B'Tselem vén de publicar un informe onde detalla os plan do Goberno de Israel para "desmantelar" as bases da existencia palestina en Cisxordania.
 |
Forzas israelís protexen a incursión de colonos na Cidade Vella de Hebrón, ao sur de Cisxordania o pasado mes de agosto.
A ONG israelí B'Tselem deu a
coñecer esta segunda feira o informe O
proxecto de eliminación, un texto no que precisa o suposto plan de Israel
para "desmantelar os cimentos" da existencia palestina en Cisxordania
co fin de volvela "cada vez máis fragmentada, vulnerábel e
dependente". O obxectivo do Goberno de Netanyahu, afirma a entidade, é
"reorganizar o espazo e as condicións de vida nel para que o control
israelí e a presenza xudía se convertan en algo contiguo, institucionalizado e
permanente".
B'Tselem asegura que as políticas de Israel para
"socavar a existencia palestina" existen desde 1967, mais recruaron a
partir de 2022 coa chegada ao poder de Benjamin Netanyahu, apoiado no
seu goberno olas faccións máis duras da ultradereita nacionalista.
Segundo recolle o informe da organización non
gobernamental, actividades básicas da vida cotiá atópanse baixo control israelí
"ou son completamente denegadas". Así, 3,5 millóns de persoas
palestinas de Cisxordania enfróntanse a unha tripla realidade:
vivir baixo o dominio israelí, abandonar o seu territorio ou soportar unha
"represión violenta" en caso de amosar resistencia.
Un
plan de cinco puntos
O informe detalla
como se aplica o "mecanismo israelí de eliminación" palestina a
través de cinco epígrafes tituladas: violencia e intimidación, restricións
de movemento, estrangulamento económico, destrución sociopolítica e limpeza
étnica e apropiación territorial. Cinco áreas que non operan por separado,
senón de forma coordinada e "interconectada".
O
documento presentado por B'Tselem en Xerusalén esta segunda feira tamén presta
atención á situación na Faixa de Gaza, exemplo da "lóxica de
eliminación" que o Goberno israelí mantén desde hai décadas. É o lugar
onde o "proxecto de eliminación" alcanza a súa "forma máis extrema",
con matanzas diarias e masivas acompañadas dunha destrución violenta do
contorno que o "público israelí" xa "normalizou" até o
punto de considerar os ataques continuados "violencia lexítima contra os
palestinos", aseguraron.
"As
violacións aquí descritas están financiadas, protexidas e integradas na
política estatal israelí e lévanse a cabo dentro dun sistema de ampla
impunidade", sinalou a directora da ONG, Yuli Novak, que chamou á
comunidade internacional a actuar con accións, non declaracións.
O relato da "eliminación"
O proxecto de
eliminación elaborouse a partir do testemuño de 2.000 persoas residentes en
Cisxordania ao longo dos últimos tres anos. As súas achegas confirman o abismo ente as vivencias dos colonos, a poboación
xudía que vive en asentamentos suxeitos a lexislación civil e con plenos dereitos
políticos, e da Palestina, permanentemente "baixo réxime
militar", malia habitar o seu propio territorio.
Para B'Tselem, o plan israelí favorece a expansión dos
asentamentos xudeus e o control das terras e os recursos pola súa parte,
desposuíndo os palestinos das súa propiedades e dotando estes procesos de
garantías legais.
Segundo B'Tselem, desde 1967 Israel apoderouse de
máis de 200.000 hectáreas –máis dun terzo de Cisxordania–
mediante unha serie de mecanismos legais, urbanísticos e administrativos, como
as declaracións de terras estatais, zonas militares fechadas, reservas naturais
ou o estabelecemento de asentamentos.
A organización tamén destaca no seu informe que a violencia en Cisxordania funciona como un "mecanismo central de control, desprazamento e desmantelamento", pois "restrinxe a marxe de acción dos palestinos".
[Foto: Europa Press / Contacto / Mosab Shawer -
fonte: www.nosdiario.gal]
Sem comentários:
Enviar um comentário