Lo govèrn de Galas demanda una “revolucion” educativa per reviudar lo galés

Las autoritats vòlon sustot aumentar lo nombre d’escòlas ont la lenga del país es la de l’educacion

Lo govèrn de Galas demanda una “revolucion” educativa per reviudar lo galé.

Lo govèrn de Galas a reclamadas de mesuras “transformadoiras” dins l’educacion per reviudar la lenga galesa e avançar devèrs la tòca d’un milion de parlants en 2050. L’avertiment ven del rapòrt quinquennal presentat per la missionada per la lenga galesa, Efa Gruffudd Jones. 

Segon lo document, cal una «revolucion dins lo biais d’ensenhar lo galés». Lo recensament de 2021 mòstra que sonque lo 17,8% dels abitants de Galas sabon parlar la lenga, una davalada en comparason amb lo 19% enregistrat en 2011.  

Per inversar la tendéncia, las autoritats vòlon sustot aumentar lo nombre d’escòlas ont l’educacion se fa en galés. Lo parlament galés a ja aprovada una lei que vòl garentir que totes los escolans acaben l’escòla coma «parlants independents». 

En parallèl, cèrtas comunas ensajan de protegir la lenga dins las zònas ont es encara fòrça presenta. A Gwynedd, per exemple, la comuna voliá reservar quinze ostals socials del vilatge de Trefor a de parlants de galés, mas la mesura foguèt considerada illegala. La crompa d’ostals per de novèls residents anglofòns contribuís, d’efièch, a la reculada de la lenga dins qualques territòris ont lo galés es la lenga tradicionala.

[Imatge: Dave Noonan - sorsa: www.jornalet.com]