Cercaires, escrivans e representants de divèrsas comunautats lingüisticas europèas debatràn de la diversitat culturala e l’avenidor de las lengas minorizadas
La vila asturiana d’Uviéu aculhirà las 24 e 25 de julhet lo 28n Congrès de l’Associacion per las Lengas e Culturas Menaçadas (ALCEM), un rendètz-vos internacional consagrat a la defensa de las lengas minorizadas d’Euròpa, çò rapòrta El Comercio. Presidida per l’antropològ e academician Roberto González-Quevedo, l’organizacion torna dins la capitala asturiana près de quaranta ans après una primièra edicion organizada en 1987.
La dobertura del congrès se tendrà al sèti de la Junta Generala del Principat d’Astúrias, lo parlament asturian, amb una vesita institucionala e las intervencions dels representants d’ALCEM e de las autoritats asturianas. Un omenatge serà puèi balhat a Boris Pahor, escrivan de lenga eslovèna e ancian candidat al prèmi Nobel. La matinada se perseguirà amb una conferéncia de Giustina Selvelli sus la diversitat lingüistica dins la region alpenca adriatica.
Lo programa prevei tanben d’intervencions del poèta Mario Obrero e de l’escrivan Inaciu Galán a l’entorn de l’avenidor de l’asturian. Los debats se perseguiràn al Museu Arqueologic d’Astúrias amb de representants de mantuna comunautat lingüistica europèa e una reflexion sul ròtle de la creacion literària en las lengas minorizadas.
Enfin, las darrièras intervencions seràn consagradas a las lengas celticas e la tradicion literària irlandesa. Lo professor Robert K. Shepherd evocarà lo desvolopament de la lenga literària en mantun autor màger d’Irlanda, mentre qu’Avelino Corral abordarà la situacion actuala de las lengas celticas. La presentacion dels actes del precedent congrès e las conclusions d’aquela edicion novèla clavaràn lo congrés.
[Sorsa: www.jornalet.com]
Sem comentários:
Enviar um comentário