Estats Units: la majoritat dels democratas romp amb lo sosten tradicional a Israèl

Malgrat lo refús per la majoritat republicana d’un emendament qu’aviá per mira de suprimir las ajudas annadièras miliardàrias a Israèl, una majoritat d’elegits democratas lo sostenguèt, dins un gèst sens precedents a la Cambra dels representants 

Escrich per Jòrdi Ràfols

Lo 15 de julhet passat, la Cambra dels representants dels Estats Units rebutèt un emendament presentat pel deputat republican progressista Thomas Massie que prepausava la supression dels 3,3 miliards de dolars d’ajuda annala acordats a Israèl, çò rapòrta L’Humanité. Se la mesura foguèt pas adoptada, l’escrutinh marca pasmens una evolucion politica inedita dins las relacions entre los dos estats, car, pel primièr còp, la majoritat dels elegits democratas votèt en favor de la supression d’aquela ajuda amb 103 voses contra 98 que la regetèron.

Presentat sens distincion entre ajuda militara e ajuda umanitària, l’emendament suscitèt de resèrvas demest cèrts elegits progressistas. Lo deputat Greg Casar, president del Caucus Progressista del Congrès, lo grop dels representants democratas mai progressistas, expliquèt qu’auriá preferit un emendament mirant unicament l’ajuda militara, en mantenent los programas umanitaris. Fauta d’una tala opcion, sostenguèt lo tèxt presentat per Massie, estimant que los contribuidors estatsunidencs volián pas pus finançar l’armada israeliana.

Lo vòte revelèt tanben de divisions dins la direccion democrata. Lo primadièr del partit a la Cambra, Hakeem Jeffries, votèt contra l’emendament, mas cridèt recentament a una «reïcializacion màger» de las relacions entre Washington e Israèl, en suggerissent que tota futura ajuda en matèria de defensa poiriá èsser condicionada al respècte dels dreches dels palestinians.

Segon mantun sondatge recent, una majoritat d’electors democratas s’opausa d’ara enlà a l’atribucion d’una ajuda suplementària a Israèl, çò qu’illustra lo cambiament rapid de l’opinion dins lo partit. Malgrat que l’emendament foguèsse rebutat per la majoritat de la Cambra dels Representants, entre las mans dels republicans, per 314 voses contra 104, lo vòte constituís una virada politica importanta. Pel primièr còp, una majoritat d’elegits democratas s’es prononciada per la supression de l’ajuda annadièra a Israèl, rompent amb un consens que prevaliá dempuèi de decennis.

 

[Sorsa: www.jornalet.com]