Danemarc vòl donar als ciutadans lo contraròtle de lor imatge e de lor votz fàcia als «deepfakes»

Un projècte de lei enebís de difusar d’imitacions numericas realistas d’una persona sens son consentiment, e protegís la votz, la cara e los movements fins a cinquanta ans après la mòrt

Escrich per Manèl Navarro

Lo parlament danés estúdia un projècte de lei pionièr en Euròpa qu’enebís de partejar d’imitacions numericas realistas de personas sens lor consentiment. La reforma de la Lei dels Dreches d’Autor poiriá intrar en vigor lo primièr de genièr de 2027.

Danemarc se prepara per venir lo primièr país europèu a refortir d’un biais tan dirècte lo contraròtle dels ciutadans sus lor pròpri imatge, lor votz e lors movements fàcia als deepfakes generats per l’intelligéncia artificiala. Lo projècte de lei L 49, presentat lo 8 d’octòbre per la ministra de la cultura, Zenia Stampe, modifica la Lei dels Dreches d’Autor (Ophavsretsloven) per protegir tant las personas anonimas coma los artistas.

La norma establís que «las imitacions numericas realistas de las caracteristicas personalas fisicas d’una persona naturala pòdon pas èsser difusadas publicament sens lo consentiment de la persona imitada». Aquò inclutz l’aparéncia fisica, la votz e los movements. Qual que publique aquel tipe de contengut deurà demostrar qu’aviá obtengut lo consentiment de la persona concernida. La proteccion s’espandís a totas las personas, incluses los estrangièrs, e dura cinquanta ans après la mòrt.

Lo tèxte prevei tanben una proteccion especifica dels artistas e dels interprèts contra las imitacions numericas de lors interpretacions. L’objectiu es clar: frenar l’usurpacion d’identitat numerica e l’usatge abusiu dels deepfakes, que se pòdon crear en qualques clics e difusar lèu suls rets socials.

«Amb l’intelligéncia artificiala, se pòt crear de vidèos e d’imatges manipulats en qualques clics e los partejar suls rets socials», çò remarquèt la ministra Stampe al moment de presentar l’iniciativa. Lo projècte se basa sus un larg acòrdi politic conclús en junh de 2025, quand lo ministre d’alara, Jakob Engel-Schmidt, aviá ja defendut l’idèa que «tot lo monde a drech a son pròpri còrs, a sa pròpria votz e a sos pròpris traches del visatge».

La proposicion prevei d’excepcions per la satira, la parodia, la caricatura e la critica politica o sociala, e tanben pels usatges trivials o jornalistics . Pasmens, aquelas excepcions s’aplicaràn pas quand la desinformacion representa un perilh grèu pels dreches, per la vida o pels bens d’autras personas.

Los tribunals poiràn ordenar lo retirament dels contenguts de las plataformas, e la reforma serà articulada amb lo Reglament europèu suls Servicis Numerics (DSA) per facultar e accelerar lo tractament de las denóncias. Lo govèrn espèra que la lei poirà èsser adoptada a temps per intrar en vigor al començament de 2027.

Danemarc, qu’impulsèt aquela orientacion pendent sa presidéncia de l’Union Europèa en 2025, vòl servir de modèl als autres païses europèus fàcia a l’expansion dels deepfakes e als risques que representan per la vida privada, la reputacion e la democracia.

 

[Imatge: ApolitikNow - sorsa: www.jornalet.com]