intersindical tamén criticou as declaracións de Feixoo e acusouno de querer contentar a extrema dereita asumindo o seu programa contra a escola catalá. O portavoz de Educación do sindicato, Marc Martorell, denunciou que o PP asumía os postulados máis agresivos da ultradereita e confiaba en que o Tribunal Constitucional español derrubase o marco normativo aprobado polo Parlamento. O sindicato defendeu a inmersión lingüística como o único modelo que garante que todo o alumnado domine plenamente o catalán e o castelán ao final do ensino obrigatorio.

O presidente de Òmnium Cultural, Xavier Antich, asegurou que a entidade “non permitirá” que ningún Goberno nin tribunal español “acabe co modelo de escola catalá”. Nunha mensaxe na rede social X, Antich advirte de que “se intentan atacar o catalán, atoparannos diante, a Òmnium e a todo o país”.

Reaccións desde a Galiza 

"Feixoo asina un 'Contrato con España'. Os máis vellos do lugar lembramos que en 2009 asinou un 'Contrato con Galiza'. Spoiler: Non cumpriu nada. Claro que aquí, moitos puntos mellor que non os cumpra, que xa nin teña a oportunidade de intentalo", defendeu, pola súa parte, o deputado do BNG no Congreso, Néstor Rego. 

Os compromisos electorais de Feixoo 

A proposta sobre o ensino forma parte do Contrato con España, o documento co que Feixoo presentou as principais promesas electorais do PP. Entre estas medidas están a construción de, como mínimo, un millón de vivendas, a redución de impostos, o endurecemento da política migratoria, o reforzo da sanidade pública e a revalorización das pensións de acordo co IPC. 

Feixoo rematou o acto coa sinatura simbólica do documento e a promesa de cumprir os compromisos se chega á Presidencia do Goberno español. “Non vos fallarei”, sentenciou.

 

 

[Foto: Gabriel Luengas / Europa Pres - fonte: www.nosdiario.gal]