Argentina: Milei mena los pòbles autoctòns a una batalha novèla per lors tèrras

Mantuna comunautat es estada expulsada de territòris ancestrals aquestas setmanas, mentre que lo govèrn argentin vòl facultar las proceduras d’expulsion en nom de la proprietat privada

A Jujuy, lo 10 d’agost, la comunautat indigèna Santa Rosa, dins la region d’Humahuaca, patiguèt una operacion d’expulsion acompanhada duna fòrta violéncia policièra.

Escrich per  Jòrdi Ràfols

Mantuna comunautat autoctòna es estada expulsada de lors tèrras aquestes darrièrs jorns en Argentina. Es lo resultat del projècte de lei del govèrn de Javier Milei que vòl afortir la proteccion de la proprietat privada, al risc de facultar las expulsions de territòris ancestrals. Aquestas setmanas, i a ja agut d’operacions de polícia qu’an tocat las comunautats mapuchas dins las províncias de Neuquén, Jujuy e Misiones. 

Lo cas mai recent concernís las comunautats mapuchas lof kinxikew e lof melo, près de Villa La Angostura, dins lo sud del país. Lo 19 d’agost, un important dispositiu policièr intervenguèt per executar las decisions judiciàrias d’expulsion. Las comunautats afirman totun ocupar tradicionalament aquelas tèrras, mentre que l’estat argentin aviá el meteis reconegut lor ocupacion ancestrala. En mai d’aquò, l’organizacion argentina de dreches umans, lo Centre d’Estudis Legals e Socials (CELS), denóncia una procedura que priva las comunautats de mejans sufisents per defendre lors dreches. 

A Jujuy, lo 10 d’agost, la comunautat indigèna Santa Rosa, dins la region d’Humahuaca, patiguèt una operacion d’expulsion acompanhada duna fòrta violéncia policièra. Los abitants contèstan la validitat dels plans cadastrals utilizats per la justícia, afirmant que comportarián d’errors dins los limits del territòri comunautari. 

Aqueles afrontaments apareisson dins un contèxt juridic prigondament modificat dempuèi l’arribada de Milei al poder. En decembre de 2024, son govèrn abroguèt la lei 26.160, que suspendiá sustot las expulsions de las comunautats indigènas e prevesiá un inventari dels territòris tradicionalament ocupats per aquelas comunautats. Son abrogacion a suprimit un dels principals mecanismes de proteccion de la tèrra dont dispausavan los pòbles originaris d’Argentina. 

A l’encòp, lo govèrn defend una novèla «lei sus l’inviolabilitat de la proprietat privada», ja aprovada pel Senat e ara examinada per la Cambra dels Deputats. Lo tèxt prevei de modificar las proceduras d’expulsion e poiriá facultar d’expulsions rapidas de terrens rurals qu’entraïnarián de conflictes amb las comunautats indigènas. D’organizacions coma lo CELS estiman que la reforma risque de favorir la concentracion fonzièra e de facultar l’accès privat a de ressorsas naturalas e de territòris estrategics. A Salta, per exemple, la comunautat wichí lapacho 2 a denonciat pendent d’annadas la progression de la desforestacion sus de territòris qu’utiliza tradicionalament a causa de l’expansion de las activitats agricòlas e boscassièras.

View this post on Instagram

A post shared by EL PAÍS (@el_pais)

 

[Imatge: Edgardo A. Valera / AFP - sorsa: www.jornalet.com]