Lo Ministèri de la Defensa despensa près d’un milion de liuras per an per escolarizar los mainatges de militars dins d’establiments anglofòns de Galas
Lo Ministèri britanic de la Defensa despensa mai o mens un milion de liuras esterlinas per an per enviar los mainatges de militars dins d'escòlas privadas del nòrd del país de Galas, per tal d'evitar que seguisson de corses en galés. Segon Diari per la llengua, una enquista de la BBC a revelat qu’aquela mesura a per mira de «minimizar las perturbacions dins l'educacion» dels enfants, sovent obligats de cambiar de residéncia a causa del trabalh de lors parents. Aital, per l'annada escolara 2024-2025, lo govèrn paguèt 1,019 milion de liuras a d'escòlas privadas per 83 escolans, e 942 000 liuras per 79 mainatges l'annada precedenta.
Aquela politica entraïna una viva polemica. Lo partit independentista galés Plaid Cymru a denóncia un «gaspilhatge d'argent public» e «un insulte a la lenga galesa». Son pòrtaparaula per l'educacion, Cefin Campbell, ramenta que «lo bilingüisme enriquís la vida e favorís lo desvolopament dels joves», e jutja qu'aquela decision illustra lo mesprètz persistent de Westminster envèrs Galas e sa lenga.
La polemica s'es amplificada après la publicacion, sul sit de la Royal Air Force d’Ynys Môn, d'un article que convida las familhas a causir d'escòlas privadas anglofònas se los establiments publics ensenhan «en partida o entièrament en galés».
[Sorsa: www.jornalet.com]
Sem comentários:
Enviar um comentário