Portada per l’UDC,
l’iniciativa qu’aviá per mira de limitar la populacion soïssa es regetada
malgrat un sosten important de l’electorat
Los electors soïsses refusèron dimenge
l’iniciativa populara «Non a una soïssa de 10 milions d’abitants», portada pel
partit de drecha radicala populista Union Democratica del Centre (UDC). Segon Reuters,
lo 54,4% dels votants se prononcièron contra lo tèxt, mentre que lo 45,6% lo
sostenguèron.
L’iniciativa prepausava d’inscriure dins la
Constitucion federala un limit demografic de dètz milions de residents
permanents. Un còp arribat al lindal de 9,5 milions d’abitants, lo govèrn seriá
estat obligat de prene de mesuras per tal de frenar la creissença de la
populacion. S’aquelas mesuras foguèsson estadas insufisentas, Soïssa seriá
poguda èsser menada a metre en question cèrts acòrdis internacionals, sustot
l’acòrdi de liura circulacion de las personas conclús amb l’Union Europèa fa
mai de vint ans.
La question demografica se tròba al còr del
debat dempuèi mantun an. Segon las donadas oficialas, la populacion soïssa
passèt de mai o mens 7,3 milions d’abitants en 2002, an de la dintrada en vigor
de l’acòrdi sus la liura circulacion de las personas amb l’Union Europèa, a mai
de 9,1 milions a la fin 2025. Aquò representa una auça de mai o mens 1,8 milion
de personas, siá près d’un 25%, en un pauc mai de dos decennis. Los partisans
de l’iniciativa estimavan qu’aquela creissença exercissiá una pression creissenta
sul lotjament, suls transpòrts e sus las infrastructuras publicas, mentre que
sos opausants soslinhavan qu’aquela pojada de populacion aviá tanben contribuit
a sosténer l’economia e a respondre als besonhs de man d’òbra del país.
Lo govèrn federal, los principals partits
politics, las organizacions economicas e los sindicats avián cridat a votar
contra l’iniciativa. Segon eles, una limitacion tanben estricta auriá
fragilizat l’economia soïssa, que depend largament de la man d’òbra estrangièra
dins mantun sector essencial, tals coma la santat, la construccion o
l’ostalariá-restauracion.
La victòria del «non» representa una revirada per l’UDC, a l’origina de l’iniciativa, mas lo resultat relativament estrech de la votacion illustra un sosten significatiu de la populacion soïssa e sembla de confirmar la persisténcia en Soïssa de las tensions a l’entorn de las questions migratòrias pels ans venents.
[Sorsa: www.jornalet.com]
Sem comentários:
Enviar um comentário