Rouban catro obras de arte no museo Renoir, no sur de Francia

A Policía francesa continúa buscando os autores do roubo, ao igual que a tres obras que seguen desaparecidas.

Museo Renoir da localidade francesa de Cagnes-sur-Mer.

Dúas persoas irromperon a primeira hora desta terza feira no museo Renoir da localidade francesa de Cagnes-sur-Mer, situada na Costa Azul, preto de Niza, e leváronse catro obras de arte, das cales tres seguen desaparecidas, mentres que a Policía francesa segue buscando os autores do roubo. 

“Esta mañá, dous individuos entraron no museo Renoir e roubaron catro obras de arte. A alarma do museo activouse ás 5.48 horas. Ás 5.53, é dicir, cinco minutos despois, a nosa Policía municipal xa estaba no lugar”, confirmou o alcalde da localidade, Bryan Masson, nunha mensaxe en redes sociais. 

Na mesma, detallou que os autores do roubo foron identificados grazas ás cámaras de videovixilancia municipais. “Os dous individuos fuxiron, abandonando durante a fuga un dos cadros roubados”, precisou. Masson denunciou que “atacar o Museo Renoir é atacar unha parte da historia e do patrimonio” da localidade, incidindo na gravidade do caso. 

Segundo explicou, a Policía municipal e a Policía francesa están mobilizadas na zona e continúan buscando as dúas persoas implicadas no ataque ao museo. “Están sendo activamente buscados e a investigación está en curso”, resumiu.  

 

 

[Foto: Museo Renoir - fonte: www.nosdiario.gal]