«A Galicia moderna (1880-1939). Unha sociedade activa, unha economía innovadora», de Lourenzo Fernández Prieto

Escrito por Ramón Nicolás

Teño para min que Lourenzo Fernández Prieto, catedrático de Historia Contemporánea na USC e membro de número da RAG, constitúe unha parte substancial, moi substancial engadiría, deste grupo de historiadores galegos que iluminan con brillantez parcelas do noso pasado —en ocasións interpretando capítulos do noso presente como ben testemuñan as súas habituais colaboracións nas páxinas de opinión deste xornal—, cunha evidente vontade didáctica e, o que talvez sexa aínda máis relevante, exhibindo un rexistro accesible e diáfano para calquera persoa que, sen ter coñecementos históricos previos, cultive ese afán de curiosidade que a conduza a afondar nalgún período histórico que, coma consecuencia recorrente posibilitará explicarnos como é o lugar no que vivimos, como é a nosa sociedade e cales son as claves da nosa singularidade.

Neste libro, titulado A Galicia moderna (1880-1939), Fernández Prieto repara no acontecido nun marco temporal que vai das derradeiras décadas do século XIX ata a fin da guerra civil e xa no subtítulo que reza á fronte do seu libro esencializa con brevidade a orientación deste ensaio: «Unha sociedade activa, unha economía innovadora».

Velaí unha afirmación que pode resultar sorprendente e que, sen dúbida, a través dun pulcro exercicio de investigación e de interpretación dos materiais colleitados quebra certos lugares comúns e clixés negativos estendidos sobre o período que o ocupa, tempos sobre os que se erixiron estereotipos e falsidades interesadas que se nos quixeron transmitir. Mais a Galicia moderna non foi, precisamente, un lugar atrasado; antes ben xa se definía polo seu cariz anovador que se proxecta, por só citar algúns elementos, no espírito reivindicativo de labregos e obreiros, nas melloras aplicadas ao mundo agrario, nas iniciativas nos eidos da industria da conserva ou na creación das empresas eléctricas.

Un libro que axuda, pois, a ollar desde outra perspectiva o noso pasado e que subliña a forza dese pulo transformador que configuraba unha Galicia que involucionará desde o ano 1939 coa vitoria do exército golpista e a consciente operación de terror e esquecemento que se impuxo.

Lourenzo Fernández Prieto

A Galicia moderna (1880-1939). Unha sociedade activa, unha economía innovadora

Xerais, Vigo, 18,95 páxinas, 264 €, 2026

 

[Fonte: cadernodacritica.wordpress.com]