Revendica la sobeiranetat sus aquelas illas, que París considèra coma francesas e que balhan accès a una zòna economica exclusiva de 350 000 quilomètres cairats
Vanuatu a engatjat una procedura davant la
Cort Internacionala de Justícia (CIJ) per la disputa amb l’estat francés sus la
sobeiranetat de las illas pichonas Umaeneg e Leka (Matthew e Hunter, dins lors
noms colonials), situadas dins lo Pacific Sud, çò rapòrta Vilaweb. Pasmens, l’afar poirà pas avançar
se l’estat francés accèpta pas la competéncia de la Cort per resòlver aquel
litigi.
La requista depausada
per Vanuatu demanda tanben l’establiment d’una frontièra maritima unica entre
las zònas economicas exclusivas e los planestèls continentals dels dos estats,
pertocant sustot Canaquia. Umaeneg e Leka son doas
illas inabitadas de mens d’un quilomètre cairat, situadas entre Vanuatu e
Canaquia. Malgrat lor talha reducha, lor possession revestís una importància
estrategica considerabla, puèi que permet a l’estat francés de dispausar d’una
vasta zòna economica exclusiva de mai o mens 350 000 quilomètres cairats.
Vanuatu revendica sa
sobeiranetat sus elas dempuèi son independéncia, obtenguda en 1980, mentre que
París manten sas pretensions sus aquelas doas illas. Après la dobertura de
negociacions en 2025, lo govèrn vanuatuenc acusa sos interlocutors de perpetuar
de practicas colonialas.
Lo primièr ministre
Jotham Napat aviá ja avertit qu’utilizariá totas las vias diplomaticas e
juridicas internacionalas per defendre la sobeiranetat del país. D’ara enlà, la
decision aperten a l’estat francés. Se París acceptèsse la competéncia de la
CIJ, lo desacòrdi poiriá enfin èsser examinat per la mai nauta juridiccion de
las Nacions Unidas.
[Sorsa: www.jornalet.com]
Sem comentários:
Enviar um comentário